Read Huli Pigane Binigo 23 Bible Online

Pigane Binigo 23 - Huli bible

Pigane Binigo 23

¹Abarahama one Sara ibu mali handari mbirani pira kirani huniane karia (127) hayagola

²ibu Kenana dindini Kiriada Araba tano mini mende Heberono laga wiagoria homene. Ani homayagola Abarahamahanda dara timbuni howa dugu bialu hene.

³Ani bialu Abarahama ibugua Sara ani tongolomu wia handala Hidiali hearu baba bi lole pene. Ani puwa ibugua tihondo lalu,

⁴I̱ dindi tarali tí baba íbu harugoni. Ani harugo ai i̱ one homayagola hora holenaga dindi mbira ibunaga homali ngelo yolo bule hameledogoni, lene.

⁵Ani hale hayagola Hidiali hearu tigua lalu,

⁶Agali haguane-o inanaga bi hale ha. Í̱ agali haguane dunini mbira kegoni laga kamagoni ndobe. Í̱ one inanaga homali bayale ngamaruha hora habelo. Ainde í̱nime homali ogoha hora hole lalu ngi laregola homali anduane kagome í̱ one ogohaore hora habelo ngulebira, lene.

⁷Ani layago hale howa Abarahama ibugua wali agali bu hearuhondo ma podalu

⁸lalu, Tígua i̱ one ogoha hora holene karulape larimiyagua nde Soha igini Eberono hale hadaba.

⁹Ani hale haramigola ibunaga homali mini Magabela Egeanda laga amu Eberono dindi gibuni mbira ngagoria hora holiya ngilo. Tígua dindi ogoni i̱ mia lalu lamilimu. Ani lameramigola i̱na tínaga deni howa dindi ogoni i̱ damenerunaga homali wiaabo helonaga ti yolo tiga tiga bulene ngadagua buliya, lene.

¹⁰Ani bialu Eberono ibunibi nde bi layaruni hale howa ti haru mandagi tanonaga pabe panga haraba wiagoria biruwa dege lalu hene. Ani berearia Hidiali bu hearu bibahende hale hai helo ibugua Abarahamahondo lalu,

¹¹Agali haguane-o i̱na bi larogo hale ha. I̱naga egeanda ogoni í̱na yolo nabibelo. Egeanda ogonibi dindi egeanda ogoriani ngarubi í̱ ngerogoni. I̱ damene bu karunaga deni howa dindi ogoni í̱ one hora habelo turu howa ngero, lene.

¹²Ani layago hale howa Abarahama ibugua wali agali bu hearuhondo ibunaga ma podalu bulu palene.

¹³Ani bialu wali agali bu hearunaga deni howa ibugua Eberonohondo lamialu lalu, Eberono-o í̱hondo bi langerogo hale habelo hameledo. Ai i̱na i̱ one dindi ogoriani hora holiya áyu í̱ yolo berogoni, lene.

¹⁴Ani layagola Eberono ibugua Abarahamahondo ladai bialu lalu,

¹⁵Agali haguane-o i̱na bi larogo nde hale ha. Dindi ogoninaga muni siliba genda magi kilo pira duria (50) hangu yolo karulapego. Ainde uruninaga galone iyame bi mbira lolene nawigo wahalu dindi ogoni í̱ halu í̱ one ogoniha hora habe, lene.

¹⁶Ani layagola Abarahama ibugua hale halu harugo lowa muni siliba tale buwa agali biyinaya biaga hearunaga siliba genda magi handagadagua ibunime Hidiali hearunaga deni howa muni siliba pira duria (50) karulape dindi biago yolo bialu Eberono mini.

¹⁷Anidagua bialu Eberononaga dindi Magabela ogoni Mamere dindi kaware dege winigo Abarahama ibu mini. Dindi ogoniha egeanda homali ogonibi dindi wiagobi ira bu hearubi Abarahama ibu hai hene.

¹⁸Horo ogoningi howa Hidiali bi lalu henedarume dindi ogoni Abarahama ibunagaore wiragoni lalu manda biai ho hene.

¹⁹Ani bialu Abarahama ibugua Kenana dindiha dindi emene Mamere wiagoha dege Magabela wiagoria ibu one Sara egeanda homali wiagoha hora hene. Dindi Mamere ogoni Heberono dindiha wini.

²⁰Ani binigo dindi ogonibi homali egeanda ogonibi Hidi hameigini tinaga ala winigo ai Abarahama ibu damenerunaga homali wia aribia hene.