Read Hrangkhol 1 SAMUELA 5 Bible Online

1 SAMUELA 5 - Hrangkhol bible

1 SAMUELA 5

¹Khan Filistia mihaiin Thuthung Bôm an lâk hnunga khan chu; Thuthung Bôm kha Ebenezara ata Asdod khuaa an hong chôia,

²an Dagon pathian ina an lâk lûta, Dagon irlim kôla khan an siaa.

³Khante, Asdod kho mihai kha zînga an thoiin chu, RENGPA Thuthung Bôm omna khan Dagon millim kha a khubtakin a len rîl raka. Khanchu an kaithoia, a omna hmun ngêta khan an sia nôka.

⁴Zîng nôka zînga an thoiin chu RENGPA Thuthung Bôm kôla khan Dagon millim kha a khubtakin a len rîl nôka. Hi zoro hin chu Dagon lu le a bân khampaiin kotbâi kôla khan a lei om raka; a takpum vai kha a lei om rak tâka.

⁵Khasika khan Dagon ochaihai le Dagon biak ina hong ngaihai khomin Asdod khuaa Dagon kotbâia khan atûn ten hin an ilût ngam loi a ni.

⁶RENGPA kut khan Asdod kho mihai kha a chelhai maia, siatna an tung pehaia. Asdod khua le a kôlvêlhai kha pangpo hripuiin a thohaia.

⁷Khanchu Asdod kho mihaiin khaanga om a nih ti an inhriatin chu, “Israelhai Pathian Thuthung Bôm kha ei kôla om mai ta no ri se, eini chunga le pathian Dagon chunga a kuttum thâk a nahrai ta,” an tia.

⁸Khanchu Filistia rêng ringahai kha an koibukhaia, “Israelhai Pathian Thuthung Bôm kha imo kin ilo hrang?,” an tia. Anni khan, “Gath khuaa va thak roi,” an tia. Khanchu Israelhai Pathian Thuthung Bôm kha Filistia khuaa ngêt Gath khuaa khan an va thak tâka.

⁹Khannisianlân kha khua kha an van tungin chu RENGPA kut khan Gath khua kha an buai nuai nuai tâka, a kho mihai kha a chîn ata a lian dênin kuttum an tuang nôka, pangpo hripui an lêngtir nôka.

¹⁰Khanchu Thuthung Bôm kha Filistia-hai khuaa ngêt, Ekron-a khan an thon nôka, khannisianlân kha khua kha a va tungin chu Ekron kho mihai khan, “Israelhai Pathian Thuthung Bôm kha eini le ei nâihai ni thatna hrang pialin an hong ichôi a ni,” tiin an khêk nôk sup supa.

¹¹Khanchu Filistia rêng ringahai kha an koibukhai nôka, “Israelhai Thuthung Bôm hin keini le kin in mihai a ni that irhmang zoi loina hrangin a omna hmun ngêta thonpai nôk ni ri se,” an tia. Pathianin natakin kuttum a tho sikin an kho pumpuiin an buai nôk tâka.

¹²A thi loihai kha an popa, khanchu kha kho sûnga mihai kha changpuina zongin an pathianhai an zong ta.