Read Hrangkhol 1 SAMUELA 27 Bible Online

1 SAMUELA 27 - Hrangkhol bible

1 SAMUELA 27

¹Davida khan a lungrîlin, “Itik nî mani chu Saula kuta hin ki la ithi ngêt hrang chu ni a ti; khasikin Filistia mihai kuanga laizâm tho ti no hi chu a sa dang om no ni. Khanchu Saula khan Israel ram pumpuia a ni zong hi a beidong pe ta a ti. Khanchu a kut ata zôk ki ti,” a tia.

²Khanchu Davida le a kuanga om irzaruk omhai kha Maoka nâipa, Gath-a rêng Akisa kuang an fe tâka.

³Davida kha ama le a mihai, an in sûngkuahai leh, Davida khom a dôngmahai a hruaia, Jezreel mi Ahinoami le Nabala dôngma Karmel tânga mi Abigaili hai leh Gath khuaa Akisa kuang an om tâka.

⁴Davida chu Gath khuaa laizâm a tho ti Saula’n a len hriatin chu, zong tum ta maka.

⁵Davida khan Akisa kuang, “Lung nin khamin lân, ni ram sûnga khua inkhata hin om hmun ni pe’n lân, khatak khan lei om ta rong, ni suak hi i lo hrangin mo rêng khuaa nangma kuang a iom mai hrang?,” a tia.

⁶Khanchu Akisa khan Ziklag khua kha a pêka, khasika khan Ziklag kha atûn ten hin Judai ram rênghai ta a ini mai a ni ta.

⁷Davida kha Filistia-hai rama khan kum khat tha minli a oma.

⁸Kha sûnga khan Davida le a mihai kha an fea, kha rama khan tian rengata lei om tâk Gesur mihai, Girzi mihaiin, Amalek mihai an rûna. An ram kha Aigupta dên rakin Sur khua dênin an irûn a ni.

⁹Nupang pasal an rêngin an ithathai a nia, kêlbelrahai, sialhai, sakuartunghai, saringseihai, an sil le kaihai an lâk pehaia; khanchu a hong kîr nôka, Akisa kuang a fea.

¹⁰Akisa khan, “A vuan hin kho tiang mo ni irûn?” a tia. Davida khan, “Juda sim ramhai, Jeramil-hai ram, Ken mihai omna ram,” a iti pe a ni.

¹¹Davida khan nupang pasal a rêngin a thathaia, Gath khuaa a fea, ama le a mihai thiltho hon sîr hrang kha a ihôi ngai loi a ni.

¹²Khannisianlân, Akisa khan Davida thu’nsîr kha a pompuia, “Ama mi Israelhai khan an ngam sabaka. Khasikin a hring kongkâr chu ki sin a itho mai hrang a ni,” a tia.