Read Huli 2 Samuele 22 Bible Online

2 Samuele 22 - Huli bible

2 Samuele 22

¹Debidi ibu Solohanda bo waholene wiyangibi ibunaga waitigi maru hearume bo waholene wiyangibi Anduane Homogohanda mo wahaga biyagonaga turu howa ibugua Anduane Homogohondo iba gana ogodagua lene.

²Anduane Homogo ibuni i̱naga wai pabe hongoheore kagoni. Ibu ege to̱le̱ ale howa i̱ ho gehalu waitigirunaga giha howa i̱ mo wiaga ka.

³I̱naga Ngode Datagaliwabe ibu i̱naga ha do haga. Ibu hari nene ngaligobi kagoha i̱ pialu ibuha ha do haruli. Anduane Homogo ibu i̱naga humbi howa i̱ hapai haga ka. Ibugua i̱ mo wialu handayaho holene hongo karulapeore kagoni. Ibu i̱naga wai pabebi i̱naga ha do andabi ibuni hangu ka. I̱naga waitigirume i̱ minalu bolebiragola i̱ biamogo bialu mo wiaga ibuniore kagoni.

⁴Anduane Homogonaga mini yaraga hami̱ya. I̱na ibu olalu haruli. Ibugua hale halu i̱ biamogo bialu i̱naga waitigirunaga giha howa i̱ mo wiaga kagonaga iname ibunaga mini yaraga holene nga.

⁵Iba solowarame yaribu timbuni tanguialu tita̱la amu nana biagadagua bialu homolene pume dariba haradagua i̱ dariba hayagoni.

⁶Homolene dameneme i̱ mabu bupe howa pume dariba haradagua biyagoni. Homalime i̱ minule mandabu hayagoni.

⁷I̱naga miniha genda ho howa Anduane Homogo olalu harugoni. I̱naga Ngode Datagaliwabehondo i̱ biamogo bia lalu harugoni. Ibuni andaga howa i̱naga bi hale haya. Ibuhondo i̱ biamogo bia larugo hale hayagoni.

⁸Ngode Datagaliwabe ibugua keba timbuni howa dindi mo dumbirumbi bilaya. Dindi hari timbuni wearu mo ema bia hayagola ema bia gimbu biya.

⁹Anduane Homogonaga ngui harigaha howa ira hagua tagira ibalu ne harigaha howa ira hungu datagitagi biyagome mbirale wiaru bibahende do mundu laya.

¹⁰Ibugua hari daliga buda edene bialu daliape haya. Daliape hayagola hari beraliba mindibi ibu geha hai haya.

¹¹Ibunaga dahuliyali mbiranaga erekunini biralu yagalalu dalipe haya. Puyabu ega babagane aleheme ibu yalu abaleore daliape haya.

¹²Aruma holeneme ibu dambi hai haya. Hari beraliba mindibigome ibuni ho ge hayagoni.

¹³Ibuha howa wá timbuni wá hatagi halu hari daba ira hungu dalu heaore ba tagitagi biya.

¹⁴Anduane Homogo ibuni hari daligaha howa bi hongo howa hari kilikulu laradagua biayua. Ngode Datagaliwabe Hongo Haiheore kagome bi layuago hale hene.

¹⁵Ibugua ibunaga timu edalu ba amunana biyagome waitigi purogo laya. Hari dabame bayagola ti ibida bilibulu piai haya.

¹⁶Anduane Homogohanda ibunaga waitigi hearuhondo keba hayagome puyabu hongohe ale howa ti puloyu purogo laradagua biya. Iba solowara timbuni bereago hundiai hayagola dindi andaneha gene wiyago bame ha pana ho haya.

¹⁷Anduane Homogo ibu daligaha howa gi yupe halu i̱ minu yania haya. Iba solowara timbuni bereagome i̱ dambi hearia ibugua i̱ gini miya.

¹⁸I̱naga waitigi hongoheore hearunaga giha hewaria ibugua ibuninaga gime i̱ mo wiya. Agali marume i̱ handabe manga ho hearu i̱na ti bo podabe nahe hewariabi ibugua i̱ mo wialu haru dai biya.

¹⁹Bamba i̱ha genda ngelo hewangi tigua i̱la wai bule ibiya. Ani ibiyagoyu Anduane Homogohanda i̱ handayaho haabo hayagoni.

²⁰I̱ homolene wiagoha kaware hewaria ibugua i̱ biamogo biya. Ibugua i̱ gubaliniore ho kagome i̱ gini minigo ko.

²¹I̱na mana bayale tigabi wiaru talialu bialu hewago hondowa Anduane Homogohanda i̱hondo bayaleore biaga. I̱na mana ko mbira nabi hewago hondowa ibugua i̱hondo mana bayale biaabo haga ka.

²²Anduane Homogonaga mana tigabi ngaru i̱na taluwa bialu harugoni. I̱na i̱naga Ngode Datagaliwabe erembira mialu mana ko wiaru nabi harugoni.

²³Ibunaga bi mana lo ngaru i̱na baya hangu talialu bialu haru. Ibugua bia layadagua i̱na mo wa nahe biaabo haruli.

²⁴I̱na ibu deni howa ko mbira nabiorego ibu manda bu ka. I̱na mana ko mbira buli lowa i̱ni ibagabu harugoha mamage haluore haruli.

²⁵Ibugua i̱na mana bayale tigabi wiaru talialu bialu hewago hondowa i̱na mana ko mbira nabi hewago hondowabi Anduane Homogohanda i̱hondo bayaleore biaga.

²⁶Anduane Homogo-o mbiralime í̱ wahalu nape talima ibalu heagua í̱nabi nde ogoni ibu yu wahalu napiaga ke. Mbiralime ko mbira nabiaga howa ibuha ko nawi heagua nde í̱nabi ogoni ibuhondo mana bayale biadai biaga kegoni.

²⁷Mbiralime mana tigabi dege biaga heagua í̱nabi nde ogoni ibuhondo mana tigabi dege biadai biaga ke. Anigo mbiralime mana ko biaabo haga heagua í̱na ibuhondo handabe manga haga kegoni.

²⁸Wali agali tini mo dindiha haga karu í̱na ti biamogo bialu haru dai biaga ke. Wali agali maru tini mo dunini howa mine haga karu í̱na ti mo dindiha haga kegoni.

²⁹Anduane Homogo i̱naga wá hagane haleore í̱ kegoni. I̱ arumaha kogola í̱na aruma holene mo wahaga kegoni.

³⁰I̱na waitigi bu karu bope halu wayali holiya í̱na i̱ hongo ngiaga ke. I̱na waitiginaga tano ngaruha ege pabe hongohe timbuni karu pogola anda poliya í̱na i̱ hongo timbuniore ngiaga kegoni.

³¹Ngode Datagaliwabe ogoni ibunaga mana baya buruguleore biai haga ka. Ibugua bi laragobi heneneore dege laga ka. Ibunime wali agali waitigi handalu ibida porarunaga humbi kago ti bibahende ibuha ha ge hai haga ka.

³²Anduane Homogo ibuni hangu Ngode Datagaliwabeore kagoni. Inanaga ha do holene anda ege to̱le̱ ale hongohe Ngode Datagaliwabe ibuni hanguore ka.

³³Ibugua i̱naga ha do anda hongoheore kagonigo i̱ ibaga bu koria ibugua hariga bayale mo tiga biaga ka.

³⁴Ibugua i̱ nogo gabua mini dia ibagabu poralidagua pialu holiya i̱ handayaho haga ka. Hari nene ngaruha pialu koria ibugua handayaho kagome i̱ pi nalaga ko.

³⁵Ibugua i̱ wai bulene biawai haragome danda boronosime wabini hongoheore hibuhe ngago i̱na edalu babehe kogoni.

³⁶Anduane Homogo-o i̱naga waitigi hearunaga giha hewaria í̱naga humbi i̱hondo ngirigola i̱ wayali harugoni. Í̱na i̱ biamogo birigome i̱ wali agali karunaga deni agali mini leneore kogoni.

³⁷Í̱na hariga bayale mo wirigome i̱ porogoha i̱naga ge gondo lalu pi nale bayale kogoni.

³⁸I̱na waitigi hearu talima pialu minu yania hai haruli. I̱na ti talima pugu pugu bialu ti baiore hole wahalu dai nabi haruligoni.

³⁹I̱na ti bogaiore hewagola homo ibira hai haga. Ibira halu i̱naga geha wiai howa lone heyabe nahe wiaga.

⁴⁰I̱na waitigi baba wai buliya í̱nime hongo ngirigoni. Í̱na i̱ biamogo birigome i̱naga waitigi hearu i̱na ti bo podahana hai harugoni.

⁴¹I̱ waitigi biaru i̱ handalu ibida purogo lelo í̱na mo bia hari. I̱na i̱ handabe manga haga hayaru bo wahai harugoni.

⁴²Uruni ti mbiralime pele milo agali maru taya biyagoyu ti biamogo bulene mbira handa walia naheya. Tigua ti biamogo bilo Anduane Homogo olayagoyu ibugua tinaga bi hale nahaya.

⁴³I̱na ti bo tagadabaga biwagola ti be abalu ale howa dindini wini. Ba dege bialu bo hengeda halu hariga teneni waru wiraligobi haya.

⁴⁴Wali agali ko hearume i̱ bo waholilono í̱na abale ibalu i̱ biamogo biri. I̱na wali agali hameigini tara tara bu hearu handayaho holiya í̱na i̱ dabo helarida. Wali agali tara tara i̱na nahendene hearu áyu i̱ andaneha íbu hai ka.

⁴⁵Wali agali dindi taraha íbu hene karume i̱naga wanakuiha ibalu ge duli hanga haga ka. Tigua i̱na bi larugola abale hale halu i̱ talima ibaga.

⁴⁶Tinaga hongo ibira howa tigua tano wai pabe hongohe hearu wahalu tini duru lagalaga bima i̱ hewaria ibaga.

⁴⁷Anduane Homogo ibu haluheore kagoni. Ibu i̱naga ege to̱le̱ ale hongohe kago ibunaga mini yaraga hami̱ya. Ngode Datagaliwabe hongoheore ogoni ibu i̱ pele ngiaga kagonigo ibunaga mini timbuni yaraga haabo hami̱ya.

⁴⁸Ibugua i̱ biamogo bialu waitigi hearu bope halu i̱ mo wayali haga ka. Wali agali hameigini dindi tara tarani hearu i̱ andaneha helai haga ka.

⁴⁹Ibugua i̱naga waitigiru giha hewaria i̱ biamogo bialu i̱ mo wiaga ka. Anduane Homogo-o í̱na i̱ pele ngialu i̱naga waitigiru mo dindiha helalu i̱ mo wayali helarigoni. Í̱na agali bo wahaga bu hearume i̱ bo wahole biyaria i biamogo birigoni.

⁵⁰Anidagua birigonaga i̱na wali agali hameigini tara tara karunaga deni howa í̱naga mini yaraga holebero. I̱na í̱naga mini yaraga halu iba gana lolebero.

⁵¹Anduane Homogohanda Debidi i̱ kini dabo helayago i̱naga waitigiru bope holiya i̱ mo wayali helaga ka. Ibugua i̱niore kini dabo helene kogohondo gubaliniore haabo haga kagoni. I̱naga waneigini aguanene mani holebiraru tihondobi ibugua gubalini ho haabo holebira, lalu Kini Debidihanda iba gana ogoni lene.