Read Huastec Santiago 1 Bible Online

Santiago 1 - Huastec bible

Santiago 1

¹Nana’ in Santiago tin t’ojnalil a Dios ani i Ajatic Jesucristo tu tsapnethal ax it lajuj tsab cuenel Israel buc’uc’ul c’uajil tim puhuel an tsabal. A Dios tu pithalchic i tsalpathtalab

²Ebchalabchic, in tomnal quit lej culbe tam quit tacchiquiyat c’al jant’oquitsq’ui.

³Cum a tso’obits abal a Dios ti tacchiquiyal abal ti tsu’u max a lej chubax belal. Max it tacchiquiyab ani a junini’ belale, ne’ets ca puhuey a cuxuthtal.

⁴Ca jum putat puhuey a cuxuthtal abal yabats ca más q’uibchi, ani tam ojni’ ne’ets ca tala’ cuxuy jahuaquitsq’ui tam tacchiquixtalab.

⁵Max a q’uibchalchic an tsalpathtalab ca conchi a Dios abal ti pitha’, cum pelits in ey lej pithoblix. Ne’ets ti pitha’ ani yab ne’ets ti c’uiya’.

⁶Expith ca junini’ bela’ ta ichich abal chubax ne’ets ti pitha’, cum max a ne’thal a ichich c’al i hualamtalab c’al a Dios ejtil i ja’ axi lanq’uiq’uil ani ne’thathal ju’tamits ta ca juchun an ic’.

⁷Max antsana’ a ichich, yab jant’o ne’ets quit pithan c’al an Ajatic.

⁸Axi jalc’u’ in ichich yab in ejtohual quin co’oy t’ayat mo’cathits in ichich c’al a Dios.

⁹Ca culbe an ts’ejhuantal ebchalab cum c’athpich in ey c’al a Dios.

¹⁰Ca culbe jaye an rico ebchalab aba ani’ yab jant’o in ey in ricotal c’al a Dios. Cum an rico jaye ejtil in huitsil i ts’ojol, yab u ohuel.

¹¹Tam ca calejits an thijiy c’ac’al, u bachc’unalits an ts’ojol ani u ijcanalits in huitsil. Yabats alabel. Antsana’ ne’ets ca thubat taley an rico biyat u lej t’ojlinal. An yajchictalab ani an nixoc’naxtalab c’al an hualabtalab

¹²Ne’ets cu culbe max qui cuxuy cu tacchiquiyat c’al i cuxuth ichich. Max antsana’ tu tsu’chal a Dios i ichich, ne’ets tucu pitha’ i atabilab tihua’ ti eb jant’ini’ ti bijchithits axi c’anithom c’al jaja’.

¹³Max cu nixoc’na abal cu hualbin, yab qui ulu max ja’its a Dios ax tu nixoc’nal. Yab ja, cum a Dios yab pel i nixoc’nax c’al an hualabtalab ani yab u nixoc’nab ca hualbin.

¹⁴Ja’its i cuete’ hualbith le’nomtal ax tu nixoc’nal ani tu c’ambiyal abal cu hualbin.

¹⁵C’al i hualbith le’nomtal jats tu tujel an hualabtalab, ani c’al tin ebal an hualabtalab jats tu tsemel huahua’.

¹⁶Ichich hual ebchalabchic, yab quit c’ambiyat c’al i q’uibts’oth tsalap.

¹⁷Ca tequeth tso’obna’ abal ja’its a Dios ti eb ax tu pithal patal i alhua’talab axi lej huinat alhua’ ani quithat. Ja’its jaja’ ax in ts’ejca’ a q’uicha ani a otchic ani patal jahuats im binal in tajax ti eb. Max u jalc’unal in tsap in tajax jaja’chic, a Dios iba cum ni hue’ yab u jalc’unal in ey. Ets’ey tu pithal expith jahua’ alhua’.

¹⁸Cum pelits in le’nomtal tu pithamalits i it ejattalab c’al in cahuintal axi lej chubaxtalab t’aychith ti ichich, ani xo’ pel tu oc’ox huenc’onelom c’al a Dios. Jahua’ in t’ajal jita’ chubax c’ac’nax c’al a Dios

¹⁹Ichich hual ebchalabchic, cum it it ejatlithits ca lej canat bina’ a xutsun c’al in cahuintal a Dios. Ca lej alhua’ tsalapnanchi ani ca c’aya’ olnaxnanchi an inicchic. C’al a ichich c’aya’ yab quit thubat tsacuy.

²⁰Cum yab u culbel a Dios c’al in tsacultal an inic.

²¹Expith ca t’ajat jila’ patal jahua’ yab t’ocat ani patal jahua’ quithab lej yan hua’ats teje’ ti al an hualab c’ay’lal, ani c’al i tsa’attalab ca jila’ a Dios ti t’aychi ta ichich in cahuintal ax in lej cua’al in tsap abal ti jec’ontha’.

²²Ca chubax t’aja’ jahua’ in ulal in cahuintal a Dios ani yab expith ca ats’anchiq’ui, cum max expith a ats’anchalq’ui tocat a c’ambiyal a cuete’ ichich.

²³Jitats quin ats’anchiq’ui expith ani yab quin chubax t’aja’ jahua’ in ulal in cahuintal a Dios, pel ejtil i inic axi tocat quin met’a’ in hual al i lam ani alhua’its.

²⁴Tocat in met’alq’ui ani in thubat uc’chiyal jant’ini’ tin tsu’u in hual.

²⁵Jitats yab quin uc’chiy ani quin junini’ t’aja’ jahua’ in ulal in tequeth cahuintal a Dios c’al tu hualcanthab an inic, jats axi ne’ets ca c’uajiy culbel c’al a Dios ani c’al patal jahua’ quin t’aja’.

²⁶Hualam max i tsalpayal abal u lej c’ac’nax c’al a Dios. Yab chubax ani’ max yab i hui’nal i cau axi alhua’, tocat i c’ambiyal i cuete’ ichich ani jolat i c’ac’naxtal.

²⁷Max chubax i c’ac’nal a Dios ne’ets qui tolmiy axi oth inicchic ani axi pel i tsemchith uxumchic c’al i yejenchixtalab jahua’ in cua’al. Ne’ets qui alhua’ beletna’ i ichich abal yab ca quithabme c’al jahua’ hua’ats quithab teje’ tsabal. Ja’its an lej c’ac’naxtalab axi c’al u culbel i Tata Dios.