Read Huli Pigane Binigo 3 Bible Online

Pigane Binigo 3 - Huli bible

Pigane Binigo 3

¹Anduane Homogo Ngode Datagaliwabehanda ema bialu piagaru bibahende wabiai howa berelenego uruni ti puyame ohaga berenegobi mbira naberene. Puya ibugua wali biagohondo ogodagua hale halu lalu, Ngode Datagaliwabehanda mabuha ira lini bibahende dedaruni mbira donabe nale mbauleda, lene.

²Ani layagola wali biagome ladai bialu lalu, Iyame ira bibahende karunaga lini do nolene karulapego.

³Ibugua ira mbiraore hangu amu mabu hanuni kagonaga lini dege nado nalibu. Libu homoligo elabi nahalibu laya, lene.

⁴Ani layagola puya biagome ke̱ howa wali biagohondo ladai bialu lalu, Bi ogoni henene ndo. Libu nahomoleberabi.

⁵Libugua ira ogoninaga lini do naribiyagua libunaga de ngalalu Ngode Datagaliwabe ibuni ale dege howa ko bayaleru tale bulene miniha tagira ibai holebira ndobe. Anidagua bulebirago manda buwa Ngode Datagaliwabehanda libu ira lini ogoni nadonalibu layada, lene.

⁶Ani layagola wali biagome ira ogoninaga lini bayaleore nolene karulape dewa dearia hondowa ibu mini dewa wialu hene. Aniore buwa wali biagome manda bialu, I̱na ira lini ogoni do nowa miniru dingidangialeore biraruyagua karulapedago manda bini. Ani manda buwa wali biagome ira ogoninaga lini mbira do nalu maru ibu agalini nelo miyagola agali ibubi nene.

⁷Nai howa libunaga de ngala hayagola handalu hebira libu tibabe haribayane hendene. Ani hondowa libugua ira yuni mbalape lebumaga howa aga biagadagua buwa hene.

⁸Ani bu hebira alendo hayagola Anduane Homogo Ngode Datagaliwabe uyu mabuha ibagabu hayuago hale halu libu irabu teha puwa ha do hene.

⁹Ani hebira Anduane Homogo Ngode Datagaliwabe ibugua agali biago olowa lalu, Í̱ agoha kebe, lene.

¹⁰Ani layagola agali biago ibugua ladai bialu lalu, Í̱ mabuha ibayuago hale howa i̱ tibabe haruyagola gi howa ogoha ha do ko, lene.

¹¹Ani layagola Ngode Datagaliwabehanda ibuhondo hale halu lalu, Í̱ tibabe haruda lowa agua handaribe. Í̱ ani kegoni lalu langiyadago aiwabe. Ira lini nadonabe larugo donaribe, lene.

¹²Ani layagola agali biago ibugua ladai bialu lalu, Í̱na wali i̱ni ale dege i̱la holobaya ngirigome ira lini ogoni do ngiyagola naru, lene.

¹³Ani layagola Anduane Homogo Ngode Datagaliwabehanda wali biagohondo lalu, Í̱na ogoni biridago aginagabe, layagola wali biago ibugua ladai bialu lalu, Puyame ohowa nolenego do na layagola i̱na ira ogoninaga lini do naru, lene.

¹⁴Anduane Homogo Ngode Datagaliwabehanda puya biagohondo lalu, Áyu i̱na í̱ ha halu mo ko howa bi hongoheore laro. Genda timbuniore í̱na yulebere. Genda ema bialu piaga maru bedarume yulebiraru emene lowa í̱naga genda timbuni bolanguahe yulebere. Ai áyu ogoni howa í̱ tombeme pialu dindi himu abalu ngaru dugu naga bima piaga birulebere.

¹⁵I̱na í̱ walila mo waitigi helowa ibunaga aguanene í̱naga aguaneneru baba waitigi haabo holebira. Wali aguanene mbiru ibugua í̱naga haguane tagada hengeda haragola í̱na ibunaga ge ayuendeni hayulebere, lalu lene.

¹⁶Wali biagohondobi nde Ngode Datagaliwabehanda ogodagua lalu, Ai í̱na wali gali bere biruwa ndelaheore handalu birabelo mo ngero. Ani biruwa nde waneigini taba hanarengi tandaga timbuniore habe. Anigo uruni embeda howa í̱na í̱ agalini hame lalu biraabo howa ibu andaneha birulebere, lene.

¹⁷Ani lowa Ngode Datagaliwabe ibugua Adamahondo ogodagua lalu, Í̱na í̱ onenaga bi hale howa ira lini nadonabe larugo do naridago. Anidagua biridagonaga i̱na tomo bayuwa anda hai nahelo dindi ogo mo ko harogoni. Ani berogola tomo karulape anda helonaga horo bibahendengi erekui biabe biaabo holebere.

¹⁸Tomo hangaregola mamunali aniheru datani ko bu karu í̱ mabuha anda holebira. Ani biragola í̱na tomo bayale mbira hongowa bialu nole lo manda buwa hanga dege bialu keria poboyogo giligalalo howa hangalu holebere. Biabe ndelahe dege bialu kene í̱ homalu i̱na í̱ dindime wabirugo ai lone dindiha dai beregola í̱naga tingini dindi hodai bulebira, lene.

²⁰Adama ibugua ibu one wali agali mani dewa holebirarunaga ai̱ya birulebirago manda buwa ibu mini Iba wini.

²¹Mani howa Anduane Homogo Ngode Datagaliwabe ibugua libunaga aga bilo nogo dongoneme wabu miyagola libu ogoni karulo hene.

²²Mani Anduane Homogo Ngode Datagaliwabehanda lalu, Ai wali agalime ko bayalela manda bialu ina ale dege hayadago. Anigo iname libu haabobo holene miaga ira kagoria nahelami̱ya. Libugua ira ogoninaga linibi do nowa nahome haabobo holigo, lene.

²³Ani lowa Ngode Datagaliwabe ibugua dindi mbira wali agali biago Idene mabuha howa bo batagi halu dindi ibuni wabiyagoha biabe bialu tomoru hangalu helo pelene. Ani biyagola wali agali libugua dindi tombalu biabe bialu tomo hongolene wini.

²⁴Ibugua wali agali talia tagi howa lone dai buligonaga dahuliyali hongoherume Idene mabunaga gibuni ni tagira ibiragohayagi mamage helene. Ani buwa wai biagane ayu tibu ne gadele mbirani ira hungu bialu hego ogonime mabu bibahendeha mamage ibaga bialu helo helene. Wali agali haabobo holene miaga ira ogoni kagoria dai bulilono dahuliyali o biarubi ayu tibu ne gadele biagobi mabu ogoniha mamage haabo helene.