Read Hrangkhol 1 SAMUELA 4 Bible Online

1 SAMUELA 4 - Hrangkhol bible

1 SAMUELA 4

¹Kha laia khan Filistia mihai chu Israelhai doi hrangin an irfôka. Khasika khan Israel mihai kha Filistia mihai doi hrangin an irthok suaka. Ebenezar kôla omhmun an khuara; Filistia mihaiin Afek-a hmun an khuara.

²Filistia mihai kha Israel mihai lei danh hrangin an lei irzara; an hong irdoiin chu Filistia mihai kuanga khan, Israel mihai chu an dok tâka, irdoina hmuna khan sipai sângminli vêl an thata.

³A la dam sipaihai kha an riakbuka an va kîr nôkin chu Israel ulianhai khan, “Itho sika mo a vuan hin Filistia mihai kuta RENGPA’N a ni indoktir hi o? Ei kuang a oma, ei râlhai kut ata ni saninzôk hrangin Silo ata RENGPA Thuthung Bôm kha hong la ei ti,” an tia.

⁴Khanchu mipuihai khan Silo-a khan mi an tîra. Khatak ata kha Cherubim chunga toi, Itinrêng sin thei RENGPA Thuthung Bôm kha an va lâk tâka. Thuthung Bôm an zuang chôia khan Elia nâipasalhai Hofnia le Finehasa hai an ruaiin an zuang saa.

⁵RENGPA Thuthung Bômin an riakbuk a zuang tungin chu, Israel murdihai kha inring takin an khêk dur dura, irnêng an tor chita.

⁶Filistia mihaiin an khêk irhâi an inhriatin chu, “Hebraihai riakbuka mi khêk irhâi kha itho sika ma ni tâk?,” an tia. Hebraihai riakbuka RENGPA Thuthung Bôm a zuang itung a nih ti an inhriat tâka.

⁷“An riakbuka Pathian a izuang a ni. Ei ta hrangin intak a ti! matona khan chu hianga hi la om ngai maka, ei ta hrangin irhel zap a ti!

⁸Kha Pathian kut hrât tak ata kha tu mo nin zôk thei ta hrang? kha Pathian kha a ni, Aigupta mihai ramchâra hripui chi tinrêng that theitu kha.

⁹O nangni Filistia mihaio, nin suaka an iom anga khan Hebraihai suaka nin om loina hrangin hrât takin om unglân pasal hrâtin om roi: Pasal hrât takin om unglân, pasal hrât angin doi mai roi,” an tia.

¹⁰Khanchu Filistia mihai khan hrât takin an doia. Israel mihai chu an doka, an mâni insûng tiang lâizâm an tho tâka, an that intamhai oka: Israel mi sipai sîngthum an ithi a ni.

¹¹Pathian Thuthung Bôm kha an lâk pehaia; Elia nâipasalhai ruai Hofnia le Finehasa hai kha an that saa.

¹²Sipaihai laia Benjamina irchia mi inkhat irsualbual ata kha an tâna, a puan diar chet duarin le a lu chunga pil kop zuakin, kha nî sûn ngêta khan Silo a hong tunga.

¹³Elia khan lampui sîra a toihmuna toiin a lei thîr chiana, Pathian Thuthung Bôm sika khan a lungrîl chu irlo’nthingin a oma. Kha mi kha kho sûnga a hong tunga, thurchi kha a hon sîrin chu an kho pumpuiin irlo’nthingin an khêk vung vung tâka.

¹⁴Elia khan an khêk irhâi a len hriata, “Kha dôra irhâi a isiat so itho sika mo a ini,” a tia. Kha mi kha irhnot takin a va fea, Elia kha a va hrila.

¹⁵Elia chu kum sômkuak kiriat mi a nia, a mit a zîng pe tâka, khua hmunfel thei ta maka.

¹⁶Kha mi khan Elia kuang khan, “Irsualbual ata hong zôk ki nia, a vuan hin irsualbual ata hong rot ki ni,” a tia. Elia khan, “Ki nâipa itin mo thil a iom lam?,” a tia.

¹⁷Thurchi hong intungpu khan a sâma, “Israel mihai chu Filistia mihai ata kha lâizâm an thoa, mipui laia irthatna irkhêl tak a oma, ni nâipasalhai ruai Hofnia le Finehasa hai khom an thia; Pathian Thuthung Bôm khom an lâkpai pehai ta,” a tia.

¹⁸Kha mi khan Pathian Thuthung Bôm thu a hon sîr zela khan, kotbâi kôla a toihmun ata kha Elia chu a thal tiang an rîla, a ring a kiak pea, a thi tâka, a tar ok tâka, a mar sika a ni, Israelhai chunga kum sômminli roi lei rêl tâk a ni.

¹⁹Elia moinu Finehasa dôngma khan nâi a vonga, a neina hrang anâi teng tâka, Pathian Thuthung Bôm an lâkpai pe ti thu an hriata, a pu le a pasal an thi thu a hon hriatin chu a lu a kûna, nâiha’n a sea, nâi a nei tâka.

²⁰A thi vâng tâka, a kôla nupanghai khan a kuang, “Chi no ro, nâipasal ni nei ta hi te,” an tia. Khannisianlân irngai viat maka, a sâm khom sâmhai mah.

²¹“Roiinpuina khan Israel chu a mâksan ta,” tiin nâite irhming chu Ikaboda a ti tâka. Pathian Thuthung Bôm chu an lâkpai pea, a tarpu le a pasal an thi tah ti tetûkna a ni.

²²“Pathian Thuthung Bôm chu mi’n an lâk tâk sikin Roiinpuina khan Israelhai chu a imâksan tâk a ni,” a tia.