Read Huarijio Waani 9 Bible Online

Waani 9 - Huarijio bible

Waani 9

¹Eesusia isaeri topachi machenasaapa ti'tijoeri mochikachi uumatonioio, aaata ki ma'chiriame tewitiapua wa'ao. Ihjia, wa'api teeka naawakame eneriapua.

²Waikao aaata teeme Eesusi ajawariaa, chaanekapua: —Masitari, ¿aatia tiiachipa wa'a tiiare ihjia ki ma'chirekao, ahpo yayawa tatakoririopa wa'a tiiamejuarepua, apoekosaoi tatakorikapa, wa'a tiiare puuua?

³Eesusia taamo nehjiakapua cheeka: —Ka'i. Kihta pu'ka wa'a tiiachipua, ahpo yayawa tatakoriawichiooi, apoe wa'apioi tatakoririawichiooi; nape puuua, pukachi ikitiame ne'netepuawichio ikitiamepua Riosi utewarieo, kaawe ihsiamekopua ki ma'chiriame sautekao, Riosi ahpo utewarieopua.

⁴I'ka kaaweruma yoorachitia nokisimeri teemea, no'o uhjuratiame te'ta nakiyachitia, i'ka weeechi ajatoaapua pehjio. Ki wa'a nokisisaa teeme, ki Riosi tehkiwarakamera nokisima teemea.

⁵Neeea, i'wa wehjoarichi kahtiaa pehjio, neee inisimapua tahjetosikaopua, kaawe pahtemichiopua Riosi kaaweruma tuuyewario.

⁶Wa'a chiiaipua pehjio, wehchi akachupaka wesosaopua, pu'ka tijoe puichi chuhchepakapua.

⁷Wa'a yorasaopua pu'kao, chaanekapua pu'ka ki ma'chiriameo: —Ehpeo waami aamo i'tonurepuapua Siroe tewaniachi neeroi maaniachi pusitepuapua; wa'ao, Uhjuratiame cheeka chaniwame. Waikaopu ki ma'chiriamea wa'a i'totiapa papakosaapua ahpo puichio, ma'chiriame eenarepua Eesusie ahpo uhjuratiachio.

⁸Waikao pu'ka waapi ohjoemea, wahjachi tiameopua machiyamea, ki ma'chiriame tetewikamea, ahpo chaachaparepua pu'kao: —¿Ki ihjipu tijoe, ahkaoi ihkoriwa itaka yayasame?

⁹Wahjachi ookapia chaachapariapua: —Eje'e, puuupua. Nape wahjachi pehjia chaachapariapua: —Ka'i, seenu puuua, nape wa'achi tiamepua tijoe. Nape puuu ki ma'chiriameai ma'chirepakamea, chaanerepua: —Neee puuukaitepua.

¹⁰Aapoeo waikao, chaachaparepua: —¿Achini iika ma'chiriamemua ehpeo?

¹¹Waikao ki ma'chirekamea chaanerepua: —Aaata Eesusi tewaniame iintokapua, no'o kawiyame ma'chirepatekao. Puuua, ahpo a'kae wesosapa we'eo, no'o puichio chuhchesaopua, Siroe neeroi maaniachi no'o uhjurakapua, no'o puichi papakomichioo. Wa'ao pusitesache kawiyame ma'chiriame itipikania.

¹²Waikao aapoeo chaachaparepua pu'kao: —Ehpepe puuua, ¿akana kahtipua ihsisaa? Sautetiamea nehjiarepua: —Iiná. Ki tetewakania ahka akipariachio.

¹³Waikao ookapi puuu iinatukiamea, resipuniame taawechikopa, Eesusi sautioiopua pu'ka ki ma'chireriameo, kiisi kaawe erakoriapua Eesusichio. Waikaopu tijoea, parisero pa'pamuratuamechi u'pariapua, te'ta Moisetaru nuurari ne'nesetoamechi.

¹⁴

¹⁵Waikao wa'a u'pasaopua, iinatukeriapua tijoeo, achini iikapa ma'chiriamekoopua pu'kao. Waikao ki ma'chireriai sautetiamea, chaaneriapua: —Puuu Eesusi tewaniame no'o puichi wehsara chuhchesaopua, no'o pusitemichio no'o uhjurakapua Siroe neeroi maaniachi. Wa'a iintosache, kawiyame ma'chiriame oiyamenia.

¹⁶Wa'a chiiopua, ookapi pariseroa ahpo chaachapariapua: —Puuu tijoe wa'a iintokamea, kiisi Riosichi eenamepua wa'a teesoo, kiisi iyoriamepua resipuniame taawechio. Nape wahjachi puuua chaachapariapua: —Nape, ki Riosichi eenamea, ¿iintotariarepua wa'a tiiameo, itapiti ki maaepori tiiameo? Wa'a chaachapaapua ki napati wa'achitia inatame eneriapua, pa'pamuratuamea.

¹⁷Waikao eenchi iinatukeriapua sauteriameo: —¿Aachin chaani muuua pu'ka tijoe aamo sauteriao? Waikao sautetiamea, nehjiariapua pu'kao: —Neeea, aaata Riosichi eenamekotinia pu'kao.

¹⁸Waikaopu isaeri pa'pamuratuamea, ki pichikeriaipua pu'ka tijoeo ki ma'chirerio tuuyao, aaata sautetiameoi, ahkasi yayawara paaesapa pichikeriapua.

¹⁹Ihjia yayawara paaesaopua iinatukeriapua: —¿Pichiwa ki ma'chiriame naawakame ihjipu aamo taanaa? Wa'a teerekame enesoo, ¿ihtana ikirepua?, ma'chiamepua ehpeo.

²⁰Waikao yayawaraa nehjiariapua: —Eje'e, te'ta nane'riame teemea, ki ma'chiriame naawakamekopua,

²¹nape ki nane'rena teemea aaata sauterioo, aatia tiiachipaoi ma'chiriamekopua pu'kao. Apoekamera iinatukepuapua, puichi sautetiamera, apoe nane'reme tiiamepua wa'asi, ki temarikapa wa'asi. Apoe wa'api aamo kaawe nehjiamapua, pu'ka aamo iinatukeriao.

²²Yayawaraa wa'a cheeka nehjiare puuua, parisero pa'pamuratuameo majayapa, nane'riamekapa pu'kao, Eesusi Riosichi eename sauterio tuusoo, ma'chipapuameko tuutiamekopua, napawikarichiopua wa'asi.

²³Pukaepa yayawaraa, ahpo taanakamera iinatukenureriapua ohso kaawe.

²⁴Waikao parisero pa'pamuratuamea, eenechi paaesao sautetiameo, chaaneriapua: —I'ka aamo ikiriao, Riosikamera kiapuapua cheriwemao, ihji tijoe aamo sautekamea kiisi Riosi nuurari iyoriamekopua, ki nu'uti tatakoriame.

²⁵Waikao sautekamea chaanerepua pu'kao: —Pichiwa tatakorikame enesoo aamo chaachapachitiao, neeea ki nane'riamepua pu'kao. Nape i'kache te'ta nane'riamenia, pukerio neeea, kiisi ma'chiriamekainia, ehpeo neeea kawiyame ma'chiriamenia.

²⁶Aapoeo eenechi iinatukeriapua pehji: —Nape, ¿ihtana aamo yoorarupua? ¿Achini iintorupua aamo tetewitepuawichioo?

²⁷Waikaopu sautetiamea, chaaneriapua pu'kao: —Aamo chaanekasai neeeapa. ¿Ki no'o inamukamekosa eeme? ¿Eenechi aamo chaanejerani eemea naaju? ¿Epeche kaawe nane'renariamea naaju, ahjachi paparanariapa eemeai naaju?

²⁸Wa'a chiiopao sautetiameo, pa'pamuratuamea waikao, te'yariapua chaachapaka: —Ihchiasamua pu'kao. Muuukamerapu ahjachi paparamea. Teemea, Moisetarukamera chiia oowe e'riamepua.

²⁹Pu'kakamera nane'riame teemea, Riosie nayewetiamekopapua, nape i'ka tijoeo, kiisikoi kihta nane'riame teemea, ahka machenakameo.

³⁰Waikao tijoe sautetiamea chaaneriapua pu'kao: —¡Naakonakosa! ¡Ki pahtiame eemea akana o'inia eenamekoopua Eesusio, no'o puichio sautékame?

³¹Aaataai tatakoriamea, ka'chi iika wa'a iintomeriipua, ki Riosi utewarieme enesaa. Wa'a teesoo puuu no'o sautekamea, kiisi ihta tatakoriemera puuua. Apoekamera puuu Eesusia wa'a teesoo, Riosi utewarae no'o sautekamea, puuua te'ta tewekachi No'no utewarira iinuemepua, Riosio te'ta ahpo utewario, ki oowe aaata tijoe ki'yamekoopua.

³²Aaata oowera tijoea, i'ka weee yasipariachisi o'inia, seenepioi ki inamuamepua, aaata sautiameopua, ki ma'chiriameo.

³³Wa'a tiachipao, ihji tijoea ki Riosichi eenakame enesaa, ka'chi iika iintomii puuuapu, ihtaoi i'kaka tiiame iintowao. Wa'a teesoo ma'chiame apoepua, Riosichi eename.

³⁴Waikao chaachapariapua pa'pamuratuamea: —¿Wa'a taamo chaaniame muuua? ¿Taamo masitiame muuua, tísia tatakorie pochikame naawakameai? Waikao ki ma'chiriame sautetiamea, waika o'inia u'yeretupua reesiserio, i'isaeri napawikarichi pakiniameopua.

³⁵Waikao Eesusia, pu'ka ahpo sauteria wa'a napawikarichi wa'a i'isaeri napawikarichio, ki reesiseniame inamukapaopua pakimichioo, i'yasitiapua pu'kao. Tewisaopua iinatuketiapua Eesusieo: —¿Paparame muuuapa, Riosi Tijoetukamechio?

³⁶Sautetiamea cheekapua: —¿Pukachi paparatare neeea, ki machiyameaipua pehjio? No'o tetewitepuapua pu'kao, no'o ahjachi paparamichioo.

³⁷Eesusia chaanekapua waikao: —Tetewani muuuapa pu'kao, neee puuua apoea aamo ahjama nayewame.

³⁸Waikao sautetiame ki ma'chiriamea, chaanekapua Eesusio: —¡Naakona! ¡Muuupua? ¡Eje'e, wa'a teesoo, amochi paparame neeea!

³⁹Eesusia waikao, yooma ahjama ajaka inamumichioo, cheeka nayewekapua pu'kao: —Neeea i'ka wehjoarichi eenakamenia, ti'tijoe ooweru tiame ahpo iikachi pahtetemia, aachin te'tereka mochikamekopua ahpo iikachio, Riosichi ahpo te'terewa, pukachi kaawe te'terewao ki kaawe te'terewaoi. Puuu ki ka'karumachi nokayamea, ki ma'chiriameka te'teriame puuua, puuua ki kaawe te'teriamepua Riosichio. Pu'kawichio eenakame neeea, ti'tijoe ooweru tiame ki ma'chiriameka te'teriameopua apochio, puhjemia pu'ka ki ma'chiriameka te'teriao, noochi e'enasoo ahpo tatakoriria, cheriwejerakao. Nape puuu ki ma'chiriameka te'teriameopua apochio, ki tetewamekapa puuua, ahpo ki kaawe te'teriaopua Riosichio, wa'api teeka itipimeriipua ahpo ki ma'chiriachitia.

⁴⁰Wa'a chiiopa Eesusio, ookapi pa'parisero wa'a waapi ajaka inamukamea, chaachapakapua Eesusio: —¡Naakona, ki mamachiriamekosa teemea?

⁴¹Eesusia wa'a chaachapopao, chaanekapua pu'kao: —Pichiwa ki mamachiriame maaeria enesaa eemea, aamo Riosichi ki kaawe te'terewa erakokao, noochi e'enamiipua aamo cheriwepuawichioo. Neeea waikao aamo cheriwemiipua aamo tatakoriwao. Nape eeme aamo mamachiriame erakoamea ki ka'karumachi te'teriaai, wa'api teereka itipimeri eemea ki mamachiriamechitia, aamo kiisi kaawe noonowiriachitia Riosichio, apoe Riosi tetewachio.