Read Hrangkhol 1 SAMUELA 23 Bible Online

1 SAMUELA 23 - Hrangkhol bible

1 SAMUELA 23

¹Davida’n Keila khua chu Filistia mihaiin an doia, hruizôla buhai khom an lâk pehai ving ti thu a len hriata.

²Khanchu Davida khan RENGPA kuang, “Filistia mihai khu ki zu idoihai hrang mo?,” iti ar dona. RENGPA khan Davida kuang, “A sa, Filistia-hai khu zu doiin lân, Keila khua chu zu’nzôk ro,” a tia.

³Khannisianlân Davida mihaiin Davida kuang, “Irngai ro, Judai rama om khom hin ei ichi a nia, Keila khua zu fea, Filistia mihai zu doi hrang chu ichi teh a om bâka!” an tia.

⁴Khanchu Davida khan RENGPA kha ar don nôka, RENGPA khan, “Thoiin lân, Keila khuaa zu fe ro, Filistia mihai chu ni kut chunga nang pe ki ti,” a tia.

⁵Khanchu Davida le a mihai chu Keila khuaa an zu fea, Filistia mihai kha an zu doia, mi tamtak an thathaia, an ramhai an lâk pehaia. Khaang khan Davida’n Keila khuaa mihai kha a inzôk a ni.

⁶Ahimeleka nâipa Abiathara a zôka, Keila khuaa Davida kuang lâizâm a tho laia khan ochai songkol irfual chôia fe a ni.

⁷Keila khuaa Davida a fe ti Saula an hrila; Saula khan, “Pathianin ki kuta a ni ipêk a ni ta, Davida chu kulpui le dâimikot kalna khuaa lûtin ar khum sikin,” a tia.

⁸Khanchu Saula khan râl kâptuhai kha irdoi hrangin Keila khua zu doia, Davida le a mihai zu hual hrangin a bukhaia.

⁹Davida chu Saula’n a chunga thil saloi tho hrang a tum ti a len hriatin chu, ochai Abiathara kuang khan, “Ochai songkol kha hin hong chôi ro,” a tia.

¹⁰Khanchu Davida khan, “O RENGPA Israelhai Pathian, Saula khan keima ni suak sika hin Keila khuaa zuanga hi khua hi zuan siat chit hrangin ar siam ti kin hriata.

¹¹Keila kho mihai hin Saula kuta ni pe nihai mo? Ni suak hin ki lei inhriat lam ang hin Saula khi zuang ni mo? O RENGPA Israelhai Pathian, lungkham takin ni suak hi nin hril ro,” a tia. RENGPA khan, “Zuang a ti,” a tia.

¹²Davida khan, “Keila kho mihai khan keima le ki mihai hi Saula kuta ni pe nihai mo?,” a tia. RENGPA khan, “Pe an ti,” a tia.

¹³Khanchu Davida le a mihai irzarukhai kha an thoia, Keila khua ata kha an suaka, fena hrang inchumna tiang an fea, Davida kha Keila khua ata a rot tah ti Saula’n an hriatin chu a thiltum kha a’rlêktira.

¹⁴Davida chu Zif ramchâr kôla tâng rama irbîkin a om chiana. Saula khan a zong maia, khannisianlân a mi Davida chu a kuta pe maka.

¹⁵Davida khan ama that hrangin Saula a hor thok ti an hriata. Davida chu Zif ramchâr kôla Hores-a khan a oma.

¹⁶Saula nâipa Jonathana kha a thoia, ramkâra Davida omna khan a fea, Pathianin nan zôk mai a tih ti lungngam a va saka.

¹⁷A kuang, “Chi viat no ro, ka pa Saula kutin nan siat thei viat no ni. Israelhai rêngin nangma om ni ta, keima ni thuai zela om ki ti, ti khom hi ka pa Saula hin a inhriat chian a ni,” a tia.

¹⁸Khanchu an ruaiin RENGPA makunga thu an thung tâka. Davida chu ramkâra a om maia, Jonathana kha a in tiang a kîr nôk tâka.

¹⁹Zif ata mi senkhathai kha Gibea khuaa Saula kuang an fea, “Davida chu kin rama Hores-a Judai ramchâr sim tiang pang Hakila tânga khin ar bîk chian.

²⁰Khasikin o rêngpa ama khi chel ni inuam a nia, khasikin kin rama zuangin lân, keini lei tho dân hrang chu rêng kuta ama lei inhlan kin ti,” an tia.

²¹Saula khan, “RENGPA’N sat nangni vur ri se, nangni hin lung nin ni inkham ok a ni.

²²Fe unglân, van fel nôk ual roi, a hnung va sui unglân, a hmutu khom kha van fel roi. Ama chu vârirlet takin thil a tho ngai ti mi’n an nin hril.

²³Khasikin ar bîkna ngai hmunhai infel ving unglân, keima kuang hong nôk ngêt unglân, khanchu nin kuang zuang ki ta, kha rama khan a la om ngânin chu Judai ram pumpuia zong hrang a ni khoma zong suak ki ti,” a tia.

²⁴Khanchu kha khan Saula fe mânin Zif rama an fe tâka. Davida le a mihai chu Judai ramchâra sim tiang Araba rama Maon ramchâra khan an oma.

²⁵Saula le a mihai kha Davida zong hrangin an fea, khannisianlân Davida’n a len hriata, khanchu Maon ramchâr lungpui tânga khan a luia, khatak khan a om tâka.

²⁶Saula le a mihai kha tâng kiangdang tiang an oma. Davida chu Saula chiin irhnot takin an tâna. Saula le a mihai khan Davida le a mihai kha chelhai hrangin an hong pan nâihai tâka.

²⁷Kha lai taka khan thanginthei mi a hong tunga, Saula kuang, “Irhnot takin zuang ro, Filistia mihaiin ei ram an hong idoi a ni,” a tia.

²⁸Khanchu Saula khan Davida irzûl kha a mâka, Filistia mihai doi hranga khan a fe tâka. Khasika khan kha hmun irhming kha Sela-hamalekot irsenna tâng an iti tâk a ni.

²⁹Davida chu khatak ata kha a rota, Engedi rama khan a fea, khatak khan a irbîk tâk a ni.