Read Huli 2 Samuele 1 Bible Online

2 Samuele 1 - Huli bible

2 Samuele 1

¹Debidibi ibunaga ami agalirubi ti Amalegealiru baba wai bialu henego dai buwa horo kiru Sigilaga tanoha pu hene. Ani pu heaha Kini Solo ibu halu nde wai halu mende Pilidialiru baba bialu hearia tigua Kini Solo waime bene homayago Debidi ibu hale nahe dege hene.

²Ani hale nahe hearia horo tebonengi igiri daliahe Kini Solo heba wai bialu henego aria mbira Solo dara howa ibunaga agaru budu bagabi bialu dongoma dindiru ibunaga haguaneni dugu hiralu Sigilaga tano anda ibini. Ibalu Debidi heagoria ibuwa Debidi geha bulu palialu kininaga mini yaraga halu ani bini.

³Ani biyagola Debidihanda igiri biagohondo lalu, Í̱ agoha howa eberebe, lene. Ani layagola igiri daliahe biagome ladai bialu lalu, I̱ Isaraeleali ami hearu heba wai hama wiagoha henego ai pora bialu ibida ibiru, lene.

⁴Ani layagola Debidihanda ibuhondo hale halu lalu, Wai bialu harimidagonaga te bibi maru hale holene hame ledogo langi, lene. Ani layagola igiri daliahe biago ibugua ladai bialu lalu, Isaraele ami agali heneru ibida piai hayagola dewaore Pilidiali hearume minalu bai haya. Kini Solobi ibu igini Yonadanabi kirabali bayagola homaya, lene.

⁵Ani layagola Debidihanda ibuhondo hale halu lalu, Libu homaya lowa agua manda bialu larebe, lene.

⁶Ani hale hayagola igiri daliahe biago ibugua ladai bialu lalu, I̱ Hari Giliboa heagoria howa handalu hewaria Solo ibugua ibunaga wai biaga yandare yiago dindini hanga howa ogoriani maliaho hearia handaru. Ani handalu hewaria ibunaga waitigi agalirume nogo hosini biralubi hosime gili laga mini karisini heyu halubi abale hapara hayane handaru.

⁷Hapara hayagola Solo ibugua beregedowa handa dai bialu hearia i̱ erembirahayagi mama ibalu hewaria hondowa i̱ olaya. Olayagola i̱na lalu, Ya agali haguane-o ladai biru.

⁸Ani ladai birugola ibugua lalu, Í̱ agohayagi howabe, layagola i̱na ladai bialu lalu, I̱ Amalegeali ko, laru.

⁹Ani larugola ibugua i̱hondo lalu, I̱naga waitigi biarume i̱ bayago ai áyu dege homo tongolo mule ngogonigo abale ibalu í̱na i̱ homoliya ba, laya.

¹⁰Ani layagola i̱na abale ibu heagoria puwa homelo bo tongolo milaru. Ani birudagoni irane i̱na manda bialu hewaria ibu yandare biagoria maliaho hayadago yu wahalu dindini ibira hayagua ibu homabehe heago hondowa ani biru. Ibu homayagola kini ibunaga tangi karuleagobi gi pagida karuleagobi uruni bibahende agali haguane í̱naga golo yahalu ibirugo ao í̱ni ngero, lene.

¹¹Bi ogoni layago hale howa Debidihanda ibunaga bu miniha genda timbuniore howa ibuninaga aga bu heago minu lerelene. Ani biyadagua Debidinaga ami hearu tiguabi nde ani dege bini.

¹²Solobi Yonadanabi Isaraele ami biarubi Anduane Homogonaga wali agali biaru bibahendeorebi waime bai hayagola tigua dara howa dugu bia dara ha bialu tomoru nane wahowa horo mbiru halu alendo hene. Waime dewaore bai hayagola tigua anidagua bini.

¹³Ani buwa Debidihanda igiri daliahe bi yalu ibini biagohondo lalu, Í̱ dindi aniali kebe, layagola igiri daliahe biagome ladai bialu lalu, I̱ Amalegealigo ai bamba i̱ aba ibu inane dindi wahalu ibuwa Isaraele dindiha ho tene heneyago kogoni, lene.

¹⁴Ani layagola Debidihanda lone hale halu lalu, Anidago í̱na agali Anduane Homogo ibunime dabalu helene biagoni bolene gi nahe baridago agua biribe, lene.

¹⁵Ani lowa Debidi ibunaga ami agali mbira heago íbu lowa lalu, Igiri ogo homelo ba, lene. Ani layagola ami biagome igiri daliahe biago ayu tibu wai biaga yu heagome dibayagola homene.

¹⁶Igiri biagonaga tingini wiago hondowa Debidihanda lalu, Í̱nime bia ko haridagonaga pani naregoni. Í̱nime latagi halu agali Anduane Homogohanda dabalu helene biago baru larigome í̱ni homedegoni, lene.

¹⁷Debidihanda dara howa dugu bialu iba gana ogo Solo ibunibi ibu igini Yonadanabi mitangi bialu lene.

¹⁸Ani lowa Debidihanda Yuda wali agali bibahendeme iba gana ogoni lo manda bilo, Lo manda biaiore halimu, lalu hongo howa lamini. Iba gana ogoni mini Waime Benegonaga Dugubi laganego mbuga mbira mini Agali Tigabirunaga Mbuga laga ngagoha gilibu nga.[1] Debidihanda iba gana ogoni ogodagua lene.

¹⁹Ina Isaraele wali agalirunaga agali haguane hayaru hari nene wiaruha homayada. Inanaga ami agali hongohe biaru homai hayada.

²⁰Gede tanohabi Asagelono tanoha hariga pedarunaga howabi bi te ogoni lalu mbira latagi nahalimu. Pilidia wali bedarume bi ogoni hale howa ti turu holigo nalalimu. Ngode Datagaliwabe mitangi nabiaga karunaga wane bedarume bi ogoni hale howa tinaga bu miniha dungulo holigo nalalimu.

²¹Ami agali hongohe biarunaga tinginibi tinaga wai biaga humbibi Hari Giliboa nene wiaruha bame wiaabo ka. Solonaga wai humbi biagobi welime baya hangu ha̱i̱ nahe ogoniha wiaabo ka. Ani bidagonaga iba dalubi mbiraga pibirabi hari nene ogoniha lone naibilo hameledo. Dindi ogoniha tomorubi bayale anda nahelo hameledo.

²²Yonadananaga dandame mbirale ko ba nabiaga gibiore wini. Solonaga wai biaga ayu tibu bame nawiaga. Wai bialu ami agali waitigi dewaore balu homelaga. Agalinaga darama dewaore ayu tibu ogoriani bu ka.

²³Solo Yonadanala libu agali bayaleore haga hene. Libuni haru mandagi haabo haga henego libuni haru mandagi dege homaribida. Ega bodo hariaweme ibunaga tomo naga ale ngagola minule abale yagalalu piagago emene nira dege lowa libugua gerai hongo howa laga hene. Libunaga hongo laiono gabua ale ndo hongo timbuniore bolanguahe hene.

²⁴Isaraele wali bedamiru-o Solohanda aga daramabi bayale tara wiago tí mo ngialu ngolome wabini yári tara tara wiarubi tí yári bilimulo mo ngiyagonaga ibu mitangi bialu dugu timbuniore bialu biralimu.

²⁵Ami agali wai biaga hongohe biaru homai hayada. Ti wai hamani homai hayadagoni. Yonadanabi homa dege bialu ibunaga tingini uyu hari nene ogoniha wiarua.

²⁶I̱naga hamene Yonadana-o í̱naga dugu bia harogoni. Ina í̱ gubalini haabo ho kogoni. Í̱nabi nde i̱ gubalini hagaore harigoni. Wandarime i̱hondo gubalini hagago dindiha lowa í̱naore i̱ gubalini timbuni ho harigoni.

²⁷Ami agali wai biaga hongohe biaru homai hayada. Tinaga wai biaga danda timu yandare yayarubi goba hai harua, lalu Debidihanda dugu bialu iba gana bi ogonidagua lene.