Read Huli 2 Samuele 14 Bible Online

2 Samuele 14 - Huli bible

2 Samuele 14

¹Seruia igini Yoaba ibugua manda bu handalu hearia Kini Debidihanda ibu igini Abasalomo hondoa howa bereago hendene.

²Ani hondowa ibugua mbiralihondo, Dindi emene mbira Tegoa wiagoha wali mbira maru bedali ale ndo mini ohewi bogabi bereago haru ibule pu, lene. Ani laya handala ibugua puwa haru dai biyagola Yoabahanda wali ogonihondo lalu, Í̱ bu miniha dara hetingi halu mbirali homedagola genda yu biragadagua birabelo hameledo. Ani biruwa dara ho ko lowa walia halu aga karulaga ale karulalu mandari kumu nabibe. Mbirali homenegonaga dara howa horo dewa halu berene biragadagua birabe.

³Ani bialu kini bedaria puwa bi i̱na ogodagua labe lalu langerogo labe, lene. Ani lowa Yoaba ibugua wali biagome kinihondo bi lamiloru ogodagua labe lalu lamiai hene.

⁴Wali biago ibugua Yoabahanda bibe lalu lamiyaru bialu ibu kini berearia pene. Puwa ibugua kininaga mini yaraga halu dindini kininaga wanakuihayagi bulu paluwa lalu, Kini-o í̱na i̱ biamogo bibelonaga íbu bedogoni, lene.

⁵Ani layagola kini ibugua wali biagohondo hale halu lalu, Í̱ha genda agi ngabe, lene. Ani layagola wali biagome ladai bialu lalu, Kini-o i̱ agalini homayagola i̱ hanguore dalo bedogoni.

⁶I̱ igini kirali henego ainde horo mbirungi libu mabuha howa libuni keba haga buwa gungu biribiya. Ani bialu hebigola mbirali libu mo hadaki bia holene naheyagola mendeali hongo bolangua hayagome ibu hamene biago bo tongolo milayiya.

⁷Ani binigo ainde áyu i̱ agalini damene bu karume i̱hondo keba timbuni halu lalu, Inanaga mana biaga wini ngadagua bialu í̱ igini ibu hamene bo wahayago ogoni ibunibi homelo bo waholoma̱ya ibilabe, lalu ka. Ani larago i̱na tinaga bi hale halu igiri ogoni pelaruyagua nde i̱ biamogo bialu handayaho holene igiri mbira naholobada. I̱naga ira dene emene dedago bo hundiaore holobada. Tigua ogonidagua biyagua nde i̱ agalini ibu damenego biba halu amolope holobada, lene.

⁸Anidagua layago hale howa kini ibugua wali biago lamialu lalu, Emene ogoninaga mini burugu nale í̱naga genda ogoni i̱na mo tiga buliya dai bule áyu andaga pu, lene.

⁹Anidagua layago lelowa wali biago ibugua lalu, Anigo i̱naga agali haguane kini-o i̱naga genda ngogo mo tiga bule hariga tara maru taya bulenego wahalu í̱na bulebererunaga pani nolene uruni i̱nibi i̱ dameneruhabi anda ibilo waha. Anigo í̱nibi í̱ one waneiginiruhabi genda nawi habelo, lene.

¹⁰Ani layagola kini ibugua wali biagohondo lalu, Mbiralime í̱ mo ko holene bi mbira layagua nde ogoni ibuni i̱ koria haru ibabe. Haru ibiriyagua nde í̱ha mo genda holene mani nawulebira, lene.

¹¹Ani layago hale howa wali biago ibugua laabo halu lalu, Kini-o Anduane Homogo í̱naga Ngode Datagaliwabenaga minini howa í̱na bi henene larogoni lalu i̱ igini mende ogoni nabelonaga lahabe. Mana lowini ngagome agali ibuni hamene bo wahenego ibu dameneme ogoni ibuni bo wahaga ngagonigoyu harugo lowa i̱ iginiore bo wanahelo laro, lene. Ani layagola Debidihanda wali biagohondo lalu, I̱na heneneore Anduane Homogo haluhe kagonaga minini howa í̱ langerogo tigua í̱ iginihondo mbirale mbira nabulebiraore, lene.

¹²Ani layagola wali biago ibugua lalu, I̱naga agali haguane kini-o i̱na í̱naga biabe biahaga bedogome í̱hondo bi mbiraore hangu loabe, lene. Ani layagola Kini Debidihanda ladai bialu lalu, Karulapego ladege bia, lene.

¹³Ani layagola wali biagome Debidihondo bi tigatiga lamialu lalu, Í̱na Ngode Datagaliwabenaga wali agali bu karuhondo mana ogonidagua biriyago agua biyane biribe. Í̱na í̱ iginiore biago waratagi halu talu pelowa haru dai nabi dege kegoni. Anidagua bu kegome bi í̱na áyu i̱hondo langirigoni podene í̱niha o dai biragoni ndobe.

¹⁴Iba hambu yinigo dindini odope hayagua lone mo yu dai bibe nahe wiralidagua ina homarimayagua lone heyabe nahe holeberemago mandabu kamagoni ndobe. Ai Ngode Datagaliwabehanda ina wali agalinaga holene bame mo wanahaga ka. Wali agali mbirago kaundiaha heagua ibugua uruni ibuni kagoria kaware haru halu dai bulene hame laga ka.

¹⁵Anigo i̱naga agali haguane kini-o wali agali bu hearu tigua i̱ mo ko holeberema layagola gi halu í̱ heria ibiru. I̱nime mandabu handalu hewaria í̱hondo hale harogola í̱na hariga taya bialu i̱ biamogo bulebere lo manda bialu ibiru.

¹⁶I̱na manda birugola í̱hondo hale haruyagua agali larugome i̱ igini iya mo ko naholobada lo manda bialu ibiru. Ibugua iya mo ko hayagua nde dindi Ngode Datagaliwabehanda ina ibunaga wali agali kamaruhondo ngini o ngagoria naholeberabada lo manda bido.

¹⁷Ani manda buwa í̱na í̱naga biabe biahaga bedogo bayale holiya biamogo bule lalu bi hongohe lolebere lo manda bialuore ibiru. I̱naga agali haguane kini-o í̱ Ngode Datagaliwabenaga dahuliyali ale kego í̱na mana bayale tigabi ogoore nga mana lehe ogoore nga lowa tale bialu baya hangu manda biai ho kegoni. Anduane Homogo í̱naga Ngode Datagaliwabe ibu í̱ heba mandagi haabo helo laro, lene.

¹⁸Wali biagome bi layaruni hale howa kini ibugua lalu, Bayale larigo ainde i̱na í̱hondo bi mbira hale harogo tigatigaore ladai bibe, lene. Ani layagola wali biagome lalu, I̱naga agali haguane kini-o karulapego i̱hondo bi hale harene, lene.

¹⁹Ani layagola Debidi ibugua hale halu lalu, Í̱na bi áyu o lareruni Yoabahanda ani lole pu laya handala lole ibiribe, lene. Ani hale hayagola wali biago ibugua ladai bialu lalu, I̱naga agali haguane kini-o i̱na heneneore gi dolalu larogo í̱na i̱hondo hale haregoni habo naleorego i̱na ogoni ndo lalu mo ke̱bi naholebero. Í̱na bi larigoni heneneore. Í̱naga ami agaliru haru haga haguane Yoabahanda anidagua lole pu laya. Ibunime bi ogodaguaore labe lalu bibahendeore endeho ngiya handala í̱hondo langule ibinigo larugoni.

²⁰Anigo í̱naga ami haru haga Yoaba ibugua bi ogoni bame ndo Abasalomonaga genda ngago mo waholenaga laya. Anigo i̱naga agali haguane-o í̱ Ngode Datagaliwabenaga dahuliyali ale mini mandala bogabiore howa í̱na dindini bialu karu ogoale bira lalu manda biaihe kegoni, lalu wali biagome lai lene.

²¹Mani wali biago ibu tagira peaha Debidihanda Yoaba íbu lowa lalu, Í̱na manda biridagoni karulape laro. Ai Abasalomo damu pialu haru daibule pu, lene.

²²Ani layagola Yoabahanda kini wanakuini bulu palialu denguime dindi ela halu kininaga mini yaraga halu lalu, I̱naga agali haguane kini-o Ngode Datagaliwabehanda í̱ mo bayale helo hameledo. I̱na í̱hondo bi hale harugo e̱ laridago nde í̱naga biabe biahaga i̱ kogohondo turu ho kedalo manda bido, lene.

²³Ani lalu Yoaba ibu heyalu abale Gesua tano puwa Abasalomo haru halu Yarusaleme dai bini.

²⁴Ani haru dai biyagola kini ibugua lalu, Abasalomo ibu kini andaga naibilo ibuni andaga hayadagoha holene nga, lene. Ani layagola nde Abasalomo ibu kininaga dengui hondole ibu heagoha nape ibuni andaga haabo hene.

²⁵Abasalomo ibu huliya igiri baya dege lalu do mbaraleni ibuha dere motudubi mbira nawi hene. Isaraele dindiha huliya igiri baya ibu ale mende naheyagola Isaraele wali agali tigua Abasalomo hondole turu timbuni haga hene.

²⁶Ibunaga mandari lu timbuni palango toheore hene. Mali mbira poragola ibunaga mandari ogoni podaganego genda magi handalu karia kilogarama kira ale wiaga.

²⁷Abasalomo ibu wali dabu binigo ibu igini tebira wane mbira berenego wanedago ogoni mini Tama berene. Wandari ogoni agali wanela tabetabe nabi baya taraore berene.

²⁸Abasalomo ibu dai buwa mali kira Yarusalemeni daibu howa ibu kininaga dengui nahende haabo hene.

²⁹Ani howa ibugua Yoabahanda kini hondole pelonaga ibu andaga ibabe lalu lawia hayagola Yoaba ibu naibi haabo hene. Ani biyagola Abasalomo ibugua Yoaba ibabe lalu bi halu mende lawia hayagobi Yoaba ibu naibi dege hene.

³⁰Naibu dege biyagola Abasalomo ibugua keba timbuniore howa ibunaga biabe biahaga agali hearuhondo, Yoabanaga balawa wabiaga mini bali mabu mbira ibuni mabu wiagoria dege mandagi handa a̱i̱ na̱i̱ winigo ogoni delo bo heda hole pudaba, lene. Ani layagola agali biabe biahaga hearume hale halu Yoaba mabuha bali heago delo bo heda hene.

³¹Anidagua biya layago hale halu Yoaba ibu Abasalomo andaga puwa lalu, Í̱naga biabe biahaga agali hearume i̱ mabuha bame bali hengewago dai helayadago irane aginagabe, lene.

³²Ani layagola Abasalomohanda ladai bialu lalu, I̱na í̱ ibabelo hondo pudaba larugola í̱ naibiriyago ai i̱naga bi ogo kini bedaria yalu pobelo hameledo. Pialu howa i̱ Gesua dindiha pu hewago haru dai birimigo agi bulenaga Yarusaleme haru dai birimibe. I̱ Gesua dindiha henedale nde bayale kolego áyu ogoni kini abale hondole pu. Ibugua handalu karia i̱ha ko mbira ngane hondo heagua nde i̱ homoliya bo wahelo laro, lene.

³³Ani laya handala Yoaba ibugua kini berearia abale puwa Abasalomohanda bi layaruni bibahende kinihondo lamiai hene. Ani lamiai hayagola kini ibugua agali bu hearuhondo, Abasalomo haru ibule pudaba, lene. Tigua haru ibiyagola Abasalomohanda kininaga mini yaraga halu kininaga wanakuihayagi bulu palialu dindini palipe hene. Ani biyagola kini ibugua ibu nu̱nu̱ lene.