Read Huli Pigane Binigo 2 Bible Online

Pigane Binigo 2 - Huli bible

Pigane Binigo 2

¹Ogonidagua bialu Ngode Datagaliwabehanda dindi haribi bibahende uruniha karu ngarubi wabiai hene.

²Horo kane hayagola ibunaga biabe bibahendeore bu maro biruyane hondowa horo kaneni ibuni ha̱lo hene.

³Ibunime horo kaneore tara wubagi helowa lalu, Sarere bibahendenaga horo kane i̱ninaga ngelarogoni, lene.

⁴Horo marungi mbirale bibahende wabu helalu hayago ai horo kane ogoningi ibuni ha̱lo birulene wubagiho ngelene. Anduane Homogo Ngode Datagaliwabehanda dindi haribi wabu ngelenego

⁵dindi ogoriani dalu ibulene mbira ibugua wabia nabi wiagola ai datani irarubi mbira anda nahaga wini. Dindini tomo hongolene wali agalibi nahe dege wini.

⁶Dalu naibagago dindiha howa iba dugu daga haga biagagome dindi bibahendeni iba birai hene.

⁷Mani howa Anduane Homogo Ngode Datagaliwabehanda dindi duguwa dindi ogonime agali mbira wabini. Naina wabu ngelowa ngui harigaha buhe̱ lolene pulaanda hayagola agali biago ibu buhe̱ lolenewi hene.

⁸Ani bialu Anduane Homogo Ngode Datagaliwabe ibugua mabu mbira ni tagira ibiragohayagi Ideneni hengene. Ani buwa ibugua agali wabiyago mabu ogoniha helene.

⁹Ani helowa ibugua dindiha howa tomo anda helayagola ira lini baya dagaru mabuni andaho helene. Ira lini daga uruni bibahende bayale dege dege hene. Ai mabu dombeni haabo holene miaga ira mbira hene. Ani bialu ogoriani dege ira mende ko bayalela manda bulenenaga mabu ogoniha hene.

¹⁰Idene dindini mabu winidagoni mo bayale halu dindi mo gomba helonaga iba mbira mabu ogoniha ibilene. Iba ogoni ibu gene maria pugupugu bini.

¹¹Iba mbirago mini Pisono ogonime dindi Habila pu mabu bialu peda. Dindi Habila ogoniha ngolo dewa wialu ira ibane ngabiaga ale dewa ogoniha halu bida. Ai ege to̱le̱ dege baya tara mbira muni dewaoreme miaganego ogoni mini kaniliana lagago ogonialebi dindi ogoniha wialu bida.

¹³Iba mendego mini Gihono pedago ogonime dindi Kusi mbira ngago pu mabu bialu peda.

¹⁴Iba tebone porago mini Taigirisi ogoni ibu ni tagira ibiragohayagi Asiria dindiha pupe halu peda. Iba manego mini Yuberedisi peda.

¹⁵Anduane Homogo Ngode Datagaliwabe ibugua agali wabiyago haru puwa Idene mabu biagoha howa handaya ho helo helene.

¹⁶Ani buwa ibugua agali biagohondo lalu, Ira o karuni bibahendenaga lini do naga bibe.

¹⁷Anigo ira mbiraore ko bayalela manda bibelonaga mini dugua haga o kagonaga lini dege do noleni nadonabe. Nanabe laro do nariyagua í̱ni abaleore homolebere, lalu lamini.

¹⁸Ani lowa Anduane Homogo Ngode Datagaliwabe ibugua lalu, Ainde agali ibuni hangu holene nakarulapedago. Ibu biamogo bilonaga ibuni aleore mbirali wabuliya, lene.

¹⁹Ani lowa ibugua dindime nogo egarubi ema bialu piaga bibahende wabiniru agali biago bereagoria tinaga mini hangu hangu wigi bilo haru ibuwa helene. Ani biyagola agali biagome uruni bibahende mini wiai hene. Ema bialu piaga gabua tagiraha biragabi andagaha hinagabi ega bedarubi bibahendeore mini wiai hene. Bibahendenaga mini agali ogoni ibugua winidaruni áyu wiaabo ka. Anigo ema bialu piaga uruni aria mbiraoremebi Adamala bi te lo halu ibu biamogo bulene ibuni ale mbira nahe wini.

²¹Ani heagola Anduane Homogo Ngode Datagaliwabehanda agali biago mo paliahondo helowa agali ogoninaga kuabene kuni mbira gilila muwa dongone heneyadagua hadai bilene.

²²Ani buwa kuabene kuni biagome ibugua wali mbira wabu helowa mani agali biago hearia haru pene.

²³Agali biagome wali biago hondowa bi ogodagua lene. Agua i̱ni aleore ogonida. I̱naga kunime ibunaga kuni heneda. I̱naga tinginime ibunaga tingini hela howa Ngode Datagaliwabehanda i̱naga kuabene kunime wabiyadago. Ai i̱na ibu mini wali wero, lene.

²⁴Ani binigome mana ogobi winigo ngagoni. Agali ibugua ibu aba ai̱ya helalu ibu onela mandagi howa libu ho mbiraore holebira lenego nga.

²⁵Wali agali libu hura dambale payaburu nabi howa libu taga nahaga hene.