Read Huli Pigane Binigo 32 Bible Online

Pigane Binigo 32 - Huli bible

Pigane Binigo 32

¹Yagababi ibu damene biarubi ti harigani pole pialu hemiria Ngode Datagaliwabenaga dahuliyaliru lola hene.

²Ti ani hondowa ibugua lalu, Dindi ogoni Ngode Datagaliwabe ibu hagahadago, lowa ibugua dindi ogoni mini Mahanaima wini.

³Mani Yagabahanda agali maru tale buwa bi yalu Sia dindi mini mende Idomo mbira ngagoria ibu hamene Iso lola hole pudaba lene.

⁴Ani pialu bi ogodagua lalimu laya. Agali haguane Iso-o í̱naga biabe bia haga Yagabahanda ogodagua laya. I̱ Labanala luore howa harugo ai dai bulene hame ledogoni.

⁵I̱na nogo bulumagaru dongiru sibiru memeru dewa hinalu wali agali i̱naga biabe bia hagabi dewaore kago. Ai áyu i̱naga agali haguane-o í̱na i̱ha mini yaleyale holani nahe howa miniha dungulo habelonaga laro labe, lalu bi ogoni yalu pudaba, lene.

⁶Agali bi yalu piyarume dai bialu howa lalu, I̱name í̱ hamene Iso hearia bi yalu pirimago ai ibu harigani í̱ lola hole agali handari maria (400) heba ibira, lene.

⁷Bi ani layago hale howa Yagaba ibu gi timbuni howa mini burugulo hene. Ani howa ibugua ibunaga biabe bia haga wali agalibi nogo bulumagaru dongiru memeru sibiru kamelerubi bibahende halu kirani talebuki howa halu kirani anda bu paligi paligi bini.

⁸Isohanda ibalu wabuni mendegola wai biyagua nde wabuni mendego ibida pelo manda buwa ani talebuki hene.

⁹Ani talebu helowa Yagabahanda Ngode Datagaliwabehondo bi ogodagua lene. I̱ mama Abarahamanagabi i̱ aba Aisaganagabi Ngode Datagaliwabe-o i̱naga bi larogo hale ha. Anduane Homogo-o abale í̱na i̱hondo lalu mani i̱naga dindi dai berogola í̱na i̱ mo bayale holebero larigoni.

¹⁰I̱ agali baya biaga ndo hewaria í̱nime dara halu i̱hondo bayale dege biaabo hariligoni. Abale iba Yodana domalu Labana hearia pole pirungi i̱naga giha mbirale nayiore halimbu hangu yalu pirugoni. Ai áyu mbirale bibahende talebuki buwa wabuni kira ngelo kogoni.

¹¹I̱ hamene Isohanda wai biba loligo í̱na mamage habe lalu i̱ onene waneiginirubi bibahende bai holigonaga í̱hondo bi larogoni.

¹²Abale í̱na i̱hondo lalu, Í̱ waneigini aguanenebi daga labe nahe dewaore iba mu ngaligobi holebira, larigonidane laro, lene.

¹³Yagabahanda mbiraga palialu heyuwa egerebalene hayagola ibunaga nogo uruni maru ibu hamene Iso talebu mule manda manda bini.

¹⁴Ibugua nogo meme angibuniru handari kira (200) wangaberu pira kira (20) nogo sibi angibuniru handari kira (200) wangaberu pira kira (20) lowa helene.

¹⁵Nogo kameleru pira tebira (30) tinaga iginiru heba nogo bulumaga angibuniru pira maria (40) wangaberu pira mbira lowa talebu helene. Dongi angibuniru pira kira (20) wangaberu pira mbira tale bigibu helowa

¹⁶nogo uruni damene mbira mbira haru helonaga agali biabe bia haga mbira mbira helowa lalu, Ai tígua ala bamba halu pudaba. Pialu howa nogo ti biamagamaga nabi tini aria degedege wabuni pugupugu bilalimu, lene.

¹⁷Ani lowa Yagabahanda ibunaga biabe bia haga haguane biagohondo bi ogodagua lamini. I̱ hamene Iso í̱ harigani lola haregola ibugua í̱hondo hale halu lalu, Í̱ agali ainaga biabe biagabe. Í̱ ani pore. Nogo uruni ainaga haru kebe, laga biyagua

¹⁸í̱na ogodagua ladai bibe. Uruni í̱naga biabe bia haga Yagabanaga. Ibugua uruni í̱naga wia haya. Yagaba ibuni wene mani ibira, lalu lamibe.

¹⁹Ani lowa Yagabahanda ibunaga biabe bia haga mende tebonehondobi bi mbiraore ogonidagua dege lalimu lalu bi endeho mini.

²⁰Bi maru urunibi ladege bilimu. I̱naga biabe bia haga Yagaba ibuni maha ibira lalimu. Yagaba ibugua Iso mo gede harogola ibugua ala keba ho hayago wahalu turu howa ibu lola helo manda buwa ani bini.

²¹Nogo biarubi agali nogo haru piyarubi ti pudaba lowa ibuni horo mbira ogoningi ho palene.

²²Ogoningi dege mbiraga hayagola Yagaba ibugua ibu one kiralibi wali biabe bia haga kirali biago labobi ibu waneigini beriali (11) biarubi ti ibuwa iba mini Yabogo domade hene.

²³Domade howa edeyagi berelalu ibuni ibunaga biabe bia haga agali biaru hearia dai buwa ibunaga dabudabu yarimiru yalu ma lama pene.

²⁴Ti piyagola ibuni hangu ederayagi hondo hene. Ani hearia agali mbira iraga howa gi gungu bialu hebine ega bi lene.

²⁵Gungu bialu dege hebine agali biagome Yagaba bope habe naheyane hondowa Yagabanaga ge mendeyagi bo yolope hene.

²⁶Libu gungu bialu howa agali biagome Yagabahondo lalu, Ai ega bi layadago i̱ poliya yu peha, lene. Ani layagola Yagabahanda lalu, Í̱na i̱ biamogo bialu mo bayale helonaga bi mbira ala labe. Bi la kegola pobelo yupe holiya, lene.

²⁷Ani layagola agali biagome Yagabahondo lalu, Í̱ mini ai kebe, lene. Ani layagola Yagabahanda ladai bialu lalu, I̱ mini Yagaba kogoni, lene.

²⁸Ani layagola agali biagome lalu, Í̱na agalirubi Ngode Datagaliwabebi baba gungu bialu í̱ wayali harigodago ai í̱naga mini Yagaba wahalu í̱ mini Isaraele lolebira, lene.[26]

²⁹Ani layagola Yagabahanda lalu, Í̱ nde aibe mini langerene, layagola agali biagome ladai bialu lalu, I̱naga mini agi bule languliyabe, lowa ibugua Ngode Datagaliwabehanda Yagaba biamogo bialu mo bayale helonaga bi lene.

³⁰Ani biyagola Yagabahanda lalu, I̱ Ngode Datagaliwabe dengui hondowa ai homa nabi kogoni, lowa ibugua dindi ogoni mini Peniele wini.[27]

³¹Ni tagira ibiyagola Yagaba ibu dindi Peniele ogoni ngelalu pene. Pialu ibunaga ge tigatiga piagadagua ndo pene. Tene agi ge mendegonaga wabene dugupe hayagome ge kohe hene.

³²Ani binidago manda buwa Isaraele wali agali tigua nogonaga ge kuni mbirini nanaga winigo nga.