Read Huli Pigane Binigo 20 Bible Online

Pigane Binigo 20 - Huli bible

Pigane Binigo 20

¹Abarahama ibu Mamere dindi wahalu puwa Negebe dindiha Kadese Suala hengene wiagoria pu hene. Ani buwa mani ibu one Sara libu pialu Gera tano wiagoria anda pene.

²Ogoniha pu howa Abarahamahanda Gera wali agali bu hearuhondo lalu, Sara ibu i̱ mbalini beda, lene. Ani layago hale howa Geranaga Kini Abimelege ibunaga biabe bia haga hearuhondo lamialu lalu, Sara ibu i̱ dabu buliya haru ibule pudaba, lene.

³Ani lowa mbiraga Ngode Datagaliwabehanda Abimelege palearia ibu emagaha ha pani howa lalu, Wali o haru ibirigoni agali onego í̱ homolebere, lene.

⁴Ai Abimelege ibu Sarala mandagi palia nabi heariago ibugua lalu, Anduane Homogo-o i̱ ko mbira nabigo í̱na agali mbirame mana ko mbira nabi kagola agali ogonibi ibu damenerubi bo waholeberebe.

⁵Abarahama ibunime wali ogoni ibu mbalini lalu langiyago. Wali ogo ibuguabi Abarahama ibu mbalini lalu langia dege biya. I̱na wali ogoni damu pirudago tigabi birudalo manda bido. Kagua mbira i̱na nabi kogoni, lene.

⁶Ani layagola emagaha dege Ngode Datagaliwabehanda ladai bialu lalu, Ogoni henene. Í̱na mana tigabi wiadagua birigola i̱nime í̱ wali ogonila mandagi palia nabibelo mo habo larugoni.

⁷Wali ogoni i̱naga bi mana latagi haga agali mbira onego áyu ogoni abale dai bilabe. Ibugua í̱ homoligonaga bi la helo ani bibe. Anigo í̱na wali ogoni ibu agalini andaga daibi nalariyagua í̱nibi wali agali í̱ damene bu karubi bibahende homaiore holeberemi, lene.

⁸Ega bi layagola Abimelegehanda ibunaga agali haguane hearu olo ngoai howa Anduane Homogohanda bi lamiyago bibahende tihondo lamiai hene. Bi uruni layago hale howa ti bibahendeme giore hene.

⁹Ani howa Abimelege ibugua Abarahama olalu íbu lowa hale halu lalu, Í̱na mana ogonidagua biridagoni agiale biribe. I̱na í̱hondo agi birugonaga i̱ damenerubi i̱nibi bibahendeore pani nai holoma̱ya mo pe haribe. Í̱na mana ogonibi biridagoni tiga nabialu nabiore biridagoni, lene.

¹⁰Ani lowa Abimelege ibugua bi laabo halu lalu, Í̱na mini agua wuwa mana ogonidagua biribe, lene.

¹¹Ani layagola Abarahamahanda ladai bialu lalu, Agali dindi ogoha kamiru tígua Ngode Datagaliwabehondo gi nahaga howa i̱ one aribia halu i̱ bo waholigonaga gi haru.

¹²Bi ogoni henene dege Sara ibu i̱ mbalinigo iyanaga ai̱ya tara tara howa iya aba mbiraore hangugo nde iyane dabu bini.

¹³Ngode Datagaliwabehanda i̱naga dindi andaru i̱naga damenerubi bibahende wahai halu pobe laya handala tagira pialu howa i̱na Sarahondo ogodagua laruli, Dindi mbiraha porabago pialu howa í̱na i̱hondo mana tigabiore bulene hame lariyagua nde Abarahama mbalini bedo labe, laru, lene.

¹⁴Ani layagola Abimelegehanda Abarahama ibuni hearia Sara haru dai bini. Ani haru dai buwa ibugua nogo sibiru bulumagaru wali agali garabaya biabe ale bia hagaru dewaore Abarahama mini.

¹⁵Ani mialu howa ibugua Abarahamahondo lalu, Ai dindi o ngaruni handa. Dindi uruni bibahende i̱ninaga ngogonigo í̱ dindi uruni hobane mbiragoha hole hame lariyagua nde karulape, lene.

¹⁶Ani lowa ibugua Sarahondo lalu, Ainde mana liahe birugonaga taga domalu muni kuni siliba daosini mbira (1,000) í̱ mbalini Abarahama mule manda bido. Anidagua berogola wali agali í̱ baba mandagi haga karu tigua í̱na kagua mbira biridalo manda nabulebira, lene.

¹⁷Anduane Homogohanda Abimelege ibu damene wali berearu bibahendenaga tombeha waneigini biraga mugube mo wahayagola wali uruni waneigini taba hanabe nahe berene. Abarahama one Sara Abimelegehanda yamo haru piyagonaga Anduane Homogohanda ogoni miadai bini. Ani biyago hondowa Abarahamahanda Ngode Datagaliwabehondo bi la hayagola nde ibugua Abimelegebi ibu onebi wali garabaya biabe ale bia haga berearubi ti mo bayale howa wali urunime waneigini lone taba hanabehe berene.