Read Hrangkhol 1 SAMUELA 19 Bible Online

1 SAMUELA 19 - Hrangkhol bible

1 SAMUELA 19

¹Saula khan a nâipa Jonathana le a mi lianhai murdi’n Davida that hrangin hê a bêa, khannisian Jonathana khan Davida kha arngaiinnat tak taka.

²Khanchu Jonathana khan Davida kuang, “Ka pa Saula hin nang that a inuam a ni; khasikin nangtûk zîng chu irdîn ro, hmun irthupa irbi chian roh.

³Khan fe ki ta, ni irbîkna rama ka pa makunga va ngîr ki ta, ni chungchâng thua ka pa chongpui ki ta; i mani ki inhriat a omin chu nan hril ki ti,” a tia.

⁴Jonathana khan a pa Saula makunga Davida chu an pâka, a kuang, “Reng khan a suak Davida chunga hin thil sual tho viat no ri se. Ni chunga ite tho’nsualna nei maka, kha nêkin a sinthohai kha ni ta hrangin a sa inzen a ni ual.

⁵Thi khom chi loiin Goliatha kha a doia, khan RENGPA’N Israelhai murdi saninzôkna roiinpui tak a itho suak a ni. Nang khomin ni hmua, ni lôm oka, itho hranga mo nin nunsiat ama chunga ni inthâk? A bi ite om loiin, Davida nin ithat hrang,” a tia.

⁶Khaang khan Saula khan Jonathana thu insîr kha a poma, Saula khan chong ar khâma, “RENGPA irhmingin ki insîr a ni, Davida chu that hrang ni viat ma,” a tia.

⁷Khanchu Jonathana khan Davida kha a koia, kha thuhai kha an sîr pehaia. Kha hnung chu Jonathana khan Davida chu Saula kuang a hruaia, matona ang ngêt khan rêng sin kha a tho nôk tâka.

⁸Khan, Filistia mihai leh irdoina a hong om nôka, khanchu Davida kha a’rthok suaka, Filistia mihai chu a va doia, a thathaia, khanchu lâizâm an tho tâka.

⁹Sûn khat chu Saula khan a ina ufei chôi chiana a om laiin RENGPA itîr ramilhli a chunga a hong tunga; Davida khan perkhuang a suka.

¹⁰Saula khan a ufei leh khan Davida kha banga inkho de khap a tuma; khannisianlân Davida kha a lei irhei lata, ufei kha banga a chum rak tâka. Davida kha an tâna, kha zâna khan a zôk ta.

¹¹Kha zân ngêta khan Saula khan Davida in tiang zînga len ruanga, that hrangin mi a tîra. Davida dôngma Mikali khan, “A vuan zân hin ni rot no’n chu, nangtûk nang an ithat hrang a ni,” a tia.

¹²Khanchu Mikali khan Davida kha tukvera an suma; khanchu Davida chu a rot tâka.

¹³Kha hnung chu Mikali khan millim kha a lâka, zâlhmuna khan an zâla, khanchu a lu tiang khan kêl mul a siaa, puan leh ar khûa.

¹⁴Davida hruai hranga Saula’n mi a hong itîrhai kuang, Mikali khan, “Dam maka,” a lei tia.

¹⁵Khannisianlân Saula khan Davida kha anni ngêtin va en hrangin a hong tîrhai nôka, an kuang khan, “A zâlhmun pumin, hin hong irzôn unglân, keima’n lei that ki ti,” a tia.

¹⁶A mi tîrhai kha an va tungin chu zâlhmuna khan millim kha a lu tianga kêl mul lukham khampumin an va hmua.

¹⁷Saula khan Mikali kuang, “Ithoa mo hianga ni ni ihuang, ki râl ni inzôk hi?” a tia. Mikali khan Saula kha a koia, “A zôkna hrang ki san no’n chu ni that kêng a itum,” a tia.

¹⁸Khan Davida kha a rota a zôk tâka. Ramah khuaa Samuela kuang a fea, a chunga Saula thil tho murdi a hrila. Kha hnung chu ama le Samuela kha an fea. Naioth khan an om tâka.

¹⁹Davida chu Ramah khuaa Naioth-ah khan a om ti Saula kha an hrila.

²⁰Khanchu Davida hruai hrangin Saula khan mi a tîrhaia. Anni khan deipu pâlhai lâm puma thu’nsîr sup sup lai le Samuela chu an chunga hruaitu a nih ti kha an va hmua. Khanchu Saula mi tîrhai chunga khan Pathian irtha a zuang tunga, anni khom khan lâm puma thu’nsîrin an om tâka.

²¹Kha thu kha Saula’n a len hriatin chu, mi dang a tîrhai nôka, anni khom khan lâm pumin thu an van sîr sup supa. Saula khan voithumna khan mi a tîr nôka, anni khom khan lâm pumin thu an van sîra.

²²Kha hnung chu ama khom kha Ramah khuaa khan a va fe sa tâka. Seku hmuna tuikuang irzatak kha a va tunga, Samuela le Davida hi kho tiang mo an iom, a tia.

²³Ramah khuaa Naioth-ah a fe laia khan Pathian irtha a chunga khan a zuang tung sa tâka, lampui tuana khan Ramah khuaa Naioth tung dênin lâm pumin thu an sîr buan buana.

²⁴Khanchu ama khomin a silkaihai a’rkheka, Samuela makunga khan a lâma, thu an sîr sa tâka. Kha nî sûn intuanin le kha zân intuanin korongin a zâl tâka. (Khasika khan, “Saula khom kha deipu a ini sa tâk ma ni?,” iti hi an isôn tâk a ni.)