Read Huli Pigane Binigo 4 Bible Online

Pigane Binigo 4 - Huli bible

Pigane Binigo 4

¹Adamahanda ibu onela mandagi hebigola wali ibu gali bere berene. Ani biralu ibugua igiri mbira taba hanayagola Adamahanda lalu, Anduane Homogohanda i̱ biamogo bialu igiri mbira ngiya, lowa igiri gali biago mini Keni wini.

²Mani Keni hamene Abele taba henene. Ai libu anda howa Keni ibu mabuha tomo hangaga halu Abele ibu nogo sibi hinaga hene.

³Horo mbirungi Keni ibugua ibu mabuni tomo wiaru maru bu yalu puwa Anduane Homogohondo lomabu mini.

⁴Ani biyagola Abele ibubi nde Anduane Homogohondo mbirale bo lomabu mule nogo sibi hungubaluaore habahe nogo angibuni piganeme igini wiyago ogoniore haru halu puwa bo delene. Ani biyagola Abele ibugua nogo sibi bo lomabu miyago handalu Anduane Homogo ibu turu hene.

⁵Kenihanda tomo Anduane Homogohondo bu lomabu miyago turu nahe hene. Ani biyagola Keni ibugua keba timbuni howa ngui higi bu hene.

⁶Ani bu heagola Anduane Homogohanda Kenihondo hale halu lalu, Í̱ keba howa ngui higi bu kegoni aginaga.

⁷Í̱na mana tigabi bulene ngadagua bidele nde i̱na ogoni karulape birida larogola í̱ni turuho kelego. Ai í̱na mana ko ngaruni biridago kome í̱ mo ko hole ka. Mana kome í̱ bope halu wayali hole hame lalu kago ai í̱nabi ibu bope halu wayali hole habe lene.

⁸Mani howa Kenihanda ibu hamene Abelehondo lalu, Ainde ibaga bialu mba, lene. Ani puwa Kenihanda ibu hamene Abele bo homelene.

⁹Ani bu hearia Anduane Homogohanda Kenihondo hale halu lalu, Í̱ hamene Abele agoha kabe, layagola Keni ibugua lalu, I̱ tobara. Agua biya í̱na manda beregola i̱ hamene haru haga i̱ harudabe, lene.

¹⁰Ani layagola Anduane Homogohanda Kenihondo ogodagua lalu, Í̱na mana ko ogoni aginaga biribe. Í̱ hamenenaga darama dindini wiagome i̱hondo agali ogoni pani mia lalu dugu biyago hale harugo.

¹¹Áyu bi hongohe mbira í̱hondo ogodagua laro. Ai í̱ hamene balu homelarigonaga darama dindi ogome nelarigoni ndobe. Ani biridagonaga i̱na dindi ogonaga tomo anda holenego mo waharogola í̱na tomo hangalu nanolebere.

¹²Í̱na tomo hangariyagua dindime tomo bayale anda helo biamogo nabulebira. Ani biragola í̱naga dindi anda henene nga lene mbira nawi howa í̱ni tiga biragoha palia edede biaga holebere, lalu lamini.

¹³Keni ibugua bi ogoni hale howa Anduane Homogohondo ogodagua ladai bialu lalu, Genda í̱na áyu i̱ mo ngeregoni timbuoredago.

¹⁴Mabu e nahangabe lalu í̱ni kegoria nahe dindi kaundiaha hole pobe larida. Ani bialu i̱naga dindi anda henene mbira nawi howa i̱ni tiga biragoha palia edede biaga agali habe larida. Ani laridago nde agali mbiragome i̱ ngola hayagua i̱ homoliya bo waholobadago. Aiore gi ho kogoni, lene.

¹⁵Ani layagola Anduane Homogohanda Kenihondo lalu, Í̱na gi nahabe. Agali mbirame í̱ bayagua heneneore i̱na genda timbuniore mo mialu o bayagonaga pani agali karia homelo bolene wulebira, lene. Ani lowa Anduane Homogo ibugua agali mbirame Keni ngola howa nabelonaga manane mbira Keninaga tinginini helene.

¹⁶Ani biya handala Keni ibugua Anduane Homogo helalu dindi mbira mini Ibagadegebiaga Idene mabunaga ni tagira ibiragohayagi winigoha hole pene.

¹⁷Keni ibu onela mandagi howa wali ibu gali bere berene. Ani biruwa ibugua igiri mbira taba hanayagola igiri ogoni mini Inogo wini. Mani howa Keni ibugua tano mbira bu winigo ogoni mini ibu igini Inogonaga mini wialu Inogo dege lene.

¹⁸Mani howa Inogo igini Irada hene. Irada igini Mehuyale hene. Mehuyale igini Medusale hene. Medusale igini Lamege hene.

¹⁹Lamege ibu wali kira dabu binigo. Mbiragonaga mini Ada biralu mendego ibu mini Sila berene.

²⁰Ada ibu igini Yabala taba henenego. Yabala ogoni ibu balai andaru bia howa nogo bulumaga hinaga karunaga aguanene hene.

²¹Yabala ibu hamene Yubala henego ogoni ibu ngida ga̱wa̱ hiliyularu laga karunaga aguanene hene.

²²Mani howa Sila ibugua nde igiri mbira taba honowa ibu mini Tubala Keni wini. Igiri ogoni ibugua ege to̱le̱ boronosi aeanerume mbirale wabiaga hene. Tubala Keni ibu mbalini mbira berenego ogoni ibu mini Nama berene.

²³Horo mbirungi Lamegehanda ibu one kira biago labohondo ogodagua lene. Ada Silala-o libuore Lamege i̱ oneore bedabigonigo áyu i̱na bilarogoore baya hangu hale hadaba. Agali mbirame i̱ balu hearia i̱na ibu bo tongolo milaru. Igiri daliahe mbirame i̱ to̱a balu hearia i̱na ibu bo tongolo milaru.

²⁴Ai agali mbirame Keni homelo bayagonaga pani agali karia homelo bolene nga manda biyagua agali mbirame i̱ bayagua ogoninaga pani agali ngui laa̱i̱ bo waholene wulebira, lalu lene.

²⁵Mani howa Adama ibu onela mandagi howa wali ibu gali bere berene. Ani biruwa ibugua igiri tebone taba henene. Taba honowa wali biagome lalu, Kenihanda ibu hamene Abele bo wahayagonaga aribia halu Ngode Datagaliwabehanda igiri mbira ngiyago. Ai Abele holene winigoria igiri ogoni ibu ho aribia holebirago, lowa ibunaga mini Sede wini.

²⁶Mani Sede ibu igini mbira hayagola ogoni ibu mini Inoso wini. Ogoningi howa wali agalime Ngode Datagaliwabe mitangi bialu lotu lalu howa ibunaga mini mende Anduane Homogo lalu lotu lalu hene.