Read Hrangkhol 1 SAMUELA 20 Bible Online

1 SAMUELA 20 - Hrangkhol bible

1 SAMUELA 20

¹Kha hnung chu Davida kha Ramah khuaa Naioth rengata kha a rota, Jonathana kuang a fea, “I ngân mo ki itho? Imo ki itho inchâi? Ni pa chunga hin imo ki tho’nsualna, hianga ni that a itum hi?,” a tia.

²Jonathana khan, “Nang that no nia, thi viat no chi ni, ka pa khan ite nin hril loiin lian ri se, chîn ri seh khom tho ngai ma. Itho sikin mo hi thu hi keima kuang a iip hrang, ip viat no ni,” a tia.

³Khannisian Davida khan, “Ni pa khan lung ni ni inkham dân hi an hriat infel vinga, khasikin Jonathana khan hi thu hi chu inhre ual no ri se. khano’nchu, a lungrîl a na pe hrai itinin, a iti khom a ni thei. Khasikin RENGPA irhming chôiin ni kuang chong kin kung a ni, thina le kin kâr chu kalkhat vai a ni,” a tia.

⁴Kha hnung chu Jonathana khan, “Ni inuamtak nang tho pe mai ki ti,” a tia.

⁵Khanchu Davida khan, Jonathana kuang, “Nangtûk hi tha thar kût nî sûn a nia, rêng kuang khalâi irhîl ngêt hrang ki nia. Khannisian, a sa ni ti’n chu nangtûk pên khohloi dên thaiin rama irbi hrangin fe ki ti.

⁶Ni pa hin ki omna hi a hon hriat suak duaia ni’n chu, Davida khan a khua Bethlehem-a va fe vak a ni ngêna; a in sûngkuahai hrangin an kum tina irbôl zoro a nia, lei ti’n lân.

⁷Khan, ‘A sa a ti’n chu,’ ki izôk ni a ta, khannisian a ning an murin chu thil saloi tho a itum a nih ti zel ro.

⁸Irngaihoi takin lung nin khamin lân, keima kuang ni thuthung siam kha vong mai ro. Khannisianlân, pualoina nei ki nia ni’n chu nangin ni that zel ro. Itho hrangin mo ni pa kuanga ni fepui ngêt a inang?,” a tia.

⁹Jonathana khan, “Khaanga thil kha ngaitua viat no ro. Ni chunga thil saloi tho, ka pa’n a tum iti kin hriat ngânin chu nang ki inhril loi hrang mo?,” a tia.

¹⁰Kha hnung chu Davida khan Jonathana kuang, “Ni pa khan henhrum takin nang lei don ta sianlân, tu’n mo nin hril ta hrang?,” a tia.

¹¹Jonathana khan Davida kuang, “Thoiin lân, rama va fe ro,” a tia. Khanchu rama khan hmunkhatin an fea.

¹²Jonathana khan Davida kuang, “RENGPA Israelhai Pathian chu nin hriatpuitu ni ri se. Nangtûk le nangtûk pên hiang zoroa hin ka pa hong chongpui ki ta, ni chungchâng thua, a sa lampanga ni’n chu ni kuang mi tîrin nang hong hril ki ti.

¹³Khanchu ka pa khan ni chunga thil saloi tho a tuma nang ki hong hril noa, ni zôkna hrang lampui nang ki zong pe no’n chu RENGPA’N a ni lo lam takin ni lo ri se. Kha nêka natinsat ual khomin. RENGPA chu ni kuang om ri se. Ka pa kuanga a iom ngai ang khan!

¹⁴Ki hring sûng chu, ni thuthung irthiang vong ngitin lân, ki chunga iamomin om ro; khannisian ki thi duai tâka a ni khomin,

¹⁵Kumtuangin ki in sûngkuahai kha lungkhamhai mai ro. RENGPA khan ni râlhai murdi irnêng chung ata an irhmang zoi ten khomin,

¹⁶ei ruaia thuthung hi khiakin om no ri se, a kiakin a omin chu RENGPA’N kuttum nang a itho hrang a ni,” a tia.

¹⁷A thar vangin Jonathana khan ama lungthungna sikin Davida kuang chong ar khâm nôka, ama hringna lung a ithung ang takin Davida kha lung a ithung a ni.

¹⁸Kha hnung chu Jonathana khan a kuang, “Nangtûk hi chîmu thar kût a nia; ni toina a rong hrang sikin ni omna hmun inlang ngêt hrang a nia.

¹⁹Nangtûk pên a inlang ual hrang a ni; khasikin matona nir bîkna ngai hmun ngêta khan fe zelin lân; lung buk irhlia khan irbi chian ro.

²⁰Ki iti tâk ang khan a kôla ki thal inthum hong kâp ki ta,

²¹kha hnung chu ki hnungzuihai laia, fe’n lân, thalhai kha va zong ro, tiin tîr ki ta. A ni zuitu kuang khan, ‘En ro, thalhai kha ni sîr tiang khan a oma, lan lân, hong ro,’ ki ti’n chu RENGPA hringna sâmin ki iti a ni, ni ta hrangin lungthia omin chi hrang ite a iom loi ni a ti.

²²Khannisianlân a ni zuitu kuang khan, en ro, thalhai chu nangma khêl tiang son an om, ki ti’n chu rotpat ro, RENGPA khan nang a tîrin chu fe ni ta;

²³eini ruai kâra thu ei ithung chungchânga chu RENGPA’N ei ruaia kâra kumtuangin nin det pe mai a ti,” a tia.

²⁴Khanchu Davida kha rama khan ar bîk tâka. Tha thar kût nî sûn khan, rêng Saula kha khalâi irhîl hrangin a honga;

²⁵sûn danga a toina ngai bang kôla khan a toia. Jonathana kha Saula irdîna maton taka khan a toia, Abnera kha Saula kôla a toia. Davida hmun kha chu a ronga.

²⁶Nikhomsianlân, Saula khan kha ni khan chu ite ti maka, a lungrîlin, “A chunga thil i mani a tunga, a irthiang loi ni ngêt a ti,” a tia.

²⁷Khan, zîng nôk nî tha thar kût nia khan Davida hmun kha a la rong maia; khanchu Saula khan a nâipa Jonathana kuang khan, “Itho mo Davida hi mizân le a vuan hin khalâi irhîl hrangin a ihong loi hi?,” a tia.

²⁸Jonathana’n Saula kha, “Davida’n Bethlehem-a fe a ni ngên ngota.

²⁹Irngaihoi takin nin fetir ro, kin insûng mihai khom kin khuaa irbôlna an nei hrang sikin, ki urênghaiin om sa hrangin an ni hong ngêna, khasikin lung ni nin kham theiin chu nin fetirin lân, ki urênghai la va hmuhai rong,” a tia. Khasikin kha zoro taka khan a iom loi a ni, a tia.

³⁰Kha hnung chu Jonathana chunga Saula ning an mur pe tâka, a kuang, “Invêtpa! atûn hin Jesaia nâipa Davida kha ni mualinphoina hrang le ni nu mualphoi irlatir hrangin ni ithop a nih ti kin hriat.

³¹Davida hi, hi irnêng chunga a om kârka chu hi rama hin rêng chang no chi nih ti ni inhriat loi ma ni? Atûn hin fe’n lân, va hruai ro, a ithi ngêt hrang a ni,” a tia.

³²Jonathana’n a pa Saula kha hiang hin a tia, “Itho sikin mo an ithat hrang? I sin mo a insiat?,” a tia.

³³Kha tena chu Saula khan that tumin Jonathana kha ufei leh an khoa; khasika khan Jonathana khan a pa’n Davida kha that a lei itum mai a nih ti an hriat tâka.

³⁴Kha hnung chu Jonathana kha khalâi dokâng ata kha ningmur irlâkin a thoia, kha nia tha thar kût sûn hnina khan ite fa ta maka. A pa Saula khan Davida mualphoi a sak tâk sikin ar ngai a siatpui oka.

³⁵Zîng nôka chu Jonathana kha nâipangte hruaiin ram tiang Davida leh an hmun indangna khan a fe tâka.

³⁶A nâipang hruai kuang khan, “Intânin lân, ki thal kâphai so va zong ro,” a tia. Nâipang kha an tân lai khan, a kôla khan thal a va kâpa.

³⁷Nâipang khan Jonathana thal kâp tâkna hmun a va tungin chu, Jonathana’n nâipang kuang khan, “Thal kha ni pên tianga khan kêng a om.

³⁸Kha khan ngîr chian no ro; irhnotin lân, ir-ial no ro,” a va tia. Nâipang khan thal kha a hrûta, a pu kuang a hong chôia.

³⁹Khannisianlân, nâipang khan ite inhre maka, Jonathana leh Davida vai khan thil omzia kha an inhriata.

⁴⁰Jonathana khan kha nâipang kha a hriamhreihai a pêka, a kuang, “Fe’n lân, kho sûng hong chai ro,” a tia.

⁴¹Khanchu nâipang kha a fe zoiin chu, Davida kha a omna hmun lung buk ilhlî ata kha a hong thoia, khûksadelin, a hmâi irnêng sikin voithum an boka, Jonathana leh an ruaiin an irphâma, an chapa. Khanchu Davida kha Jonathana nêkin a lungrîl a na pe uala.

⁴²Kha hnung chu Jonathana khan Davida kuang, “Irtharngam takin fe’n lân, RENGPA ei ruaia thuthung, nangma le ei kâr le ki’rchihai le nir chihai kâra khom kumtuangin indet mai ri se,” a tia. Khanchu Davida kha a thoia, a fe tâka; Jonathana chu kho sûng tiang a kîr nôk ta.