Read Huarijio Ruuka 1 Bible Online

Ruuka 1 - Huarijio bible

Ruuka 1

¹Kúíraa, weruma teerewaeme Tiiojiroo. I'wa aamo nayewemane i'ka iyoterichio, muuwaeme ti'tijoee Riosi iintoria iyoteka mochitoriaopua, muuwaeme itapiti Riosi iintoriaopua i'ka weeechio, taamoo nane'reka mochitoapa pu'kao, yooma ti'tijoeri tetewachi ikitiame.

²Ihji ti'tijoe pukeri o'inia iyotekamea, Eesusi Riosie Weratiamechi simiyame, taamowichio toowerepua yooma Eesusi iintoria iyotetiame, pukeri o'iniachisi Riosie Weratiamee ahpo tetewiteretia, yooma pukeri o'iniachisi ahpo nayeweretiaopua tiame pukae.

³Wa'a tiiachipao neeeai, tehpe simitekapa i'yaeka i'ka ikitiameo, aamoo Tiiojiroo, weruma tiiamekopa aamoo, aamo iyotepamio orapakania waikao, nape ma'chiame chiiamepua i'kao,

⁴aamoo, nane'remichiopua i'ka Riosie Weratiamechio, yooma itapiti ikitiameopua, te'ta pichiwa wa'a tiiame ikitiamekoopua, aamo masiteriachitia.

⁵Uurea weeechi te'ta yawichikoipua Eeroreo, wa'a yasariaipu piiripi tijoe neeseriosi, isaeri tiopachi neesetoame. Ihji tijoea Sakaria tewaniame eneriaipua, Aawiasi tewaniamechi pirenaturichi neeseriosi eneriaipua. Ihji Sakaria uupiraa, Eerisawe tewaniame eneriaipua, Aaronichi o'inia ti'tijoeturichi eename.

⁶Ihji Sakariaa uupimao, na'pahka kaawe teteiwame enerepua Riosieo, kaaweruma teetoka mochitoamekapa, te'ta Riosi chiiachitia, Riosi yoorewao, ki se'wika mochitoapa.

⁷Puuua, ki tatanaeme eneriaipua, pu'ka oowitiameopua ki tanayamekopa; oowitiamea, ya'watiame enerepua wa'asi, tijoeai oochetiame wa'asi.

⁸Piire taaweo, Sakaria ahpo pirenaturi ne'neseriosichio, aaata pakimioiopua ti'tijoeriwichio iintomiaopua, iyoriwachio,

⁹Sakariachi wichirepua pakimiao, te'ta iyoriwachi cho'i moorimiaopua Riosiwichioo.

¹⁰Sakariao, yooremina ihsioio pu'ka cho'i moorekao, wa'api ma'chi itipikamea, Riosichi nayewarepua paparaka.

¹¹Wa'a yooremina ihsioiopua Sakariao, senawato wa'a weeriame tetewarepua Riosi ku'iwari, moorera chokichi weeriame ahjamina.

¹²Sakariaa, wa'a weeriame tewakapa moorera ahjaminao, tajinachurepua, tísia majakapa pu'ka tijoeo.

¹³Nape Riosi ku'iwaria chaanerepua pu'kao: —Ka'te mahja muuua. Neeea, Apoe Te'pa Kahtiamee uhjuratiamenia aamo tuuyemichioopua, aamo Riosichi itariaopua inamutiamekopapua wa'asi. Aamo uupia, taanaremerikatapua piiripi temarí, pu'ka temari aamo uupi taanaremerio, Waani tewamiatamua, wa'a aamo no'o chaanenurekapu Riosia.

¹⁴Pu'ka kuita naawasoo tisiwa peenia erakomeri eemea, ahkasi wahjachiai wa'achitia erakomeripua.

¹⁵Ihji kuita naawameria, ki oowera tijoe enemeripua Riosiwichioo. Kiisi iijiame enemeripua ihta utewaeme teekuchameoi. Ihji Waani tewapuamea, Riosi Riosiwari yahchame enemeripua, ke'chu naawaio, pukaepa itapiti yoorame enemeripua Riosiwichioo.

¹⁶Puuua, muuwaeme isaeri ti'tijoerio, ahpo Paamira Riosichi e'enapumeripua, pukachi paparaka mochitomichiopua pu'kao.

¹⁷Ihji Waania yooma ti'tijoerio, ehkoriami Eeriachitia Riosi utewarie nayewemeripua, Riosi Riosiwarie, ke'chu eenoiopua pu'ka Paamirao, ti'tijoeri masitemiaopua. Ihji Waania, ti'tijoeri weeweruma tiiarieme erakoniameo, nu'nunti tiiarieme erapaniamewichio nayewemeripua pu'kao, wa'a erapakaopua, yooreka tetewimichiopua pu'ka Paamira enameriopua masitemia.

¹⁸Sakariaa chaanerepua Riosi ku'iwario: —¿Taanaetare teemea, no'o uupio ya'watuamekoi, neeeai oochetiamepua wa'asi?

¹⁹Waikao, Riosi ku'iwaria chaanerepua: —Apoe Kaurieri neeea, Riosi kahtiachi o'inia eename. Amochi uhjuratiame neeea, i'ka peeniatiame tuuyepua, chaanemichio aamoo.

²⁰Nape ehpeo, ki ikanati pichikekapamua Riosi chiiao, ni'o itipimamua, ahkasi yooma ikiyachisi i'ka Riosi aamo chaaneriao.

²¹I'ka wa'a tiame ikiyoipua Sakariao Riosieo, ma'chi itipikame ti'tijoeria, yaapi erakoka puuyerepua: “¿Aatia ki machenaniare Sakariaa?”, chaachapaka.

²²Sakariao ahkasi machenasoopa iyoriwachio, nane'rerepua itapiti ikiriopua wa'a iyoriwachio, ki ijiyenopapua naewakao, sekaeche nayeopa pu'kao, itapiti tepoena eename tetewiriameko maaerepua.

²³Wa'a teekaopua, ahpo neeseriosi tehkiwa yorasao, no'rarepua ahpo ta'pechi.

²⁴Neipa i'kao, Sakaria uupira Eerisawe tewaniamea, petetereparepua waikao. Peteterepasaapa, ki ahka oirepua mariki meecha. Ahpo iikachio e'rarepua:

²⁵“I'ka no'o yoorare Te'pa Kahtiamea No'noa, ki suuwe eramichiopua no'oo, ki tatanatapao, apoe cheeria ihjia, noochi ikimia.”

²⁶Puhsani mechachiopua Riosia, eenechi uhjurarepua Kaurierio, nape ehpeo, Arirea weeechi, Nasare tewaniame mochiwachi.

²⁷Wa'a naewanurerepua oowitiame ahjama, Maaria tewaniame enerepua. Puuua ki neewiame eneriaipua pehjio, Oose ahjama neewimeri, ehkoriami Raawitaru tetejimarichi, naawakame.

²⁸Wa'a asisaapa Riosi ku'iwari Kaurieria, pu'ka oowitiameo, chaaneka teepoterepua: —¡Kúíra Maaria, Riosie kaawe yoratiameráa! ¡Aamo ahjama tiiame Riosía!

²⁹Riosi ku'iwarichio wa'a tiiame inamukapa Maariaa, tahpitika eraparepua, ki pahtekapa wa'a tiiame teepotario.

³⁰Nape Riosi ku'iwaria chaanerepua: —Ka'te a'chi e'ra Maariaa, kaaweruma iintomeri Riosia aamowichioo.

³¹Ki maaeme tiiaiopua, peteterepameri muuua. Pu'ka temari naawasoopua, Eesúsi tewamerimua.

³²Puuua ki nu'uti enemeripua, ahkasioi puuua Te'ta Werumara Riosio, Taanara tewapuamepua, apoe Paamira Riosia, ki nu'uti ye'kari kiameripua pu'kao, ehkoriami Raawitaru teereriachitia ye'kari.

³³Yawichi enemeripua tiameo, yooma ahkasi Aakowo tetejimarisiwachisi ye'karisiwachi, ahkasi ki seenampachisi ki wahjiame; ihji kuita yawichituniamea, ki seenampasi enemeripua, ki wahjiamesi.

³⁴Maariaa iinatukerepua waikao: —¿Nape ihtana ikika wa'a teereta neeea, ki kuunaemekai, ki neewikameai neeea?

³⁵Nape Riosi ku'iwaria nehjiarepua: —Riosi Riosiwaria, amochi enameripua, Te'pa Kahtiameraai tewekachi, amochi yasipameripua. Pukaepa naawasaapa temaria, Riosika tiiame iinuemeripua, kihtaoi a'chi tiiame, Riosi Taanara tewapuamepua tiameo.

³⁶Aamo tejima Eerisaweai, kiisi maaepori tiiaio, taanaemeripua tiameo, piiripi temari. Puuua, ki tatanatameko tuuniameai, puhsani meecha i'tonapapua peteterekao.

³⁷Wa'a ikikame puuua, ki'tiopa Riosiwichioo, ki kajume tiameo.

³⁸Waikao Maariaa, chaanerepua: —Kaawepua. Riosi nuurewarachi kahtiame neeea. Wa'a erasaa Riosia, wa'a ikitemapua noochio, pu'ka aamo chiiao. Ikaechepa Riosi ku'iwaria, no'arepua waikao.

³⁹Pu'ka taawechiamio Maaria, yaapi Uurea weeechiami akiparepua, piiripi mochiwachi roomosachiami.

⁴⁰Wa'ami simikaopua, Sakaria ta'perachi eenarepua, wa'a asiyaio ta'pechio, teepotarepua Eerisaweo.

⁴¹Eerisawea, wahka teepotame inamukapaopua Maariao, Eerisawe simaroraapua topachio, noonorepua. Pu'ka wa'apichi Riosi Riosiwariai, Eerisawechi eenarepua.

⁴²Wa'a iikapa puuua, ki nu'unti kaawe erapakao, chaacharepua: —Yomachi ooweruchio, muuukamerapua uutiameapua Riosieo, amochi naawakameo, ki nu'uti uupuamepua Riosieo.

⁴³Tísia kaawe iintoremua eenakao, tísia kaawe e'rame neeea aamo tetewapao. Cheriwema aamo eenariawichioopua, nape neeekamera enameriaipua aamo kahtiachio, aamokamera kaawe eratemiao.

⁴⁴Aamokamera kiameri tiiai neeea kaawe e'rewao, noochi kahtiame simaroo aamo teepotachanioopua, káitisia peenia erapaka noochi noonorioopua.

⁴⁵Tísia kaawe yoratiame muuua Riosieo, pichikekapa muuua aamo chaanenuretiao.

⁴⁶Wa'a chaanetiapa Maariaa, cheerepua: Noochio neeea, ki nu'utiko e'riamenia Paamirao,

⁴⁷pukachi kaawe erapasiame neeea no'o iikachio, no'o Te'pa Kahtiamechi Paamira, no'oo newipatiamechi;

⁴⁸Riosio no'oo, oowera ki weruma tiiamekoipua yorakiame, noochi ne'nepakamepua, ahpo iintomeriopua noochi, ki aaatakoipua no'oo. Ehpe waanamio yooma ti'tijoetusiamea, Riosie noochi kaawe iintotia, chaachapaka mochitomapua,

⁴⁹i'ka Riosi yomachi aampa utewariemeopua, ki nu'uti iintoriopa noochio. Tísia kaawerumakotinia pu'kao.

⁵⁰Apoe Riosia tesiwe e'riame aaatao, ahpo kaawe e'reka yooriameopua, ahjachi paparakao; pu'ka ahpo iyoriameo, cheriwiamepua pu'kao, ahkasi ihtori tijoetusiwachi.

⁵¹Apoe Riosia ahpo ki nu'unti utewarieopua, yooma ahpo weruma erakoame noonowinariao, pihtuchamepua.

⁵²Ihji Riosia ya'yawichioio, puipamepua ahpo yasirachiopua, wa'a ikisaopua pu'ka yawichiwa yasirachio, ki ahpo weruma erakoamerakamera mochiwamepua, wa'a weruma ahpo erakoame yawichi yasirachiopua, weruma te'tereparichi apechunakaopua.

⁵³Cho'chorowa e'raka ahpo iikachi Riosichi enapameopua, kaawerukamera kiatiamepua Riosieo, cheriwiamepua pu'kao. Wahjachiopua, ki tesiwa erakoka enapameopua apochio, wa'atia no'rapuamepua pu'kao, kihta cheriwesa.

⁵⁴Apoe Riosia, ku'irepua i'isaeri ti'tijoerio, ahpo seekaerachitia te'teriameopua tiameo, ki natakepaka ahpo tesiwemiaopua.

⁵⁵Riosia, pu'ka iintomeri tuuriaipua taamo ehkoriamio, aaata newipatemeri uhjuramio tuukao, yooma Auranisi o'inia tetejimarisiwichioopua, ahkasi ki wahjiamesi.

⁵⁶Maariaa, paika meechahka yasisaa Eerisawe ta'perachio, eenechi no'arepua ahpo petechio.

⁵⁷Neipao Eerisawea, pu'ka kuita naawameri asisoopua, saurepua pu'ka kuitao, temari enerepua.

⁵⁸Waikaopua, Eerisawe tetejimara waapi mochikameraa, e'enarepua waikao, kaawe e'remiaopua sauriao, tísia kaawe yooratiamekopua pu'kao, apoe Paamiraeopua Riosio.

⁵⁹Osanao taawe i'toiopua kohjao, siichitepumia i'toretupua, teewara yahchepuawichioopua, tiopachi neeseriosieopua. Wa'a teewatanioiopua neeseriosia, Sakaria tewamo o'rariaipua, wa'a teewaekopa noonorao,

⁶⁰nape yeeyeraa chaanerepua neeseriosio: —Ka'ipua, ihjia Waani tewapuamepua.

⁶¹Wa'a chiiopa Eerisaweo, tetejimaraa chaachaparepua: —¿Nape aatia? Ki'te aaataai wa'a tewaniamea, taamo tetejimachio.

⁶²Waikao, sekae iinatukerepua noonorao, aachin tewapuamekoopua pu'kao.

⁶³Waikao noonoraa iyositasaopua iyotepuachio, wa'a iyoterepua teewarao, Waani tewapuameko tuuka. Wa'a ikisoopua pu'kao, ahpo ne'nepakaopua, “naakona”, chaachaparepua.

⁶⁴Pu'ka wa'apichi Sakariaai, iiyenarepua waikao naewasika. Wa'a ikisaapua, ki nu'uti cheriwema ki'yarepua Riosio, yooma Riosi iintoriawichioopua.

⁶⁵Waikao pu'ka wa'a ikitiameopua wa'ao kuitachi simiyameo, waapiami mochikamea, ki nu'uti erakorepua Riosichio, i'ka iintoriaopua. Ahkaoi mehka ohjoemeoi Uurea weeechi tuuyeretupua i'ka ikitiameo, ahka roomosachiami ohjoemeoi.

⁶⁶Yooma i'ka nane'rekamea aatia tiiao, ahpo chaachaparepua: —¿Ihtatia enemerijuare ihji kohja temaria? Wa'a erakore puuua, Apoe Paamira Riosio, weruma teereme tiiopa kuitachiopua.

⁶⁷Sakariaa, ki nu'unti erapaka Riosi Riosiwarieopua ahpo iikachio, chaacharepua:

⁶⁸I'isaeri Paamirawa Riosio, ki nu'uti paparawa chanipuapua pu'kao, yooma ahpo mochiwachiamiopua ti'tijoeri, newipatemia eenariopa.

⁶⁹Apoe Riosia, taamowichio weerakamepua aaata, taamoo, taamo newipatemeri tuuyemichio; puuu newipatemeriaa, ehkoriami Raawitaru tetejimarichi eenamepua.

⁷⁰I'ka newipatemeri nayewaka cheerepua ehkoriamio, uhjuramio tuukao, ahpo nayewaturachiopua, ti'tijoe.

⁷¹Riosia taamo newipatemo tuuriaipua, taamo seepurawachio, taamo nekumiamechiopua tiameo.

⁷²I'ka iintowachiopua ahpo cheeriao, taamo ehkoriami cheeriaopua, pichiwa iintokamepua; kiisi natakepakamepua ahpo katewerio,

⁷³taamo ehkoriami Aurani ahjama kateweriao,

⁷⁴taamo seepurawachio, na'sonamio tuuriaopua; wa'a iintosoopua pu'kao tamochio, kihta seeweka mochitopuawichiopua, Riosichewichio yorakesikaopua.

⁷⁵Wa'a teerekao Riosio, kakupachi nokisimeri teemea, taamo iikachio kihta a'chi tiiame ki kaaweruma inatatokao, ahkasi ki seena aampasi.

⁷⁶Muuua, no'o taanaai, Te'ta Riosi Werumarawichioo, nayewatura enemerimua; pahcha teetomerira pu'kao, katewesika pooeopua, ti'tijoeri iikachi, apoe enasoopua te'ta Paamira tewekachi o'inia enameriopua, kaawe e'raka uupuaichiopua.

⁷⁷I'ka Paamirao naewameripua, tatakori cheriwemio tuuka, ti'tijoerio newipatemio tuuka,

⁷⁸ahpo nakiyae tesiwe e'riaopua. Pu'ka Apoe Paamira enasoopua, weemera ma'chirepakameka teeremapua, weemera taajenakamechitia apochio,

⁷⁹pu'ka te'ta tukapachi mochitoameopua, taajenamichiopua iikachio, apochi paparaka enapameopua, cheriweka, Riosichio ta'iria mochiwa teerepaka.

⁸⁰Puuu Waania simiterepua weripakao, epeche teetoka Riosichio, epeche teetokaopua paparaka. Ihjia, ke'chu o'iniaiopua, isaeri ti'tijoerichio nayewatukao, poanachi ohjoere puuuapu ki tijoeekachiopua pehjio.