Read Huli Pigane Binigo 27 Bible Online

Pigane Binigo 27 - Huli bible

Pigane Binigo 27

¹Aisaga ibu agali waheore halu de au halu mbirale handabe nahe hayagola berene. Ani biruwa ibu igini wahene Iso olowa lalu, Igini-o, layagola Iso ibu ladai bialu lalu, Ya-o i̱ kogoni, lene.

²Ani layagola Aisagahanda lalu, Ai i̱ waheore halu angi homolebe tobahe bedogonidago.

³Áyu í̱naga danda timu wiridaru yalu irabuha taya puwa nogo mbira babe.

⁴Bo yalu dai buwa tomoore dendebi i̱na noa haruligobiore dawa yalu ibabe. Eberegola i̱naga paluni bi lalu i̱ nahome howa Anduane Homogohanda í̱ biamogo bialu mo bayale helo bi lamaro bulene yidogo la holiya, lene.

⁵Aisagahanda ibu igini Isola bi ogoni lalu birayuago Lebega ibu nde haleho berene. Libu bi ogoni lai halu Iso ibu irabuha taya pole tagira pialu piyagola

⁶Lebegahanda Yagabahondo lalu, Áyu ogoningi í̱ abahanda Isohondo mbira ogodagua layuane hale haru.

⁷Nogo mbira bo yalu ibuwa dawale pu. Dawa yalu eberegola nowa nde i̱ nahome howa Anduane Homogohanda í̱ biamogo bialu mo bayale helo bi lamaro bulene yidogo la holiya, layuago hale haru.

⁸Aiore i̱ igini-o bi larogoore hale halu bibelonaga larogoni.

⁹Ai í̱ nogo pabeha puwa tomo í̱ aba ibu hame lagagobiore i̱na dawa holiya. Nogo meme igini hungubalua kira bo yalu ibule pu.

¹⁰Nogo ogoni dawa yalu poregola í̱ aba ibugua nowa nde Anduane Homogohanda í̱ biamogo bialu mo bayale helonaga bi lamaro bulene winigo lolebirago, lene.

¹¹Ani layagola Yagabahanda ibu ai̱yahondo ladai bialu lalu, Anigo Iso ibu iri dewahe halu i̱ nahedago nde

¹²abahanda i̱ ela halu karia tingini iri nahedane hondowa ibu mo hondo hole ibiridalo manda buwa ibugua Anduane Homogohondo i̱ mo ko habe lalu bi laragola i̱ biamogo bialu mo bayale naholebirago, lene.

¹³Ani layagola ibu ai̱yahanda lalu, Igini-o í̱ mini burugu nalabe. Genda mbira ibiyagua nde i̱niha ibilogo. Áyu i̱na larudagua bialu nogo meme igini hungubalua larugo bo yalu ibule pu, lene.

¹⁴Ani laya handala Yagaba ibugua nogo meme igini hungubalua biago labo bo yalu ibuwa ibu ai̱yahondo mini. Ani biyagola Lebegahanda nde Yagaba aba ibu tomo ogobiore hame lagago lowa manda bialu dawene.

¹⁵Ani buwa Isonaga aga bayale maru Lebega andagaha ngeleneyago muwa Yagaba karula hene.

¹⁶Ani karula heagola Lebegahanda Yagabanaga mabi gi kirabalibi nogo meme irini heba dongone lagalo wiyagome biadambi helene.

¹⁷Ogonidagua bia howa Lebega ibugua tomo baya dendebiore dawa wiyagobi mberedi maru hiru wia binigo Yagaba ibu yalu pelo mini.

¹⁸Miya handala ibu aba berearia yalu puwa lalu, Aba-o, lene. Ani layagola Aisagahanda lalu, Ya igini-o í̱ aibe, lene.

¹⁹Ani layagola Yagabahanda ladai bialu lalu, I̱ Iso í̱ igini wahene biagonigo. Ai í̱nime bibe larigodagua bialu tomo dendebi dawa yidogo nole heya. Nowa nde Anduane Homogohanda i̱ biamogo bialu mo bayale helonaga bi lamaro bulene labelo, lene.

²⁰Ani layagola Aisagahanda lone hale halu lalu, Igini-o í̱na nogo ogoni nde abaleore agua handa walia halu baribe, lene. Ani layagola Yagabahanda ladai bialu lalu, Anduane Homogo í̱naga Ngode Datagaliwabehanda biamogo biyagola i̱na nogo ogoni abale handa walia howa balu dawarudagoni, lene.

²¹Ani layagola Aisagahanda lalu, Ai kaware ogoria hapara halu íbu. I̱na gime ela halu í̱ i̱ igini Isooredabe be taradabe hondoliya, lene.

²²Ani layagola Yagaba ibu aba bereagoria hapara halu pu heagola Aisagahanda gime baya hanguore yahandaga bialu biruwa lalu, Í̱na bi larego Yagaba aledago í̱naga gi ge Isoda, lene.

²³Irane Yagabanaga gi meme dongoneme kabu buwa heagola Aisaga ibugua ogoda lalu handabe nahe berene. Ibu handabe nahe berenedago tene Yagabanaga gi nogo meme dongoneme kabu buwa heagola ibu gi irihe Isodalo manda bu berene. Ani manda buwa dege Aisagahanda ibu biamogo bialu mo bayale hole howa

²⁴lone hale halu lalu, Í̱ henene i̱ igini Isoore íbu kebe, lene. Yagabahanda ladai bialu lalu, E̱ i̱ Isoore, lene.

²⁵Aisagahanda lalu, Nogo dawa yaridagoni noliya ogoria yalu íbu. Nowa í̱ biamogo bialu mo bayale helo bi lamaro bulene yidogo loliya, layagola Yagaba ibugua tomo dawa yalu waini ibabi hambu yalu binigo ibu aba nelo miyagola Aisaga ibu nene.

²⁶Nai howa lalu, Igini ai kaware birapara howa i̱ nu̱nu̱ la, lene.

²⁷Ani layagola Yagabahanda ibu aba nu̱nu̱ lole birapara halu hearia Aisaga ibugua Yagabanaga aga ngahene. Ani buwa Aisagahanda Anduane Homogohondo ibu igini biamogo bialu mo bayale habe lowa lalu, I̱ iginiha nga bayale o biaruago Anduane Homogohanda mabu mbira mo bayaleore hene mbauleda, lowa lalu,

²⁸Ngode Datagaliwabehanda dadimba mbiraga ibira helaragome í̱naga maburuha tomo bibahende bayale hangu anda hai helo. Ibugua widibi waini iba berelo pu mbira mini gerebi lini delobi dewaore í̱ mabuha bayale anda hai helelo.

²⁹Ani bialu wali agali bibahende karuni í̱naga biabe biaga hai halu wali agali dindi tara tarani hagahaga bidarubi í̱ andaneha hai helo. Í̱ ai̱ya ibu waneigini aguanene mani holebiraru tibi nde í̱ andaneha hai helo. Agali marume Anduane Homogohanda í̱ mo ko helo bi lalu karu tini mo ko helo. Marume Anduane Homogohanda í̱ biamogo bialu mo bayale helonaga bi la halu karu tibi nde Anduane Homogohanda tini biamogo bialu mo bayale helo laro, lalu Aisagahanda lai hene.

³⁰Áyu ogoni dege Aisaga ibu Yagaba biamogo bialu mo bayale helonaga Anduane Homogohondo bi lalu berenego Yagaba ibu tagira pialu piyagola ibu hamene Iso irabuha taya penego dai bini.

³¹Ibuguabi nde tomo bayale dendebiore dawa yinigo ibu aba berearia yalu puwa lalu, Aba-o Anduane Homogohanda i̱ biamogo bialu mo bayale helo bi lahabelo nogo dendebiore dawa yidogo nole heya, lene.

³²Ani layagola Aisagahanda lalu, Be í̱ aibe, lene. Ani layagola Isohanda ladai bialu howa lalu, I̱ Iso í̱ igini wahene biago eberogoni, lene.

³³Ani layago hale howa Aisaga ibu mogo timbuni lowa duru lalu biruwa ogodagua hale halu lalu, Agali abale i̱ berewaria nogo bo dawa yalu ibiyadagoniore aidabe. I̱na biamogo bialu mo bayale helonaga bi lamaro bule wirugo abale lai harugo. Ai ogoni ibuha helo lalu mirudago lone mo yu daibulene nakarulape, lene.

³⁴Iso ibu abahanda bi ogoni layago hale howa dugu timbuni bialu lalu, Aba-o i̱bi nde Anduane Homogohanda biamogo bialu mo bayale helo bi lahabelo, lene.

³⁵Ani layagola Aisagahanda lalu, Í̱ hamenehanda i̱ mo hondo halu í̱ biamogo bialu bayale holenego ibu hole mo yalu piyada, lene.

³⁶Ani layagola Isohanda lalu, Áyu ogoni i̱naga paluni halu mende mo kayu biyada. Ani biyadagome ibu mini Yagaba ogoni henene tagira poragoni.[10] Aba-o ai̱yahanda i̱ ala taba henene howa wahene i̱ harugo. Ai wahenenaga henge ogoni ibu miyagola waharugoni. Áyu i̱niore biamogo bialu mo bayale helonaga Anduane Homogohondo bi lolene winigobi ibu degeme palu bialu piaruago agua binidabe. Áyu i̱ biamogo bialu mo bayale helo bi halu mende labe nahedabe. Lolene wiagua nde labehedago, lene.

³⁷Ani layagola Aisagahanda ladai bialu lalu, Ibu í̱naga haguane dabo helalu ibunaga dameneru ti ibunaga biabe biaga helo lalu helaru. Ibunaga mabuha widiru waini ibaru berelobi pu mbira lini daga mini gerebi dewa dege anda hai helo larugo ai í̱ore Anduane Homogohanda biamogo bialu mo bayale helo agialeore loabe, lene.

³⁸Ani layagola Isohanda lone dege hale halu lalu, Aba-o i̱la mo turu ho holene nde mbiraore hangubi nayiorebe. Anduane Homogohondo i̱bi nde biamogo bialu mo bayale habe lalu mbira laharene, lene. Iso ibugua ani dege lalu biruwa dugu bia timbu hene.

³⁹Ani biyago hondowa Aisagahanda lalu, Í̱ dalu dindi kaundiaha ko mbirale anda habe naheore wulebira. Mbiraga dadimbabi í̱ mabuni ibira naholebira.

⁴⁰Í̱na tomo bayale nalu í̱ni bayale holenaga wai biaga áyu tibu yuwa taya bialu wai dege bialu holebere. Ani bialu howa í̱ hamenenaga biabe bia haga holebere. Ani ha holeberego mani í̱ hamene yu wahalu í̱ni hangu ha tara holebere, lalu lene.

⁴¹Iso ibu abahanda Yagaba biamogo bialu mo bayale helo bi layiyagonaga keba timbuniore Yagabaha ho wia halu lalu, Tigimandi hangu howa i̱ aba homolebirago. Homaragola dugu andaru hai howa dara embeda kagola Yagaba bo waore holiya haro, lene.

⁴²Ibugua bi ogonidagua lalu heago Lebega hale howa berene. Ani hale howa ibugua Yagabahondo lalu, Bi ogo baya hangu hale habe. Í̱ hamene Isohanda í̱na biriruninaga ibu bu miniha tandaga timbuniore ho howa í̱ homabelo bo wahole manda bialu kago.

⁴³I̱ igini-o aiore i̱na mbira bia larogo bibelo. Áyu ogoningi Harana dindi ibida pialu i̱ mbalini Labana karia pobelo.

⁴⁴Í̱ hamenenaga bu miniha tandaga ho kago ereba halu

⁴⁵í̱na biriruni embeda hai helo tagi hole pu. Embeda ho kagola mani í̱ dai bibelo i̱na mbiralihondo damu pu lolebero. Ani larogoni tene libu kirabali nahomalibulonaga larogoni, lene.

⁴⁶Lebegahanda Aisagahondo lalu, Iso one Hidi wali libugua mana bialu kagoniore manga kogoni. Mani Yagabahanda Hidi wali kirali o bedagolabo ale dege dabu biyagua i̱ ogoria bira ndo homoleneore karulape, lene.