Read Hrangkhol 1 SAMUELA 16 Bible Online

1 SAMUELA 16 - Hrangkhol bible

1 SAMUELA 16

¹RENGPA khan Samuela kuang, “Israel mihai rêng hranga ki inuam loi tak hnunga Saula sika hin idôra sôt mo irngaiinsiatin ni iom hrang? Ni sial irki sûnga khan sahriak thun insipin lân, Bethlehem-a mi Jesaia kuang khan fe ro; a nâipasalhai laia mi rêng hrangin ki inthang zoi tâk a ni,” a tia.

²Samuela khan, “Itin mo ki ife thei hrang? Saula’n a len hriatin chu a ni ithat hrang kêng,” a tia. RENGPA khan, “Sehrât pâl kâra hruaiin lân, ‘RENGPA kuang irbôl hranga zuang kêng ki ni,’ ti ro.

³Irbôlna khan Jesaia kha koiin lân, ni tho hrang dân nan hril ki ti. Mi ar hming nang ki ihriltak kha rêng hrangin sahriak ni irthutir hrang a ni,” a tia.

⁴Khanchu Samuela’n RENGPA iti lam angin a thoa, Bethlehem-a khan a fe tâka. A khuaa ulianhai khan irlo’nthing pumin an lei dona, “A sa lampanga zuang chu ni ini ma ni?,” an tia.

⁵Ama khan, “A sa lam tianga chu a ni. RENGPA kuang irbôl hranga zuang ki ni. Irthâr unglân, irbôlna hmuna ki kuang hong sa roi,” a tia. Ama khan Jesaia le a nâipasalhai khom kha irthâra, irbôlna hmuna hong hrangin a koihaia.

⁶Khan an hong tungin chu, Samuela khan Jesaia nâipa Eliaba a lei ena, a lungrîlin “Hi mi hi RENGPA kuanga ngîra inthang chu ni ngêt a ti,” a tia.

⁷Khannisianlân RENGPA khan Samuela kuang, “A hmêl satna mani, a dung sei dân mani, en no ro. Ama hi chu ki inuam loi a ni. Keima’n chu mihriam en dân angin ki ien loi a ni. Mihriamin chu pên tianga inlang an en ngaia. RENGPA’N chu lungrîl a ien ngai a ni,” a tia.

⁸Kha hnung chu Jesaia khan a nâipa Abinadaba a koia, Samuela kuang a hong hruaia. Khannisianlân Samuela’n, “Hi khom hi RENGPA inthang la ni ma,” a tia.

⁹Khan, Jesaia khan Sama a hong hruai nôka. Samuela khan, “Hi khom hi RENGPA inthang la ni ma,” a tia.

¹⁰Khaang khan Jesaia’n a nâipasal sari Samuela makunga a hong hruaihaia. Samuela khan Jesaia kuang, “RENGPA’N hihai hi a inthang ni ma,” a tia.

¹¹Kha zoiin chu Samuela’n Jesaia kuang khan, “Hi hin ni nâihai chu an om irkip ving mo?” a tia. Jesaia’n, “A mitum takte chu a la oma, khannisian kêlbelra enkoltu a ni,” a tia. Khan, Samuela’n, “Va’nkoitirhaiin lân, a hong tung mâka chu irbôlna thil ei inhlan hrang ni ma,” a tia.

¹²Khanchu Jesaia’n a va’nkoitirhaia, a hong hruaia. Ama chu mi mar hmêlsa, a mit meng enhoi a nia, RENGPA khan Samuela kuang, “Thoiin lân, sahriak irthûtir ro, ama hi a ni,” a tia.

¹³Khanchu Samuela khan sahriak thunna sial irki kha a lâka, a urênghai mithmua khan Davida chu sahriak a’rthutira. Voikhat zelin RENGPA irtha kha Davida chunga a zuang chuma, kha nî rengata kha a ompui mai tâka. Khan Samuela chu Ramah khua tiang a kîr nôk tâka.

¹⁴RENGPA irtha khan Saula kha a mâksana, RENGPA itîr ramilhli khan an buaitir ngaia.

¹⁵Saula zuituhai khan a kuang, “Irngai ro, Pathianin nang inbuai hrangin ramilhli a zuang itîr a ni.

¹⁶Khasikin ka pu thu ni pe’n lân, perkhuang suk thei tak zong kin ti. Khanchu ramilhli’n nang a chel rikipa, kha mi khan perkhuang suk a ta, hong dam nôk zôi ni ti,” an tia.

¹⁷Saula khan a zuituhai kuang khan, “A suk thei tak kha ni zong pe unglân, keima kuang hong hruai roi,” a tia.

¹⁸A kôla om ruatharte inkhat khan hiang hin a ti pea, “Bethlehem kho mi Jesaia nâipa ki hmu tâka, kha mi kha irhâihoi tum thei tak chu a ni, khakhêla mi hâi le hmêl satak sipai satak le thuhril thei tak a ni, a kuang RENGPA khom a iom a ni,” a tia.

¹⁹Khanchu Saula khan, Jesaia kuang mi a tîra, “Ni nâipa Davida kêlbelra enkola om ngai kha keima kuang hong tîr roh,” ti hrangin mi a tîra.

²⁰Jesaia khan sakuartung, bai le uaina kop sipin kêlte a lâka, a nâipa Davida kuta Saula pe hrangin an chôitira.

²¹Davida khan Saula kuang a va tungin chu, a makunga a ngîra, Saula khan a lei kan oka, râltukfam chôitu hrangin a len thanga.

²²Khanchu Saula khan Jesaia kuang, “Davida hi keima kuang om ri se, ki milung a inchuktir a ni,” itia hril hrangin mi a tîra.

²³Khaang khan Saula chu ramilhli’n a chel rikipin, Pathian itîr Davida khan perkhuang a lâka a suk pea. Khanchu ramilhli’n a mâk ngaia. Saula chu a hong hara, a hong idam nôk ngai a ni.