Read Huastec Apocalipsis 15 Bible Online

Apocalipsis 15 - Huastec bible

Apocalipsis 15

¹U tsu’u ti eb junaque i jic’path tsu’bixtalab. U tsu’u buc i ángelchic ti junchic in chal buc i yajchictalab. Pelchic xe’ i taltalab yajchictalab axi a Dios ne’ets quin abchi an hualab c’ay’lal.

²Tam u tsu’u ejtil i pulic lejem jant’ini’ max pel i lam ani tsacni’ ejtil i c’amal, ani utat c’uajat yantalam i inicchic. Pelchic xe’ axi yab in c’ac’namal nixe’ xi huat’ath pulic tse’ acan ax in le’ quin t’aja’ ti dios. Yab in tuthumal in c’ualal tin tamet in t’ipoth hual, ani yab ts’o’math c’al an numero ax in le’ quin ulu pel i c’alab c’al nixe’ xi tse’ acan. In cua’alchic i arpa axi pithnenec c’al a Dios.

³In ajatnanchalchic im bij a Dios ejtil in ajatnanchamal a Moisés in t’ojnalil a Dios ti jayq’ui’ tam ti calthajits an Israelchic ti Egipto. Jaye in ajatnanchal im bij an Ajatic bijiyab jaye ti Cordero. An ajatlab u ats’a’ antse’:Tata’ ojni’ Dios pel it pulic Pay’lom. Patal jahuats ca le’na’ a ejtohual ca t’aja’.I jic’panchal am pulic t’ajbilab patal jahua’ a t’ajamal.Lej bolith ani lej chubax jahua’ a t’ajamal.A ey pel it lej Ts’ale c’al tim patal an inicchic.

⁴Cum antsana’its a ey jita’ hualam yab ne’ets ti c’ac’na’ ani ti puhuethanchi a bij.Jita’ hualam yab ne’ets ti ajatnanchi a bij.Tata’ a ey expith it t’ocat.Cum in tsu’umalits an inicchic abal bolith jahua’ a t’ajamal, jaxtam ne’ets ca utey patal am bichouchic abal ti c’ac’na’.

⁵Taley u tsu’u ti eb japq’uinal an hui’leb ti al an tiyopan in t’ocat c’uajattal a Dios.

⁶Tats tu calel xi buc i ángelchic c’al buc i yajchictalab. U tsu’u thac toltomith lej leyoyol, ani in cua’al i huic’lab oro tin ichich.

⁷Jun c’al nixe’ xi tse’ i ejattalab jahua’ tu olchits, im pitha’ ti junchic xi buc i ángelchic ejtil i lac oro. Alta in cua’al xi buc i c’ac’ath yajchictalab axi a Dios ne’ets quin abchiye an hualab c’ay’lal. Ja’its a Dios axi ejat abal ets’ey.

⁸Ani ti al nixe’ xi tiyopan ti eb u tsu’u t’uchichic c’al i pau, ax in le’ quin ulu abal a Dios in lej cua’al in tsap ani in ts’alat. Ani ni jita’ yab ne’ets quin ejtou ca otsits taja’ ma an ángelchic quin tala’ jolantha’ tsabal nixe’ xi buc i c’ac’ath yajchictalab.