Read Hrangkhol 1 SAMUELA 9 Bible Online

1 SAMUELA 9 - Hrangkhol bible

1 SAMUELA 9

¹Benjamina rama, Benjamina irchia mi inkhat, mi hrât mi huaisen inkhat hi a oma, ar hming chu Kisa a nia, kha mi kha Afia panama mi Bakoratha in sûngkuaa Zerora nâi Abiela nâipa a ni.

²Ama hin nâipasal a neia, ar hming chu Saula a nia, ruatharte hmêl sa le vânglai tak a nia, Israel mihai laia khan ama nêka hmêl sa dang zel om mahaia.

³Saula pa Kisa sakuartung senkhat an irhmanga, khanchu Kisa khan a nâipa Saula kuang khan, “Thoiin lân, ni hnungzui laia mi inkhat hruaiin lân, sakuartunghai va zonghai ro,” a tia.

⁴Khanchu Efraima tâng ramhai kha a’rfanga, Salisa ram khom a’rfang saa, khannisian hmuhai maka; khanchu Saalim ram a’rfang nôka, kha hmun khom khan sakuartunghai kha om maka. Kha zoiin chu Benjamina mihai ram an irfang nôka, khannisianlân hmu ual mahai.

⁵Zufa ram an tungin chu Saula khan a hnungzuitu kuang khan, “Tho, in sûng tiang kîr nôk ta ei ti, khano’nchu ka pa’n sakuartunghai insâp ta loiin, eini kêng a ni insâp hrang tâk,” a tia.

⁶A hnungzuitu khan, “Irngai ro, hi khuaa hin Pathian mi a oma, mi mahripom tak a ni, a insîr murdi chu a hong itung indik ngai a ni. Tho kha khan fe ei ta, sakuartunghai omna a nin hril thei duai khom a ni thei,” a tia.

⁷Saula khan a zuitu kuang khan, “Fe ta ngân inlân, imo ei ichôi pe hrang? Ei phura ite bai lak nei ta mak mea, Pathian mi kha ite lômman chôi pe hrang lak nei mak mea, imo ei irhmu ta hrang o?” a tia.

⁸A zuitu khan Saula kuang, “Tangka sum tômte chu ki la nei; hi hi pe ki ta, sakuartunghai ei hmu theina hrang lam a nin hril duai khom a ni thei,” a tia.

⁹Khante Saula khan a zuitu kuang khan, “A sa khate, tho fe ei ti,” a tia. Khanchu Pathian mi omna khua panna lam tung an hong lui laia khan, dôngmate tui chôi hranga zuanghai leh an irtonga, an kuang, “Hi hin hmutheitu mo a om?” tiin an irdona. (Matona khan chu Israelhai laia, mi’n Pathian chongpui an nuama hin chu, “Tho hmutheitu kuang fe ei ti,” an ti ngaia.

¹²Anni khan, “O, a om nin matona a lei fe chak a ni. Irhnot unglân la va phâk nin ti. Kho sûng nin hong lût le hmu zel nin ti, a vuan hin kho sûng a zuang itung a ni. A vuan hin tâng chunga maichâma mihaiin irbôlna an inhlan a ni. Kha irbôlna kha bor pêktu hrang a lei ni sikin a tung mâka chu mipuihaiin khalâi an irhîl thei loi hrang a ni. Bor a pêk zoi tena kêng an ikoihai khan an la ifâk thei ngai a ni, khasikin nin fe lata niin chu tâng chunga bu nêk hrang a fe mân hong hmu zel nin ti,” an tia.

¹⁴Khanchu Saula le a zuitu kha kho sûnga khan an fe tâka, khua an hong lûtin chu Samuela kha chubai mûkna hmun irsâng panin anni tianga hongin an hmua.

¹⁵Khan sûn khat mâna RENGPA’N Samuela kuang,

¹⁶“Nangtûk hi zoro lai taka hin Benjamina nam ata mi inkhat ni kuang hong tîr hrang ki ni, ki mi Israelhai chunga hruaitu ni hrangin sahriak lei pol ro. Ama khan Filistia mihai kut ata ki mihai inzôk a ti. Ki mihai tuangna kha ki hmu tâka, an khêk irhâi ki kuang a hong itung tâk a ni,” a tia.

¹⁷Khan, Samuela’n Saula a hmu’n chu, RENGPA’N a kuang, “En ro, hi mi chungchâng hi kêng nang ki ihril kha, ama hin kêng ki mihai chunga ircham nei a ti,” a tia.

¹⁸Khanchu Saula’n kul mikota khan Samuela kha a va pana, “Hmutheitupa in chu kho tiang mo a inih nin hril ro ba,” a tia.

¹⁹Khanchu Samuela’n Saula kha a sâma, “Keima hi Hmutheitu chu ki ni, ki maton tiang bozôl panin fe’n lân, a vuan hin ki kuang bu ni inêk hrang kêng, khan kêng nangtûk zîng nang ki infetir hrang, ni milunga om murdi khom nan hril ki ti.

²⁰Khanchu ni sakuartung sûn thum le’rhmang tâk kha ni kângindoitir ual no ro, an hmuhai nôk ta. Israelhai laia roiinpuina hi tuhai ta hrang mo a ini? Nangma le ni pa ina mi om murdihai ta hranga mo ni ma?,” a tia.

²¹Khanchu Saula’n a sâma, “Israel nam laia a chîn tak, Benjamina nama mi mo ni ma ung. Khanchu kin in sûng khom hi Benjamina nam laia a chîn tak mo ni ma. Itina mo hianga keima kuanga ni ihril hi?,” a tia.

²²Khanchu Samuela’n Saula le a sinthopuihai kha a hruaihaia, mikhual omna tentana khan a hruai lûthaia, mi an koia sômthumhai laia khan hmun roiinpui taka an toitira.

²³Khan Samuela’n bu erpu kuang khan, “Ni kuang a bingin hrê roh tia hme nang ki ipêk kha hong chôi ro,” a tia.

²⁴Khanchu bu erpu khan a malpui le a chunga hmê kha a hong chôia, Saula makunga khan a va siaa. Khan Samuela’n “En roh nangma ta hrang piala a bingin ki lei isia a ni! O ti’n lân fa ro, hi hi a zoro taka nang kin lei inkung pe a ni, mi khom ki lei fialhai ta,” a tia.

²⁵Khanchu kha ni zela khan Saula chu Samuela hai leh khan bu khalâi hmunkhatin an otsuam tâka. Khanchu bozôl ata kho sûng an fea, Samuela chu Saula leh in chunga Saula zâlna an isiam pena khan an zâl tâka.

²⁶Zînga kôl a hor sal tena chu Samuela’n Saula in chunga zâl kha a koia, “Thoiin lân nang tîr ta ki ti,” a tia. Khanchu Saula kha a thoia, Samuela leh an ruaiin an suak ta.

²⁷Khan kho kôl an zu tung tena chu Samuela’n Saula kuang khan, “Sinthotu hi ki maton tiang infetirin lân, (ama kha a fe tâka) Khannisian nangma chu la ngîr viatin lân, Pathian ata thu suak kha nang lan hril bak hi rong,” a tia.