Read Huli Pigane Binigo 17 Bible Online

Pigane Binigo 17 - Huli bible

Pigane Binigo 17

¹Abarama ibunaga mali henego lamaga halu pira dirani dira (99) hayagola Anduane Homogohanda ibuhondo bi ogodagua lene. I̱ Ngode Datagaliwabe Hongo Haiheore Kogoni. I̱naga tuha í̱ haabo howa i̱ninaga deni mana bayale tigabi ngaru dege biaabo halu habe.

²Ai i̱na í̱la habo nalolene bi mbira lo wialu lalu í̱naga waneigini mani dewaore ngulebero, lene.

³Ani layagola hale howa Abarama ibu ge duli hanga howa bulu paluwa dengui dindiniore ela ho bereagola Ngode Datagaliwabehanda ogodagua lamini.

⁴Áyu i̱na habo nalolene bi ogo lo werogo ai wali agali hameigini tara tara dewaorenaga mamali í̱ holebere.

⁵Anigo ai í̱naga mini Abarama ndo holebere. Í̱ hameigini dewaorenaga mamali holeberegodane ai i̱na í̱naga mini Abarahama werogoni.

⁶Mani í̱ waneigini aguaneneru ti dewa helarogola uruni aria marume handame haga kiniru haga bulebira.

⁷Í̱nilabi í̱naga aguanene mani holebiraru bababi habo nalolene bi ogoni áyu lo werogoniore wiaabobo bu wulebira. Ai habo nalolene bi ogoni ogodagua lo wero. Í̱naga Ngode Datagaliwabebi í̱naga waneigini aguaneneru tinaga Ngode Datagaliwabebi i̱ hanguore kogoni.

⁸Kenana dindi áyu kegoni bibahende hameigini mende taranaga ngagoni. Mani howa dindi ogoni bibahende í̱nibi í̱naga waneigini aguanene holebirarubi tí ngiai harogola tínaga dindi ogoniore wiaho wiaaboboore halu i̱nibi tínaga Ngode Datagaliwabe haabo holebero, lene.

⁹Ngode Datagaliwabehanda Abarahamahondo lalu, Í̱nibi í̱naga waneigini mani holebirarubi tígua i̱na habo nalolene bi lo werogo baya hangu talialu biaore bilimu.

¹⁰Habo nalolene bi lo werogo wiaabo helonaga mana agalinaga dongone poda mabu bilimu lalu langirugobi anidagua bialu haabo halimu.

¹¹Igiri galiru tinaga horo halira pedagola podalimu. Ani bialu agali tínaga garabaya biabe ale bia haga karubi igiri emene gali garabaya biabe ale bia helo walime ti tí andagaha howa taba hanararubi garabaya biabe ale bia helo tinaga dindi taraha howa agali yolo bini karubi bibahendenaga dongone podaiore halimu. Ogonidagua buleberemigo irane habo nalolene bi lo weremago mo embeda nahe manda bu wiaabo helonaga anidaguaore bilimu.

¹³Agali tara mende bu karume habo nalolene bi ogoni tigua yu wanahe manda bu haabo kamigo manane tinaga dongone podo mabu bidamigoria hondolebira.

¹⁴Ai bi ogo hale howa agali mbirame talialu bia nabiyagua nde agali ogoni ibu i̱naga habo nalolene bi ti baba lo werogo talia nabi mo wahaga kago. Agali ogonibi kago ti haru mandagi nahe dindi tara ngaruha hama puwa helo bo batagi halimu, lene.

¹⁵Ani lowa Ngode Datagaliwabehanda Abarahamahondo lalu, Ai í̱ one ibubi nde ibunaga mini Sarai wahalu ibu mini Sara wibe.

¹⁶Ainde Sara ibugua í̱naga igiri mbira taba henelo i̱na ibu biamogo bulebero. Ani berogola Sara ibunaga aguaneneru dewaore halu marume handame haga kini holebira, lene.

¹⁷Bi ogoni hale howa Abarahama ibu bulu paluwa ibugua denguime dindi ela howa ibuni oba halu mitangi bu dai buwa lalu, Agali wahe mali handari mbira heneme waneigini agua hono wuledabe. Ainde Sara ibubi mali pira dira (90) penedago ai ogonibime waneigini hono wibehedabe, lowa

¹⁸Abarahama ibugua Ngode Datagaliwabehondo lalu, Isimale ibu bayale helo handaya ho ha nabiridago, lene.

¹⁹Ani layagola Ngode Datagaliwabehanda Abarahamahondo lalu, Í̱na ogonidagua larego agi. Í̱ one Sarahanda igiri mbira taba honolebirago í̱na igiri ogoni ibu mini Aisaga wibe. I̱na ibunaga aguaneneru bababi habo nalolene bi wiaabobo bilo lo wulebero.

²⁰Ai í̱na i̱hondo Isimale biamogo bibe larigonaga nde i̱na ibu biamogo berogola ibunaga aguanenerubi dewa dege holebira. Ibunaga hameiginirunaga haguane agali homberia (12) holebiraru ai i̱na ti mo hongo holebero.

²¹Anigo i̱na habo nalolene bi ogoni Aisagala lo wulebero. Mali edegonaga horo áyu ogodaguani Sarahanda igiri ogoni taba honolebira, lene.

²²Abarahamala bi ogoni lai howa Ngode Datagaliwabe ibu Abarahama helalu pene.

²³Ani biyagola Abarahama ibugua Ngode Datagaliwabehanda bibe lalu layadagua agali damene bibahende hearunaga dongone poda mabu bini. Ibu igini Isimalenagabi agali biabe bia haga ibu andagani taba henene hearubi garabaya biabe ale bia helonaga agali marume muni tagule haru ibiyagola Abarahama ibu yolo bini biarunagabi bibahende dongone poda mabu biai hene.

²⁴Abarahamanaga mali pira dirani dira (99) heangi ibu igini Isimale ibunaga mali haleria (13) heangibi tigua libunaga dongone podabe layadagua podene.

²⁶Dongone podabe lalu Abarahamahondo horo lamiyangiore abale puwa libunaga dongone podalu,

²⁷agali Abarahamanaga garabaya biabe ale bia haga hearunagabi horo ogoningi dege poda mabu biai hene.