Read Hrangkhol 1 SAMUELA 31 Bible Online

1 SAMUELA 31 - Hrangkhol bible

1 SAMUELA 31

¹Filistia mihaiin Israelhai chu Gilbo tânga khan an doia, kha tânga khan Israel mi tamtak thatin an oma; rêng Saula le a nâipasalhai le mi danghai kha Filistia mihai ata lâizâm an tho tâka.

²Khannisianlân Filistia mihai khan Saula le a nâipasalhai an irzûlhai thala, an phaa, Saula nâipasalhai kha Jonathana le Abinadaba le Malkisua kha an thata.

³Khan, Saula kha an doi natinsat tak taka, thalin a tok tâka, a sate’n a popa.

⁴A râltukfam chôitu ruatharte kuang khan, “Ni khandai phôiin lân, ni that ro; khano’nchu hi sertan loihai hi hong an ta, ni that an ta, ki chunga irpâkna an ti,” a tia. Khannisianlân râltukfam chôitu khan that hrangin ngam maka. khanchu Saula khan a khandai kha a lâka, ar sun that ta.

⁵A râltukfam chôitu khan Saula a thi ti an hriatin chu, ama khom kha a bingin ar sun that sa tâka, an ruaiin an thi ta.

⁶Khaang khan Saula le a nâipasal inthumhai le a râltukfam chôitu kha an ithi a ni. Kha nî khan Saula mihai murdi an thi ving ta a ni.

⁷Israel mi Jezreel phâi varâl tianga omhai le Jordan râl nisua tianga omhaiin, Israel sipaihai lâizâm an thoa, Saula le a nâipasalhai an thi ti an inhriatin chu lâizâm an tho tâka. Khanchu Filistia-haiin an khua an va ilua tâk a ni.

⁸Irdoi nî zîng nôka chu Filistia-haiin an râl thathai inmok hrangin an va fe’n chu Saula le a nâipasal inthum, Gilbo tânga lei thi, ruak zâl kha an va hmua.

⁹Saula lu kha an tana, a râltukfam kha an khekpai pea, kha thurchi kha an millim biakna ina le an mihai kuang inpuang hrangin Filistia rama khan mi an tîrhaia.

¹⁰Khanchu Saula râltukfamhai kha Astoret biak ina an siaa, a ruak kha Beth-san khopui kul banga an târa.

¹¹Jabes Gilead-a omhaiin Filistia mihaiin Saula an tho dân chungchâng thu kha an inhriatin chu,

¹²mi murdi an irthoka, zân sôtin an fea, Saula ruak le a nâipasalhai ruak kha Beth-san kul bang ata kha an lâka, khanchu Jabes khopuia an hong tungpuia, an hâl tâka.

¹³Kha hnung chu an ruhai kha an irkhôma, Jabes hmuna Tamarik thing hnuaia an phûma, khanchu sûn sari bu an nghei tâka.