Read Hrangkhol 1 SAMUELA 6 Bible Online

1 SAMUELA 6 - Hrangkhol bible

1 SAMUELA 6

¹RENGPA Thuthung Bôm kha Filistia mihai rama khan tha sari a om tena chu,

²Filistia mihaiin ochaihai le tasân theihai an koihaia, “RENGPA Thuthung Bôm kha imo kin ilo ta hrang? A omna hmun ngêta thak kîr nôk hrang dân nin hril roi ba,” tiin an irdonhaia.

³Anni’n, “Israelhai Pathian Thuthung Bôm hi nin thak kîr khoma, a korongin infetir no roi, a kuang siat irbôlna thilinhlan thon sa roi, khan kêng damin nin iom hrang, khanchu itho mo a kuttum nin ituang ti inhre suak nin ti,” an tia.

⁴Mipuihai khan, “Ama kuang kin siat irbôlna inhlan hrangin imo kin itho hrang?,” an tia. Anni khan, “Filistia rêng om dôrin pangpo millim ringa le châichek millim ringa; rângachakin siam unglân; nangni le nin rênghai chunga hri lêng kha hmunkhat a ni.

⁵Pangpo millim ringa le nin ram insiattu châichek millim ringa nin isiamhai khan Israelhai Pathian kha chôiindôm roi. Khanchu nangni le nin pathianhai le nin ram kha kuttum nangni a tho ta no khom a ni thei.

⁶Aigupta mihai le Faroa lungrîl an inngar anga khan itho mo nin lungrîl nin inngar hi? Aigupta ram ata Israel mihai kha an tîrpaihai mâka chu Pathianin anni kha chanlamboiin a isiam dân kha irnghil no roi.

⁷Khasikin, atûn hin tâli thar kha sinsiam unglân, sehrâtpui hni dût sôm lai, ringkol la pêl ngai loi kha tâlia khan thung pe khak unglân, a têhai kha insûng tiang hong hruaipai pe roi.

⁸RENGPA Thuthung Bôm kha la unglân, tâlia khan bâng unglân, siat irbôlna nin inhlan rângachak thil hluhai kha bakot sûnga thunin a kôla khan se roi. Tâli kha a fena hrang lampuia irthok sianlân, a bingin infetir roi.

⁹Khanchu en chian unglân, Beth-Semes khua tiang a fe’n chu ei chunga thil saloi tak hong tung hi Israelhai Pathian itho ni a ti. Khaang khan a fe no’n chu kuttum ni thotu kha ama ni mah ti inhre suak ei ta, ei chunga a hong iom angin bê ei ti,” an tia.

¹⁰Mihai khan khaang khan an thoa, sehrâtpui a dût sôm lai inhni an hruaia, tâlia khan an khit pehaia, a têhai chu in sûnga an khum pehaia.

¹¹Thuthung Bôm kha tâlia an siaa, rângachaka siam châichek millim le pangpo millim siana bakot leh khan.

¹²Sehrâtpuihai khan Beth-Semes tiang panin an fe thal thala; inhrâm thiaiin a lampuia khan an fea, chang tiang vei tiang pêt viat mahaia, Filistia-hai rêng ringahai khan Beth-Semes ramri dên thalin an zuihai ta.

¹³Beth-Semes kho mihai khan phâizôla khan bu an lei âta, an hong irheiin chu Thuthung Bôm kha an hong hmua, an lômtak taka.

¹⁴Tâli kha Beth-Semes kho mi Josua loia khan a hong lûta; lungpui lianpa kôla khan a ngîr chiana, mihaiin tâlia thinghai kha an tuka, sehrâtpuihai kha an thata, RENGPA kuang hâlirvôm thilin an inhlana.

¹⁵Levi irchihai khan, RENGPA Thuthung Bôm le rângachak thil hlu omna bakot kha an chôia, lungpui chunga khan an siaa. Kha hnung chu Beth-Semes khuaa mihai khan kha nî sûn ngêta khan hâlirvôm thilinhlan le irbôlnahai RENGPA kuang an inhlana.

¹⁶Kha kha Filistia rêng ringahaiin an en zoiin chu, kha nî ngêt khan Ekron kho tiang an kîr nôk ta.

¹⁷Filistia mihaiin rângachak le pangpo millim ringa RENGPA kuang an siat irbôlna hranga an inhlan kha; an khopui ringahai, Asdod, Gaza, Askelon, Gath le Ekron-hai le hmunkhat ang a ni.

¹⁸Rângachak châichek millim kha, kha kho sûnga an kulpui nei le thingtâng khuaa khom tep vinga Filistia rêng ringahai khua dôr ang a ni. RENGPA Thuthung Bôm an irnghatna lungpui. Beth-Semes kho mi Josua loia om kha atûn ten hin a la iom mai a ni.

¹⁹Khan, RENGPA Thuthung Bôm sûng an en sika khan Beth-semes khuaa mihai kha a hrema, mi sômsari reng a thathaia. RENGPA’N a hremhai hrai sikin mipuihai kha a sân an kamang tâka.

²⁰Beth-Semes kho mihai khan, “Hi Pathian irthiang RENGPA makunga hin tu mo a ngîr ngam hrang? Ei kuang ata hi tuhai kuang mo ei itîr ta hrang na?,” an tia.

²¹Khaang khan Kiriath-jearim kho mihai kuang khan, “Filistia mihai khan RENGPA Thuthung Bôm chu an hong sia nôk tâka, zuang unglân, nin kuang zuang la roi,” ti hrangin mi an tîra.