Read Hrangkhol 1 SAMUELA 2 Bible Online

1 SAMUELA 2 - Hrangkhol bible

1 SAMUELA 2

¹Hani kha a chongchaia, “RENGPA chunga ki lungrîl a lôm tak taka, ki hrâtna chu RENGPA chôiirsângin a om ta, ki râlhai chu ki bâiin a phenênga, Pathian saninhringna khan ki lôm tak tak a ni ta.

²RENGPA anga irthiang hi om mahai; Ama ang zel om mahai. Ei Pathian anga lungpui det zel tûte om mahai.

³Lârirpâk chong hmang irngam unglân, Ni bâi ata ite irsongna chong suak ta no ri se. RENGPA chu vârna Pathian a nia. Ama’n a nitina nin sintho kha a izêk ngai a ni.

⁴Mi hrâthai thalngul an khiaka, mi hrât loihai an hong hrât ta.

⁵A lei khopa omhai kha fâk hrang zongin an irhlo tâka, phîngchâma lei omhai kha an hong khop ta. A ni, nupang chingnu khan nâi sari a nei tâka. Nâi tamtak neinu kha kut korongin a om ta.

⁶RENGPA khan a that theia, an hring nôk thei ngai; thâna an fetira, a hong hruai nôk ngai.

⁷RENGPA khan inriangin a siamhai ngaia, a’rchongtirhai nôk ngai. An temtirhai ngaia, a chôiirsângtirhai thei.

⁸Vâiphin ata inriang kha a kaithoi thei ngai. Inriangtengtêr kha vâiphin ata an domirsângtir theia, Mi lianhai kuang an omtir thei. Roiinpuina rêngtoihmun an lua theina hrangin. Irnêng irnghatnahai hi RENGPA ta a nia, a chunga khan rammual hi a irnghat tâk a ni.

⁹A mi irthianghai ke chu a hrung inzôk ngaia, Mi siathai chu an thimbup zoro hin an irhmang ngai; hrâtna ringotin chu tûte’n inhnêna chang thei no ni.

¹⁰RENGPA doituhai chu koi irnôi chit an ta, Irvân ata khonri’n doi a ti. RENGPA khan rammual pumpui chunga roirêl a ta; a rêng kha hrâtna pe a ti. A hriak irthu ngai hrâtna kha chôiirsâng a ti,” a tia.

¹¹Khanchu Elkana kha Rama khua, a ina khan a kîr tâka. Khannisian nâipangte Samuela chu Silo khuaa a om mai ta, ochai Elia makunga khan RENGPA sin a tho tâka.

¹²Elia nâipasalhai kha mi chanlamboi an nia, RENGPA khom mahrip tho loi

¹³mipuihai chunga ochaihai tho dân khom ngaisak ngai loi mi an nia. Mi’n irbôlna an hong inhlan rikipa hin ochai hnungzui, sa inthilna thîrtûl irzum inthum nei ngai chôiin an honga, sa an suang lai takin.

¹⁴Sa suangna bêla khan sa inthilna thîrtûl leh khan zu sun a ta, kha sa inthilna thîrtûla a ikêlsua dôr kha ochai dongtum ni a ti. Khaang khan Israel mi Silo khuaa irbôlna inhlan hranga hong murdihai kha an lei itho ngai a ni.

¹⁵Khabana khan, a thâi kha an lâkpaia, an hâl mân zelin, ochai hnungzui kha hongin ar bôltu kuanga khan, “Ochai ta hrangin ir-em inhmin hrang, sa ni pe ro; ni sa suang sai kha nuam maka, a sel kêng a inuam,” a ti ngaia.

¹⁶Ama khan an kuang, “A thâi kha hâlpai bak ni sianlân, kha hnung chu ni inunuam la ta ro,” tiin a lei sâmin chu ochai hnungzui khan, “Ni ngai ma, atûn ni pe zel ro, ni ni pêk no’n chu nakhrât songin ki ilâk hrang a ni,” a ti ngaia.

¹⁷Hi Elia nâipasalhai sualna hi RENGPA mithmua irkhêl tak a nia; mihaiin RENGPA kuanga irbôlna inhlanhai kha mahrip tho viat loiin an tho tâk sika a ni.

¹⁸Khannisianlân Samuela chu nâipangte ni khomsian, puan irphân ochai songkol innghâkin RENGPA sin a tho ngaia.

¹⁹Khakhêla khan a nu’n songkol irfual an sui pea, a kum tina irbôlna inhlan hranga a pasal leh an fe’n an chôi pe ngai.

²⁰Khante, Elia khan Elkana le a dôngma kha sat a vurhaia, an kuang, “RENGPA kuanga nin thilinhlan hi, hi nupangnu irchia hin RENGPA’N nang thuan ri se,” a tia. Kha hnung chu an in tiang an kîr nôk tâka.

²¹RENGPA khan Hani kha bor a pêka, nâipasal inthum le nupang inhni a pêk nôka. Nâipang Samuela kha RENGPA kuang khan a hong seilian ta.

²²Elia kha a hong tar ok tâka; Israel mi murdihai chunga a nâihai sintho murdi leh irhmûna puan in kotbâi kôla sinthotu nupanghai an lei zâlpuihai ngai thu an hriata.

²³Khanchu an kuang, “Itho mo khaanga thil nin itho hi? Mi tinin nin thiltho saloihai an nin sîr pea.

²⁴E he! ki nâihai, nin thurchi ki inhriat hi a siatna tiang inzen a ni.

²⁵Mi inkhatin mi dang chunga a sualin chu porinchetir a ni, Pathianin a chunga rêl pe a ta, khannisianlân, mi RENGPA chunga a sualin chu tu’n mo a ingênpui ta hrang?” a tia. Kha dôr ten khom khan an pa thu zôm nuam loiin an oma. Khasikin RENGPA khan anni kha a ithathai ngêt hrang a ni.

²⁶Nâipang Samuela kha a hong irsôn tîr tîra; Pathian le mihriam mit tungin a om tâka.

²⁷Elia kuang khan Pathian mi inkhat a honga, a kuang RENGPA thu a hon tunga; “Nin irchibulhai kha Aigupta rama Faroa suaka an om lai khan an kuang ki inlâr mo ni ma?

²⁸Khante Israel nam murdihai laia ki maichâma fea, mirimhoi hâla, ki makunga ochai songkol innghâk hrangin, ki ochai chang hranga ama kha ki inkung mo ni ma? Ni’rchibulhai kha Israel mihai hâlirvôm thil mo ki inhlanhai ni ma?

²⁹Itho sika mo ki omnaa inhlan hranga ki inkung, ki kuanga irbôlna le ki dongtum thilinhlan kha nin sirbea? keima nêkin ni nâipasalhai ni inhlu ual, nangni irvâi marna hrangin mo ki mi Israelhai irbôlnaa sahai nin ihmang hi?

³⁰Khasikin keima RENGPA Israelhai Pathian hin ni in sûngkuahai le ni pa sûngkuahai kha kumtuanga ki ochai changin ki makunga om mai nin ti, tiin ki len kunga. Khannisianlân atûn chu om viat ta no chin nih ki iti a ni. Ni chôiirsângtuhai chu chôiirsâng ki ta, a ni hmusithai chu hnuaisiahai ki ti.

³¹Irngai ro, ni in sûngkua le ni panam laia vânglaihai murdi ki thatna hrang nikhua chu a hong itung thiai tâk a ni, khanchu ni ina tar kûna dam zel om ta no nihai.

³²Khanchu Israel mihai vângsakna ki ivur murdi kha irzukin thîr ni ta, inchop irkhêl takin om ni ta; khanchu ni ina tar kûna dam zel om no ni.

³³Khan ni mi ki maichâm ata ki irhmangtir loi chu, ni mit en inkhamtirtu le, ni milung innatirtu vai ni a ti. Ni ina zuang suak dang murdi chu an vânglai zoro takin thi an ti.

³⁴Khante ni nâipasalhai ruai Hofnia le Finehasa chunga thil hong tung hrang kha ni ta hrangin irsinsiana ni a ta, sûn khat sûngin an ruaiin thi an ti.

³⁵Ochai iamom tak ki ta hrangin inthang nôk ki ta, ama khan ki lungdo inchuk a ti. Sûngkua det takin siam ki ta, kumtuangin ki sahriak irthu makunga khan sintho a ti.

³⁶Hiang hin ni a ta, ni ina la om murdihai kha tangka le bai ngênin, kha ochai kuang khan fe an ta, bai a chînte lua fa hrang ki hmu theina hrangin ochai sin, i khôk mani nin thotir ro, ti an ti,” a tia.