Read Huli 2 Samuele 7 Bible Online

2 Samuele 7 - Huli bible

2 Samuele 7

¹Isaraele wali agalirunaga waitigi hearume ti baba wai nabilo Anduane Homogohanda baya hangu handayaho heagola Debidi ibu nde ibuni andagaha bayale berene.

²Ani biruwa ibugua Anduane Homogonaga bi mana latagi haga Nadanahondo lalu, I̱ andaga bayaleore ira tamia bayale binigoha bedogola Ngode Datagaliwabenaga Habo Nalolene Bi lo winigonaga Mbogoyi biago dege balai anda biagoha wiaruago ogoni tiga nabida, lene.

³Ani layagola Nadanahanda ladai bialu lalu, Anduane Homogo ibu í̱la mandagi haabo kago í̱na mbirale mbira bule manda bidedagua nde bibe laro, lene.

⁴Ani layagoyu horo ogoningi mbiraga Anduane Homogohanda Nadanahondo lalu,

⁵I̱naga biabe biahaga Debidi karia puwa i̱naga bi ogo ibuhondo lamibe. Debidi-o i̱na agali i̱naga anda i̱ holiyanaga bia holene dabo heledogo í̱ ndo ke.

⁶I̱ anda timbuniha nahaga kogoni. Bamba Isaraele wali agali Iyibi dindiha howa haru tagira pirugongi howabi maruha puíbu bialubi i̱ balai andaha dege haga biaga harugoni ko.

⁷I̱ni Isaraele wali agali ti haru mandagi dindi dewani ibagabu haabo harimago howa tinaga agali haguane i̱na dabalu helarurunihondo lalu, Ira tamia bayale karume i̱naga anda mbira bia nahe kamigo agibe, lalu hale naharuligoni, lene.

⁸Anduane Homogohanda Nadanahondo laabo halu lalu, I̱naga biabe biahaga Debidihondo au labe, Anduane Homogo Hongo Haiheore kago ibugua bi ogodagua í̱hondo larago hale habe. Í̱ bamba nogo sibi haru haga heria i̱nime í̱ dabalu í̱na Isaraele wali agali haru habelo agali haguane dabo helarugoni ke.

⁹Dindi bibahende í̱ ibaga bialu piriruniha i̱ni iya haru mandagi ibagabu haabo haribagoni. Ani howa i̱nime dege í̱ waitigi ibiyaru wai bialu bo poda hana haga birugola í̱ wayali harigoni. Ai i̱nime í̱ agali mini lene timbuni dindi maruha karubi dege habelo i̱na í̱ mo yaraga holebero, laya labe.

¹⁰I̱naga Isaraele wali agali tí bayaleore halimulonaga dindi hobane bayale mbira tínaga mo wia ko. Bambaore agali ko bu hearume tí mo ko haabo hayadagua mani tí mo ko naholebira. Tínaga mamalirume dindi ogo pigane karulayangi howa bialu henego bima ibalu i̱na tínaga agali haguaneru dabo helaga birugolabi tínaga waitigime ti mo ko haabo haya, laya labe. Ani biyago áyu i̱na uruni ti mo batara harogola urunidagua nabi tínaga dindi ogobi lone mo ko naholebira. Ani kamigola i̱na í̱ dameneru baya hanguore hai helarogola tigua í̱naga aguaneru dewaore helo hono wigi bulebira, laya lamibe, lalu Anduane Homogohanda Nadanahondo bi ogoni Debidihondo lamilo lamini.

¹²Anduane Homogo ibugua laabo halu lalu, Debidi-o í̱ homaregola í̱naga mamaliru hora henegoha dege hora kangi í̱ igini mbira kini ha aribia helo dabo helolebero. Ani berogola ibu kini hongoheore mbiralime ibu bope halu handape habe nahe holebira.

¹³Kini ogoni ibugua wali agali i̱ni koria kaware ibilonaga i̱naga anda bulebira. Ani biragola i̱na maninaga ibu igini aguanerume dege kini haabo helolebero.

¹⁴Ani helowa ibu aba i̱ni kogola ibu i̱ igini holebira. Ani howa ibugua mana lehe mbira biyagua abame ibu igini mana lagadagua i̱na ibu mana lalu bolebero.

¹⁵Ala Solohanda mana lehe biyagola i̱na ibuhondo erembira mialu ibunaga henge wiago i̱na í̱ mo ngirudagua mani í̱ iginihondo ani nabi gubalini haho wiaabo helolebero.

¹⁶Ani helowa í̱naga waneigini aguaneru halu ereba nahe kini ha aribia haga bima puabo helolebero, laya lalu Debidi lamibe, lalu Anduane Homogohanda Nadanahondo lai hene.

¹⁷Bi ogonidagua Anduane Homogohanda bi lamiyaruni Nadana ibugua hale howa Debidi lamiai hene.

¹⁸Nadanahanda, Anduane Homogo ibugua bi anidagua laya, lalu lamiyagola Debidi ibugua hale halu Balai Anda Anduane Homogo ibuni heagoha pu biruwa lalu, Anduane Homogo Bibahende Haru Haame Ho Haga-o í̱na i̱hondo bayale dewaore birida. Ani bialu i̱nibi i̱naga waneigini damene bu karubi ina bayale ndo hemaria anidagua biridagoni.

¹⁹Anduane Homogo Bibahende Haru Haame Ho Haga-o í̱na i̱hondo bialu hariruni bibahende bayale dege biaabo harigo ai uruni emene degeyane mbirale bayale áyu uruni lone ngiatago harida. Anduane Homogo-o í̱na i̱ dameneru mani íbu holebirarubi mo bayale holebero larigo ai i̱ agali nagaloneore kogoni ndobe. Ani ha holiya dege í̱na i̱hondo mbirale bayale timbuni i̱hondo bule ngeru walia harida.

²⁰Anduane Homogo Bibahende Haru Haame Ho Haga-o urunidagua biridagonaga i̱na í̱hondo bi agua loabe. I̱ í̱naga biabe biahaga agali kogoni í̱ni manda bide.

²¹Ani manda buwa í̱na bi lo wirigonagabi í̱nime bule hame ledegonagabi áyu i̱hondo í̱naga mana bayale biaga ngego i̱ mo walia ho kegoni.

²²Anduane Homogo Bibahende Haru Haame Ho Haga-o í̱ duniniore kegoni. Í̱ ale mende naheore lowa Ngode Datagaliwabe í̱ hangu kegoni lalu ina mamalirume langigi biyane hale harima.

²³Ina Iyibi dindiha garabaya hemaria í̱na Isaraele wali agali bibahende garabaya golalu haru tagira ibuwa í̱ninaga wali agali holoma̱ya helarigoni. Ani helowa wali agali maru í̱naga wali agali ina kamarubi naheore. Ina dindini áyu kamagoria ibuluma̱ya í̱na mbirale bayale tara tara nahendene ale wiarubi biai harigola ina inanaga dindi ogoria ibinigo kamagoni. Wali agali dindi ogoriani ala hene hearu í̱na bo batagi hai halu tinaga dama mitangi bialu gime wabini wiaruni bo gialo wahai harigola dindi dabulu wiago ina mo ngirigola ibalu karulo harimago kamagoni. Anidagua birigome wali agali dindi bibahendeha karume í̱ mini lene taraore ke lowa í̱naga mini yaraga halu ka.

²⁴Anduane Homogo-o ina Isaraele wali agali kamaru í̱ninagaore holoma̱ya dabo helowa ina ani haabo holoma̱ya helarigoni. Í̱nibi nde inanaga Ngode Datagaliwabe haabo ho kegoni.

²⁵Anduane Homogo Ngode Datagaliwabe-o áyu í̱na i̱naga dameneruhondobi í̱naga biabe biahaga i̱nihondobi buleore lalu bi lo wiriruni biaaboore habelo hameledo. Í̱na bulebero lo wiridagua bibe laro.

²⁶Wali agali bu karume í̱na inahondo anidagua berego hondowa tigua í̱naga mini yaraga helo ani bibe laro. Ani hondowa tigua lalu, Anduane Homogo Hongo Haiheore kago ibu Isaraele wali agalinaga Ngode Datagaliwabe kagoni, lalu í̱naga mini yaraga holebira. Ani lalu kagola í̱na agali i̱naga aguane holebiraruha howa dege kini helo dabaga bialu haabo holebira.

²⁷Anduane Homogo í̱ Hongo Haiheore howa ina Isaraele wali agalinaga Ngode Datagaliwabe-o í̱na í̱naga biabe biahaga i̱hondo lalu, Í̱naga aguaneru bayale helonaga mo hongo holebero, lalu langirigonaga í̱naga biabe biahaga i̱ni kogome í̱hondo gi nahe howa bi langerogoni.

²⁸Anduane Homogo Bibahende Haru Haame Ho Haga-o í̱ni hanguore Ngode Datagaliwabe kegoni. Í̱na mbirale mbira bule lalu lo werego biaore biaga kegoni. Ani biagaore kegome áyu howa i̱hondo heneneore mbirale mbira bule lalu bi lo wirigoni.

²⁹Ani bule lalu lo wiridagua bialu i̱naga dameneru í̱ni andaneha howa bayale haabo helo helabe laro. Anduane Homogo Bibahende Haru Haame Ho Haga-o í̱na bi ogoni heneneore lo wirigome í̱naga turu howa biamogo buleneru i̱naga aguaneneruha wiaabo holebira, lalu Debidihanda Anduane Homogohondo bi anidagua lene.