Read Huli Pigane Binigo 28 Bible Online

Pigane Binigo 28 - Huli bible

Pigane Binigo 28

¹Ani layagola Aisagahanda Yagaba olalu íbu lowa ibuhondo ogodagua lene. Í̱ Kenana dindi ogo wali nadabu buleore.

²Ai í̱ ai̱ya ibu aba Beduele dalu Mesobodemia pobelo. Puwa í̱ ababuni Labana wane mbira birulebirago ogoni dabu bule pobelo, lene.

³Ani lowa ibugua lalu, Ngode Datagaliwabe Hongo Haiheore Kagome í̱ biamogo bialu mo bayale howa í̱ hameigini dewali aba habelo ibugua í̱ waneigini dewaore ngilo hamelo ko.

⁴Ai Ngode Datagaliwabehanda Abarahama biamogo bialu mo bayale dege henedagua í̱bi í̱naga aguanene mani holebirarubi ti biamogo bialu mo bayale dege helo. Mani dindi ogo Ngode Datagaliwabehanda Abarahama minigo ogoni í̱ karulo habelo, lene.

⁵Aisagahanda Aramia hameigini aria agali mbira Beduele igini Labana ibu Yagaba Isola ai̱ya Lebega mbalini Harana dindini kago ogoni ibu andaga, Yagaba í̱ pole pu, lene.

⁶Aisagahanda Yagaba biamogo bialu mo bayale helo ibu Mesobodemia wali mbira dabu bule pu layiyago Iso ibu hale hene. Aisagahanda Yagaba biamogo bialu mo bayale helonaga Anduane Homogohondo bi layangi howa Yagaba ibu Kenana wali nadabu bibe layadalo manda bini.

⁷Iso ibugua manda bialu hearia ai Yagaba ibugua ai̱ya abalanaga biore hale halu Mesobodemia piyidalo manda bini.

⁸Ani biyago hondowa Isohanda ibu aba Aisaga ibugua Iso one Kenana wali berearu hame nale kagonidalo manda bini.

⁹Ani biyago hondowa Iso ibugua Abarahama igini Isimale aria wandari mbira ibu mini Mahalada Nebaiodi mbalini berenego ogoni dabu bini.

¹⁰Yagaba ibu Beaseba dindi wahalu Harana dindi pole pene.

¹¹Alendo halu mbi layagola Yagaba ibu hariga obeneni ege to̱le̱ mbira mo haguanda howa palene.

¹²Ani paluwa emaga handalu hearia egageria mbiranaga tene dindini howa nguni uyura dahuliya andagahayagi paga hearia hendene. Ngode Datagaliwabenaga dahuliyalirume egageria ogoriani iri dali bigi bialu hearia hendene.

¹³Ani hondowa handalu hearia Anduane Homogo kaware íbu howa ibugua lalu, I̱ Anduane Homogo Abarahama Aisagalanaga Ngode Datagaliwabe kogoni. Dindi áyu o padegoni í̱bi í̱naga waneigini aguaneneru ti ngulebero.

¹⁴Í̱naga waneiginiru dewaore himu dudumbu ale halu ti ho yanga lowa dindi tu ni tagira ibiragoha howa ni paliragoha polebira. Palu yanga lalu uyuraha howa palu yalu unuraha polebira. I̱na ti biamogo bialu mo bayale halu kogo hondowa wali agali dindi bibahendeni holebirarume ti nde biamogo bialu bayale holoma̱ya mo biaha lalu i̱hondo hale halu holebira.

¹⁵Ai i̱na í̱ yu wanahe í̱ poregoha i̱nime haru haabo halu mani bi o larogo tagira piai helo dindi ogoria lone haru dai bulebero, lalu Anduane Homogohanda Yagabahondo emagaha lamini.

¹⁶Yagaba ibu palenego heyuwa lalu, Aiore Anduane Homogo ogoria heneda manda nabi harudago. Heneneore ibu ogoria heneda, lene.

¹⁷Ibugua gi taraore howa lalu, Ai dindi ogo gi ho kogoni. Ogoriani Ngode Datagaliwabe andagabi dahuliya andaga harababi ogoni degeda, lene.

¹⁸Egerebalene Yagaba ibugua ege to̱le̱ haguanda howa paliyago yamuwa mani mitangi bu dai bulenenaga o biagoriani hengene. Ani buwa olibe lininaga weli ege to̱le̱ biagoria odoba halu ogoni Ngode Datagaliwabenagaore nga lowa ani bini.

¹⁹Ogonidagua buwa dindi ogoni mini Bedele wini.[11] Abale dindi ogoniha tano mbira winidagoni mini Lusi laga wini.

²⁰Yagabahanda bi heneneore mbira Anduane Homogohondo lo wialu lalu, Í̱ áyu i̱ poleberogoha baya hangu handaya ho halu hariga lu porogoha haru pialu tomo agabi ngialu

²¹nde bayale anda pialu i̱ aba dindini dai buliya handaya ho hariyagua í̱ i̱naga Ngode Datagaliwabeore holebere.

²²Áyu ege to̱le̱ ogoriani hangarugo í̱ andaga ogonioreda lalu manane o helarogoni. Ai í̱na mbirale ngerego bibahende pi halu tale buwa pinigo í̱nihondo ngigi bulebero, lene.