Read Huli 1 Kini 19 Bible Online

1 Kini 19 - Huli bible

1 Kini 19

¹Kini Ahaba ibu andaga Yaserili dai buwa ibu one kuini wali Yasebelehondo Elayahanda biyaruni bibahende lamiai halu dama Balanaga bi mana latagi haga agali bo wahai hayarubi bibahendeore lamiai hene.

²Ani layago hale howa Yasebele ibugua Elayahondo bi lawia halu lalu, I̱na í̱bi nde agali uruni homayadadagua homabelo yawi bo waholiya. I̱na í̱ yawi nabaruyagua nde dama maru bu karunime i̱ni bo wahelo laro, lene.

³Ani layago hale howa Elaya ibu gi halu agali ibunaga biabe biahaga biago libu haru ibida pialu Yuda dindihayagi dindi emene mbira Beaseba wiagoha anda pene. Anda pialu ibunaga biabe biahaga biago ogoniha helalu

⁴ibuni dindi ko iba dalu naibaga wiagoha horo mbiru hangu pialu anda pene. Pu dege bialu ira mbira heneyago andane gumba heagoha anda íbu biruwa bi ogodagua lene. Anduane Homogo-o genda dewaore i̱ha áyu ibirarunigo ai karulape i̱ homolene hangu hamelo bedogoni. Áyu i̱ agali bayale ndo agali ko bamba i̱ mamali henerubi dege ko kogodago, lene.

⁵Ibugua bi lai halu de umu layagola ira tene gumba heagoha emene palene. Ani palearia dahuliyali mbirame abale ibuwa ibu ela halu barila howa lalu, Heyalu tomo na, lene.

⁶Elaya ibu heyuwa handa a̱i̱na̱i̱ bialu hearia mberedi mbira ege to̱le̱ poboheme hirini ibu haguanda wiyagohayagi wialu iba be mbiraha iba hambu wialu biaria hendene. Ibugua mberedi ibabi nalu lone paliadai bini.

⁷Palearia Anduane Homogonaga dahuliyali biago lone ibalu ibu barila howa lalu, Í̱ hariga polene lu dege wuligo ai pole heyalu tomo na naberego, lene.

⁸Ani layagola Elaya ibu lone heyuwa tomo ibabi nene. Tomo ogoni nowa hongo heagola ibugua horo pira mariani (40) mbiraga horombebi heba pialu Ngode Datagaliwabenaga hari loma bia hene Sainai mini mende Horebe laga heagoria anda pene.

⁹Ani pialu mbi layagola Elaya ibu egeanda mbira heneyagoha anda puwa palene. Ibu ani palearia Anduane Homogohanda hale halu lalu, Elaya-o í̱ ogoha agi bialu kebe, lene.

¹⁰Ani layagola Elayahanda ladai bialu lalu, Anduane Homogo Hongo Haiheore Ngode Datagaliwabe-o i̱ í̱ninagaore biabe biahaga henego kogoni. I̱na Isaraele wali agali bibahendeme í̱naga bi mana hale halu bilo mo walia haga henego ai tigua í̱ erembira ngialu habo nalolene bi bamba lo wirigo puguaya. Tigua í̱naga loma biniru bo delaga dabu wiaru gialabagabu wahalu í̱naga biabe biahaga agali hearuni bibahende bo wahai haya. I̱ hangu yu wahene hewagola ai i̱bi nde bo wahole ka, lene.

¹¹Ani layagola Anduane Homogohanda lalu, Í̱ tagira pialu li hari nene i̱naga wanakui ngogoria pu ha. Ogoriani keria i̱na ibalu í̱ni pu bolangua holeberogo, lene. Ani pu heagola puyabu hongoheore timbuni mbira ibalu harini ege to̱le̱ wiaruni kambulu baga bini. Anigo Anduane Homogo ibuni puyabu ogoniha nahe wini. Mani howa puyabu piai heagola dindi dumbirumbi timbuni bini. Ani biyagola Anduane Homogo ibu dindi dumbirumbi ogonihabi nahe wini.

¹²Mani howa ira hungu ibinigo ai Anduane Homogo ibu ira hungu ogonihabi nahe dege wini. Mani uruni biai heagola bi emeneore hale habe nahe hagarere bi layuane hale hene.

¹³Bi ogoni layuago hale halu Elaya ibu ibuninaga aga luni biagome dengui bu yihalu egeanda biagoha hayago yu wahalu emene harabani ale tagira pene. Ani tagira piyagola bi mbira layuagome lalu, Elaya-o í̱ ogoria agi bialu kebe, lene.

¹⁴Ani layuago hale howa Elaya ibugua ladai bialu lalu, Anduane Homogo Ngode Datagaliwabe Hongo Haiheore-o i̱ hangu í̱naga biabe biahaga howa Isaraele wali agali bibahende í̱naga bi mana hale halu bilo mo walia haga henego ai tigua í̱ erembira ngialu habo nalolene bi bamba lo wirigo puguaya. Tigua í̱naga loma biniru bo delaga dabu wiaru gialo bagabu wahai halu í̱naga bi mana latagi haga agali hearuni bibahende bo wahai haya. I̱ hangu yu wahene hewagola ai i̱bi nde bo wahole ka, lene.

¹⁵Ani layagola Anduane Homogohanda lalu, Áyu ogoniore í̱ni ibiridagua dai bialu tano Damasagasanaga dindi lene mbira wali agali napale ngagoha pobe. Ani pu howa mani tano ngagoha anda pialu agali mbira mini Hasaele holebirago ogoni karia puwa ibu Siria dindiha kini helo ibunaga haguaneni weli odo wia habe.

¹⁶Ani bialu agali mende Nimisi hameigini aria Yihu holebirago ogoni ibu Isaraele wali agalinaga kini helo ibunaga haguaneni weli odo wia habe. Ani buwa Sabada igini Elaisa ibu Abele Mehola tano howa ibini kago ogoni ibu í̱ni henegoria ho aribia howa i̱naga bi mana latagi haga helo dabo helabe.

¹⁷Ai Hasaele ibu kini harangi ibugua wali agali dewaore bo waholebira. Maru ibida pora bialu piyagua Yihu ibugua bo waholebira. Maru Yihuhanda bara handala ibida pora bialu poraru Elaisa ibugua bo waholebira.

¹⁸Anigo Isaraele dindini wali agali daosini karia (7,000) hangu dama mitangi bialu gime wabini Balanaga mini yaraga halu ge duli hanga nahagabi tinaga ne hambume Bala nu̱nu̱ nalaga karubi ti hangu helo yupe holebero, lene.

¹⁹Elaya ibugua Anduane Homogohanda bi layago hale halu ibu Hari Sainai wahalu Isaraele dindiha dai bini. Ani dai buwa handalu hearia Sabada igini Elaisa ibu agali beriali (11) haru howa mabuha biabe bialu bulumagame mbirale tara dindi aliaga aleme dindi alilo bulumagame mbirale uruni gililo yu ibaga bilonaga mo tiga bigi bialu hemiria hendene. Agali beriali (11) uruni ti tinaga bulumagame biabe bilo mo tiga bima bamba halu piai hayagola Elaisa ibu dege ibunaga bulumaga kira heba biabe bilo mo tiga bima mani ibini. Ani ibiyagola Elayahanda ibunaga aga luni biagimbu biaga mbira biago golowa Elaisa mo karula hene.

²⁰Anidagua bialu Elaya ibu piyagola Elaisa ibu biabe bialu hayago wahalu gerai lalu Elaya piyago haruru puwa ibuhondo lalu, Mbaliya dege i̱ aba ai̱yaru karia ala dai buwa i̱ porogo tí hondo halimu lole poliya ani bia larene, lene. Ogonidagua hale hayagola Elayahanda ibuhondo lalu, E̱ karulape i̱na í̱ napobe naloleberogo pu, lene.

²¹Elaisa ibu abale andaga dai buwa ibunaga bulumaga kira bene. Ani buwa mbirale dindi aliaga irame wabini bulumagani dariba hamaga kagola dindi aliaga ogoni biago gabuwa bulumaga bayagonaga mbirini wiaru ogonime hiruwa wali agali biru hearu nelo migi biyagola ti nene. Anidagua biai halu ibuni Elaya piyadagua talima pialu Elayanaga biabe biahaga hene.