Read Hrangkhol 1 SAMUELA 3 Bible Online

1 SAMUELA 3 - Hrangkhol bible

1 SAMUELA 3

¹Khan nâipang Samuela kha Elia makunga RENGPA sin a tho laia khan RENGPA kuang ata chongbe om lele ngai maka; inlârna tihai khom.

²Kha zoro khan zân khat chu Elia mit zîng tâk khan, ama tentan sûnga a zâla;

³Samuela chu Pathian Thuthung Bôm omna hmun biak ina khan a zâla, khovâr mân meiser a lan chok mai laiin,

⁴RENGPA khan Samuela chu a koia. Ama’n, “Ka pu hin ki om,” a tia.

⁵Khante, Elia kuang khan a van tâna, “Hin ki om, ni ni ikoi ma ni,” a tia. Khannisianlân Elia khan, “Nang koi ma ung, va zâl nôk ta ro,” a tia. Khanchu Samuela chu a fea, a va zâl nôk tâka.

⁶RENGPA khan Samuela kha a koi nôka, kha lai khan nâipang Samuela khan RENGPA ikoi a nih ti inhre thei maka, RENGPA’N a kuang thu a lan puang pe ngai no sikin.

⁷Khanchu Samuela chu a thoia, Elia kuang khan a fea, “Hin ki om ni ni koi maia,” a tia. Khan Elia khan a sâma, “Nang koi ma ung, ki nâipa va zâl nôk ta ro,” a tia.

⁸Voithumna tena chu RENGPA khan Samuela kha a koi nôka. A thoia Elia kuang khan a fe nôka, “Hin ki om ni ni koi maia,” a tia. Khanchu Elia khan nâipang kha RENGPA’N a ikoi a nih ti an hriat tâka.

⁹Khanchu Elia khan Samuela kuang khan, “Fe’n lân, va zâl nôkin lân, nang a koi nôkin chu, RENGPA thu insîr ro, ni suak hin ar ngai chian, ti ro duah,” a tia. Khanchu Samuela kha a fea, a va zâl nôka.

¹⁰RENGPA kha a zuanga, matona a ikoi ang lam ngêtin, “Samuela, Samuela,” tiin a koi nôka. Khanchu Samuela khan, “Thu insîr ro, ni suak hin ar ngai chian,” a tia.

¹¹Kha hnung chu RENGPA khan Samuela kuang, “Irngai ro, Israel rama hin an hriat murdihai irngai nuam loi tamtakin thil irkhêl tak tho hrang ki ni.

¹²Kha nikhua khan Elia in sûng mi thurchi ki insîr murdi kha a bula irthokin a mong dênin ki itho hrang a ni.

¹³A nâipasalhaiin Pathian an insîrinsiatna sual kha inhriat chakin a khap no sikin a in sûngkua chu kumtuanga hrangin kuttum ki itho hrang a nih ti hi ki lei ihril zoi tâk a ni.

¹⁴Khasikin Elia in sûng mihai siatna kha irbôlna hrangin mani, thilinhlanin mani, itiklai khomin irlêk thei ni no nih tiin chong ki lei inkung tâk a ni,” a tia.

¹⁵Samuela kha a vâr dênin a zâlhmuna khan a oma; khanchu a hong thoia, RENGPA khan mikothai kha an honga, kha inlârna kha chu Elia hril hrangin a sân a chi tâka.

¹⁶Khanchu Elia khan Samuela kha a koia, “Samuela ki nâipa,” a tia. Samuela khan, “Hin ki om ka pu,” a tia.

¹⁷Elia khan, “I thil mo RENGPA’N ni kuanga a insîr? keima kuang ite ip nei no ro duah. Ni kuanga a insîr murdi kha keima kuang ip ni neiin chu, Pathianin irkhêl takin kuttum nan tuangtir ri se,” a tia.

¹⁸Khanchu Samuela khan itinrêng a hril pe ving tâka; ite ip nei viat loiin. Elia khan, “Ama chu RENGPA a nia, a sa a iti lam takin tho ri se,” a tia.

¹⁹Samuela chu a hong irsôn tîr tîra, a kuang RENGPA a om maia. Samuela chongbâi suak tinrêng chu thudikin a siama.

²⁰Khanchu Dan khua ata Beer-seba dên rakin Israel mi murdihai khan Samuela chu RENGPA deipu hranga indet a nih ti an hon hriatsuaka.

²¹RENGPA chu Silo khan an lâr nôka, kha khan RENGPA chu thuin Samuela kuang Silo-a khan a inlâr a ni. Khan, Samuela thu kha Israel mi murdi laia khan an thangsuak tâka.