Read Hrangkhol 1 SAMUELA 10 Bible Online

1 SAMUELA 10 - Hrangkhol bible

1 SAMUELA 10

¹Khanchu Samuela’n sahriak bûr kha a lâka, Saula lu chunga khan a buaka, a tuma. RENGPA khan, “A mi Israelhai chunga hruaitu ni hranga sahriak nang a inâl mo ni ma?

²A vuan ni ni fesan hnungin Benjamina ramria, Zelza hmun, Rakili thân kôla mi inhni hmu ni ti. Anni khan nangma kuang, sakuartung ni izonghai kha an hmu ta, irngai ro, ni pa khan sakuartung kha insâp ta maka, nangma kêng nang a insâp ual tâk, ki nâipa hi imo ki ilo ta hrang, a ti mai, ti thu nang hril an ti.

³Khanchu kha rengata fe maiin lân, Tabor-a seso thing ni va tung tena chu, kha khan mi inthum Bethel-a Pathian kuanga fe hranghai leh irtong nin ta, inkhatin kêlte inthum pom a ta, inkhatin bai tiam inthum chôi a ta, inkhatin savun koka uain chôi a ti.

⁴Anni khan chubai nang mûk an ta, bai tiam hni nang pe an ta, kha bai kha la ro.

⁵Kha hnung chu Filistia sipaihai omna Pathian tâng va tung ni ta, hiang hin hong ni a ti, kha khua lûtnaa khan, deipuhai perkhuang, khuangte, theihle le serânda chôia bozôl ata zuanghai irtongpuihai ni ta, khêkpuma lâmin om an ti.

⁶Khanchu RENGPA irtha ni chunga zuang chum a ta, nang khom an thuhrilna khan kop sa ni ta, nang khom mi dang chang ta ni ti.

⁷Hi thilhai hi a hong tung tena chu Pathianin nang a ihruai lam takin tho ro.

⁸Khanchu ki fe mân hin Gilgal-a lei zu fe’n lân, keima khom pum hâlirvôm thilinhlan le irngeina irbôlnahai inhlan hrangin nangma kuang zuang ki ta; ki zuanga, ni itho hrang dân nang ki zuang hril mân sûn sari ni lei iom hrang a ni,” a tia.

⁹Khanchu khaang khan a hong ni tâka, Saula’n Samuela kha teipui hrangin hnung a songsan tena chu Pathianin lungrîl danglamna a pêk tâka; kha ni khan Samuela’n a kuanga a ihrilhai kha a tung irkip ving tâka.

¹⁰Khanchu tâng kha an hong tung tena chu, deipuhai khan an irtongpuia, RENGPA irtha a zuang chum pea, an thuhrilna khan a kop sa tâka.

¹¹Khanchu hiang hi a hong nia, matona ama lei inhriatpuihai deipuhai thuhrilna hmuna khan a kop sa tâk, ti an inhriatin an hrila, “Kisa nâipa chunga thil zuang tung hi imo a ini tâk? Saula khom hi deipuhai laia a ikop sa tâk ma ni?” an tia.

¹²Khanchu a omna khuaa mi inkhatin a dona, “An pa chu tu mo a ini ual?,” a tia. Khasikin, “Saula khom deipu a ini tâk ma ni?” ti chu tufiam thôna takin an hmang tâka.

¹³Khan an thuhrilna a kop zoiin chu bôzôl chu a tung tâka.

¹⁴Khan Saula pa urêngpa’n ama le a sinthopuitu kuang khan, “Khôn mo nin ife?,” a tia. Ama’n, “Sakuartung kin izong kêng, kin hmu no tena chu Samuela kuang kin ife a ni,” a tia.

¹⁵Khan, Saula pa urêngpa khan, “Samuela’n ni kuang imo a ihril, nin hril ro,” a tia.

¹⁶Saula pa urêngpa kuang khan, “Sakuartunghai kha an hmu tah ti thu an nin hril,” a tia. Khannisianlân rêng hong chang hrang chungchâng thu Samuela’n a ihril chu hril mah.

¹⁷Khan, Samuela’n mipuihai chu Mizpa-a RENGPA kuang a koi bûmhaia, Israel irchihai kuang,

¹⁸“RENGPA Israelhai Pathianin hiang hin a iti a ni, ‘Israelhai chu Aigupta rengata ki hruai suakhaia, Aigupta mihai kut ata le nangni hmusittu ram murdihai ata nangni ki sansuaka.

¹⁹Khannisian a vuan nin milung inzîngnahai le nin dengtheinahai ata nangni inzôkpu nin Pathian kha indit mak chêia, a kuang rêng ni siam pe roh nin tia,’ tiin. Khasikin, atûn ar chi le a panamin RENGPA makunga hong inlang roi,” a tia.

²⁰Khanchu Samuela’n Israel irchi murdihai chu an langtira, khan Benjamina irchi chu inthangin an om tâka.

²¹Khan Samuela’n Benjamina irchihai chu a in sûngkua tam dôrin an langtirhaia, Matria in sûng mihai kha inthangin an om tâka. Khanchu Kisa nâipa Saula kha inthang a ni tâka, ama an zonga, khannisian hmu mahai.

²²Khanchu RENGPA kha a’rdon nôka, “Mi dang a la iom mo?” an tia. Khan RENGPA’N a sâma, “Irngai roi, neinunhai kâra son ar bîk,” a tia.

²³Khanchu an van tâna, an va hruai suaka, khanchu mipui laia a ngîr suaka ni’n chu mi danghai nêkin a sei uala.

²⁴Khanchu Samuela’n mipuihai kuang, “RENGPA’N mi a inkung hi nin hmu mo? eini lai ata ama ang hi tûte om mak me,” a tia. Khanchu mipui an khêka, “Reng hi hring insôt ri se,” an tia.

²⁵Khanchu Samuela’n mipuihai chu rêng om dân hranghai a hrilhai a hrilhaia, lekhabua a’rziaka, hmun irthianga a siapai tâka. Khanchu Samuela’n mipuihai chu an mâni in sûng tiang an kîrtirhai nôk tâka.

²⁶Khan Saula khom kha Gibe khuaa a in tiang a fea; khan mi hrât senkhat, Pathianin an lungrîl a itôn pehai khom kha an fe saa.

²⁷Khannisianlân, Beliala nâi senkhathaiin chu “Hi pa hin itin mo a ni isansuak thei hrang?” an tia. Khanchu an hmusita, lômman ite pe nuam mahaia, khannisian ama chu ite ti loiin a dâihreka.