Read Huli 1 Kini 8 Bible Online

1 Kini 8 - Huli bible

1 Kini 8

¹Kini Solomonohanda Isaraele hameigini bibahende hearunaga agali haguane hearuhondobi hameigini emene emenenaga agali haguane hearuhondobi uruni ti bibahendeore ibuni koria Yarusaleme ibai halimu lama pudaba lene. Uruni tigua Debidinaga tano Saiononi Anduane Homogonaga Habo Nalolene Bi lo winigonaga Mbogoyi biago Anduane Homogonaga anda Yarusalemeni ngelo mo yalu ibule pudaba lolenaga ani lamule bi yalu purogo ladaba lene.

²Ani laya handala lamima purogo layagola bi ogoni hale halu agali uruni tigua mali ogoninaga ege kane layagola Isaraele wali agali ti Anda Nemandaruha Palu Holene Horo winigo ogoningi ti bibahende íbu ngoai hene.

³Agali haguane biaru íbu ngoai heagola loma binigo mo miaga hearu tigua Mbogoyi biago mo yalu

⁴Anduane Homogonaga anda heagoria yalu pene. Ani buwa loma binigo mo miaga biarubi Libai agali hearubi tigua Anduane Homogonaga Balai Anda heago gialo yalu Balai Anda ogoniha wiaga wiaru bibahende mo yai halu Anduane Homogonaga anda heagoria kaware pene.

⁵Ani mo yalu ibiyagola Solomonobi Isaraele wali agali bibahendebi Mbogoyi biago mo yalu ibiyagoria kaware mo ngoai ho hene. Ani mo ngoai howa tigua nogo sibirubi bulumaga wangaberubi dewaore daga labenahe Anduane Homogohondo loma biniru bo delalu hene.

⁶Ani bo delai halu loma binigo mo miaga biaru tigua Mbogoyi biago Anduane Homogonaga anda biagoha tamu Hobane Loma Bia Heneore biagoha mo yalu anda puwa dahuliyali handalehe wabini biago labonaga babagane andaneha ngelene.

⁷Babagane yabulalu haradaguabi wabu helayagome Mbogoyi biagobi iraho yaga ira luni kira biagolabobi bibahende babagane kira biagolabome dambi hai helene.

⁸Ira kira Mbogoyi iraho yaga ogoni labo lunioreyagola anda tamu Hobane Loma Bia Hene laga mende tagirahayagi heagoria howa ira ogoni labonaga nguni panigi handabehe wini. Anigo tagirahayagi howa handabe nahe wini. Ira ogoni labo anidagua wiaho wiaabo haga wini.

⁹Mbogoyi ogoniha ege to̱le̱ kira Anduane Homogonaga bi mana gilibu wini biagolabo dege wini. Bamba Isaraele wali agali Iyibi dindi wahalu Hari Sainai heagoria íbu heangi Anduane Homogohanda ti heba Habo Nalolene Bi mbira lowinigo ogoni ege to̱le̱ kirani gili buwa Mosesehanda Mbogoyi ogoniha yu ngelene.

¹⁰Ani bialu loma binigo mo miaga agali biaru tigua Mbogoyi biago tamuha mo ngelalu tini tagira ibiyagola beraliba aleme Anduane Homogonaga anda biagoha íbu to̱lai hene.[4]

¹¹Anduane Homogo ibunaga wá taraore holeneme beraliba biagoha howa wá timbuni demborerebi hatagi hene. Ani hayagome loma binigo mo miaga biarume tinaga biabe bulene wiaru bule dai bibe nahe hene.

¹²Ani biyagola Solomono ibugua Anduane Homogohondo bi ogodagua lalu, Anduane Homogo-o í̱nime lalu, I̱ beraliba hari mindini ngaruha holebero, larigoni.

¹³Anigo ai áyu i̱na í̱naga anda baya taraore bia kogonigo í̱ni ogoniha haaboboore habelo kagoni, lene.

¹⁴Kini Solomono ibugua Anduane Homogohondo bi lai howa wali agali bu hearuha handa amu howa Ngode Datagaliwabehanda ti mo bayale helo lowa bi lahene.

¹⁵Ibugua lalu, Anduane Homogo ina Isaraele wali agali kamarunaga Ngode Datagaliwabe kago ibunaga mini mo yaraga hama. Ibugua bamba i̱ aba Debidihondo mbira buleberogo lo winigo áyu biyada. Debidi ibugua Isaraele wali agaliru ti Anduane Homogo inanaga Ngode Datagaliwabe mitangi bialu ibuhondo lotu lalu ibuni kagoha kaware hole ibilonaga anda mbira bule manda bialu hene. Ani bule biyagola Anduane Homogohanda ibuhondo lalu, I̱na i̱naga wali agaliru Iyibi dindi howa haru tagira ibirungi hama ibinigo ibalu áyu ogoni howa tigua íbu ngoai howa i̱nihondo mitangi bialu lotu lalu holene anda mbira Isaraele dindiha tano wiyaru mbirani bilimu lalu nalami haru. Debidi í̱na i̱naga wali agaliru haru habelo dabo helaro. Í̱na i̱naga anda timbuni mbira bia hole manda birigoni bayale dege.

¹⁶

¹⁷

¹⁸

¹⁹Anigo mani howa í̱ igini mbirame wali agali i̱ni koria ibalu i̱ mitangi bialu lotu lelonaga anda ogoni bilo áyu í̱nime i̱naga anda nabulebere, lalu Anduane Homogo ibugua Debidihondo lamiyago, lalu Solomonohanda lene.

²⁰Ibugua laho wialu lalu, Anduane Homogohanda bi ogonidagua lowinigo áyu heneneore lola hai helayada. Ai ina bibahende ibuni kagoria kaware pialu lotu lami̱yanaga i̱na Anduane Homogo Isaraele wali agalinaga Ngode Datagaliwabenaga anda mbira bidogoni.

²¹Anda ogoniha Anduane Homogonaga Habo Nalolene Bi lo winigonaga Mbogoyi biago tamuha mo yu íbu ngeledogoni. Mbogoyi ogoniha bamba inanaga mamali Iyibi dindiha howa haru tagira ibiyangi ege to̱le̱ kirani Anduane Homogohanda ina baba Habo Nalolene Bi gilibu wini biagolabo ogoniha nga, lalu Solomonohanda ani lene.

²²Ani lai howa Solomono ibugua Isaraele wali agali bibahendenaga deni lomabu delaga dabu wiagoria pu howa ibunaga gi yaraga halu lalu,

²³Anduane Homogo ina Isaraele wali agali bibahendenaga Ngode Datagaliwabe-o dahuliya andagahabi dindihabi mbira í̱ kegobi mende naheore. Ani kegobi howa iname mana beremaru í̱ninaga deni bayale hangu bialu howa mana ko ngaru mitangi nabi kamagola í̱na í̱ninaga Isaraele wali agali baba habo nalolene bi lo wirigo mitangi bialu ina gubalini haabo haga ke.

²⁴Í̱na bamba í̱naga biabe bia haga i̱ aba Debidihondo bulebero lalu bi mbira lo wirigo mitangi bialu áyu bi ogoni heneneore lola helarida.

²⁵Ai Anduane Homogo ina Isaraele wali agalinaga Ngode Datagaliwabe-o áyu i̱na í̱hondo bi mbira hale harogo. Bamba i̱ aba Debidihondo mbira bulebero lalu bi mende lo wiriyago manda bibe. Í̱na ibuhondo lalu, Debidi-o í̱ igini aguaneru tigua i̱ni baya hangu talima ibaabo halubi i̱naga deni ibagabu halu í̱na bialu haga wiridagua biyagua nde í̱naga aguane uruni ariame hangu Isaraele wali agalinaga kini haabo holebira, lariyago.

²⁶Ai ina Isaraele wali agalinaga Ngode Datagaliwabe-o í̱na i̱ aba Debidi í̱naga biabe biahaga biagohondo ani buleore lalu bi ogonidagua lo wiriyagobi heneneore lola helonaga ani bibe lalu langero.

²⁷Anigo Anduane Homogo-o heneneore dindi o ngagoha í̱ holene karulapedabe. Dahuliya andaga timbuniore howa ogoniha í̱ holene nakarulape ngegodago ai i̱na anda emeneore áyu o bu hela kogo í̱ holene karulape agua holedabe.

²⁸Ai Anduane Homogo i̱naga Ngode Datagaliwabe-o í̱naga biabe biahaga kogonigo áyu i̱naga bi ogoale bibe larogo hale habe. I̱na í̱hondo hale halu bibe lalu langerogo bibe.

²⁹Í̱nime í̱naga anda ogonigo wali agaliru ti anda ogoniha anda ibalu í̱ni kegoria kaware ibilo dabarigoni. Aniyagua horo bibahendengi anda ogoniha de handape haga bibe. I̱na horo bibahendengi anda ogoniha handa amuho howa í̱hondo biamogo bibe larogola í̱na i̱naga bi hale halu bibe.

³⁰Anduane Homogo-o i̱nibi í̱naga Isaraele wali agali bu kamarubi iname í̱naga anda ogoniha handa amu howa í̱nihondo bi mbira laramagola í̱na dahuliya andagaha kegoriani howa inanaga bi laramago hale halu iname ko birimadaru domo wahaga bibe, lene.

³¹Solomonohanda laabo halu lalu, Mbirali ibu damene mendeali kagome ibuhondo í̱ kagua mbira biri laragola ogoni ibugua anda ogoha anda ibuwa í̱naga lomabu delaga dabu ngagoria kaware ibalu ibu bi heneneore laro lalu i̱ kagua nabi layagua nde

³²Anduane Homogo-o í̱ dahuliya andaga howa mbirali ibunaga bi ogoni larago hale halu í̱na mana tigabi ngadagua bialu mo tiga bibe. Agali mana kagua biaga hayadago ibugua biyadagonaga pani mibe. Wali agali bu karunaga deni agali biagome ko mbira nawi kago ibuha ko para nahe kagoni lowa walia halu ibuhondo bayale bibe.

³³Í̱naga Isaraele wali agali kamarume inanaga waitigi baba wai bialu kamaria iname í̱hondo mana ko birimagome inanaga waitigime ina balu wayali helaregola iname ko birimadarunaga mini beregedalu í̱ni keria anda ogoha ibuwa í̱hondo bi lalu, Inanaga ko birimaru domo wahabe larimayagua

³⁴Anduane Homogo-o í̱ dahuliya andaga howa í̱naga wali agali bu kamarunaga bi hale halu ko birimago domo wahabe. Ani bialu inanaga waitigi karume ina dindi tara mendeha haru piyago í̱nime dindi bamba ina mamaliruhondo minigo ina dindiore ogoria lone haru dai bibe.

³⁵Ina wali agali í̱naga bu kamarume í̱hondo mana ko mbira bialu kamaria ina pani ngialu inanaga dindi ogoria iba dalu naibilo gaea hangu biaho ngelaregola mani ina mini beregedalu anda o kagoha í̱ni keria handa amu howa bi larimayagua

³⁶Anduane Homogo-o í̱ dahuliya andaga howa í̱naga Isaraele wali agali bu kamaru dara halu inamebi kini kagomebi ko birimadaru domo wahabe. Ani bialu iname mana tigabi bayale ngaru hangu talialu bialu holoma̱ya lawai habe. Ani bialu dindi ogo inanaga dindi ogoniore ngelo í̱na bamba inanaga mamaliruhondo mini wirigoria iba dalu ibilabe.

³⁷Solomonohanda laabo halu lalu, Inanaga dindi ogoria hina gariangi timbuni piyaguabi warago hongohe tara tagira ibiyaguabi puyabu poboyogobi hongohe tara mbira ibalu inanaga mabuha tomo hengene andaho karu mo ko hayaguabi pagaya ale dewaore ibalu mabuha tomo andaho karu nai hayaguabi inanaga waitigirume ibalu inanaga tanoruha kamaria ina bole ho hagirabu yanda hayaguabi warago tara tara ngaru inaha anda ibalu ina mo ko hayaguabi

³⁸í̱hondo bi laramagola hale habe. Í̱naga Isaraele wali agali ina kamaru aria mbirame í̱hondo ko biyagonaga mitangi bialu bu miniha genda howa dara halu anda ogo kagoha í̱ keria handa amu howa gi dogolalu í̱hondo bi layagua

³⁹Anduane Homogo-o í̱ í̱ni dahuliya andaga howa tinaga ko biyago domo wahalu tigua bi larago hale habe. Í̱nime hangu wali agali bibahendenaga bu miniha mitangi bu kagobi manda biai ho ke. Ani manda biai ho kegome wali agali tigua mana koyaguabi bayaleyaguabi biyadagua dabalu pani miadai bibe.

⁴⁰Ai í̱naga wali agali kamaru í̱na dindi ogoni inanaga mamaliruhondo mirigo ogoriani howa ina bayale tigabi bialu í̱ni andaneha haabo holoma̱ya ogonidagua bibe.

⁴¹Dindi tara tara ngaruha howa wali agali bu karume í̱naga mini timbuni daliga mini lene ngago hale halubi biabe timbuni í̱naga wali agali bu kamaru biamogo biridago hale halubi mbiralime ibunaga dindi yu wahalu í̱ mitangi bialu lotu lole lowa anda ogoha ibuwa í̱nihondo lotu lalu bi layagua

⁴²

⁴³Anduane Homogo-o í̱ dahuliya andaga howa o biagome í̱hondo bia lalu hale harago ale bibe. Í̱naga Isaraele wali agalirume í̱ andaneha kamadagua wali agali dindi tara taraha karume í̱ manda biai halu í̱ andaneha ibalu hai helo ani bibe. Ani bialu howa i̱na anda o bidogo í̱naga andaore kagonidalo manda bialu wali agali bibahende anda o kagoha ibalu í̱ni mitangi bialu lotu lolene ngago manda biai holebira.

⁴⁴Í̱na inahondo, Dindi mendeha tínaga waitigi karu baba wai bule pudaba, laregola bialu howa ina dindi tara ta nabi kamagoha howa i̱na anda ogo Anduane Homogo í̱naga helo binigobi tano ogoni í̱na dabo ngelarigobi ogoniha handa dai bu howa ina í̱hondo bi larimayagua nde

⁴⁵Anduane Homogo-o í̱na dahuliya andaga howa inanaga bi laramaru hale howa ina dara halu inanaga waitigiru balu wayali holoma̱ya ina pele ngibe.

⁴⁶Wali agali bibahendeme ko biai haga kamago ai í̱naga wali agali iname í̱hondo ko bialu kamaria í̱na inahondo keba howa inanaga waitigi karume ibalu ina baba wai buwa ina bo garabaya bu yalu dindi tara kaundia kawarehayagibi minu yalu piyagua í̱naga wali agali bu kamarume í̱hondo bi laramago hale habe.

⁴⁷Mani inanaga waitigi dalu dindi tara uruniha howa inanaga ko birimaruni mitangi bu dai bialu inane mini beregedarimayagua nde Anduane Homogo-o í̱na inanaga bi laramago hale habe. Heneneore inanaga waitigi dindi ngaruha pu howa í̱nihondo hongo howa mini mbiraore wuwa í̱ hangu mitangi biaabo halu inane mini beregedai howabi ainde bamba í̱na dindi ina mamaliruhondo mini biagohabi í̱ninaga tano dabo helarigohabi i̱na í̱naga anda wali agaliru ti ogoniha ibalu í̱ni keria ibilo bia harugohabi handa daibu howa í̱hondo bi lalu, Iname mana ko bulene wiaruha pu pebe bialu howa ko dewaore bialu harimago, lapani halu langirimayagua

⁴⁸

⁴⁹í̱ dahuliya andaga howa iname bi laramagola hale halu ina dara halu biamogo bibe.

⁵⁰Ani bialu nde í̱naga wali agali bu kamarume mine halu mana ko bialu harimaru bibahende í̱na domo wahai halu inanaga waitigi karume ina dara halu biamogo bilo í̱nime mo manda bia habe.

⁵¹Anidagua bulenego irane ina í̱naga Isaraele wali agaliore kamagoni ndobe. Ina Iyibi dindiha ira hongohe daraligobiha kuni duguabe naheore wiagoha hemaria í̱nime ina dugu ede halu haru tagira ibirigoni.

⁵²Anduane Homogo Bibahende Haru Haame Ho Haga Kego-o í̱naga wali agali bu kamarume í̱hondo bi lalu kamarubi inanaga kini kagome í̱hondo bi lalu kagobi iname í̱hondo ina biamogo bia lowa bi lalu kamago bibahende handalu dara howa hale habe.

⁵³Irane wali agali maru hearuni helowa ina Isaraele wali agali dege dabowa í̱ninaga wali agaliore daba bagiho helowa í̱nime ani bule lalu lo wirigonidagua bibelo. Í̱ninaga biabe biahaga Mosesehondo inanaga mamaliru bamba Iyibi dindi howa haru tagira ibiringi buleore lalu lo wirigodago anidaguaore bibelo laro, lalu Solomonohanda Anduane Homogohondo bi ogoni lene.

⁵⁴Solomono ibu ge duli hangaho biruwa ibunaga gi kirabali dogoladaga howa lomabu delaga dabu wiagoria Anduane Homogohondo bi lalu berenego lai halu heyuwa

⁵⁵ibugua Ngode Datagaliwabehanda Isaraele wali agali bibahende mo bayale helonaga bi wali agali bibahendeme hale hai helo hongo howa ladaga halu hene.

⁵⁶Ibugua lalu, Anduane Homogonaga mini yaraga hama. Ibugua buleore lalu bamba lo winidagua mo palia holenebi gi nahe hada payabu holenebi ibunaga Isaraele wali agali ina kamaruhondo ngiyada. Buleore lalu bamba ibunaga biabe biahaga Moseseha howa lo winiru mbira wanahe biaiore hayada.

⁵⁷Anduane Homogo inanaga Ngode Datagaliwabe ibu bamba inanaga mamaliru baba mandagi hama ibinidagua áyubi nde ibugua ina yu wanahe ina baba mandagi haabobo helo.

⁵⁸Iname ibu mitangi biaabo halu ibu gubalini holoma̱ya mo manda biaabo haragola iname ibunaga hariga bayale mo wia kagoria pialu howa ibunaga bi mana bamba inanaga mamaliruhondo lamini ngaru baya hangu taluwa bialu holoma̱yanaga hameledo.

⁵⁹Ai horo bibahendengi Anduane Homogo inanaga Ngode Datagaliwabe ibunime i̱na ibuhondo bi áyu laruruni mitangi biaabo helo laro. Ani buwa ina ibunaga Isaraele wali agali kamarubi inanaga kinibi horo mbiru buru padamadagua ibugua ina dara howa biamogo biaabo helo.

⁶⁰Ani bialu kago hondowa dindi tara tarani wali agali hameigini bu karume hondowa Ngode Datagaliwabe tara mende nahe Anduane Homogo ibuni hangu heneneore henedane hondolebira.

⁶¹Ai ibunaga wali agali kamiru tígua horo bibahendengi Anduane Homogo inanaga Ngode Datagaliwabe ibuni kago mitangi biaabo halu ibu andaneha hangu hai halimulo hameledo. Áyu howa ibunaga mana lowini ngaru baya hangu taluwa bialu kamidagua mani ani biaabo halu halimulo hameledo laro, lalu Solomonohanda lai lene.

⁶²Kini Solomono halu ibunaga wali agalirume Anduane Homogohondo nogo tara tara lomabu miniru bo delene.

⁶³Ibugua bulumaga daosini pira kirani kira (22,000) bo delalu nogo sibi daosini dege handari mbirani pira kira (120,000) Anduane Homogola ho gimbu bulenaga lomabu miniru bo delene. Kini biagobi wali agali bibahende hearubi tigua ogonidagua bialu anda biago Anduane Homogonagaore helo loma bia ho helene.

⁶⁴Horo ogoningi dege dindi henge timbuni mbira Anduane Homogonaga anda ogoni heagoria winigo ogonibi ibunaga ngelo lowa ibuni loma bia howa ngelene. Ani binigo ai dindi odagoria Solomono ibugua nogo maru irani delai holene loma wiarubi widi lomabu mulene wiarubi nogo o biarunaga habane Anduane Homogola ho gimbu bulenaga lomabu delolene wiarubi ogoriani delai hene. Dindi odagoria lomabu miniru bo delenedagoni irane lomabu mialu bo delaga dabu boronosime wabini henedago emene halu lomabu miniru delai habe naheyagola anidagua bini.

⁶⁵Horo ogoningi Isaraele wali agalinaga Anda Nemandaruha Palu Holene Horo hayagola Solomonobi Isaraele wali agali bibahendebi mo ngoai howa Yarusalemeni hene. Ti horo karu ala mo ngoai ho howa horo karu halu mende ngoai halu biyagola horo deru (14) bibahende íbu ngoaiho hene. Wali agali Isaraele dindi bibahendeha howa íbu ngoai hene. Uyurayagi dindi gibuni Hamada tano polene hariga tagira pedagoria howa pialu unurayagi Iyibi dindiha tubaria ngagoria howa hilalu ibaiore howa íbu hene.

⁶⁶Horo timbuni uruni hai halu Solomono ibugua wali agali uruni tini dalu dai bidaba lene. Ani biyagola nde wali agali tigua Solomono ibugua biyarunaga ka̱i̱ lalu Anduane Homogohanda Solomono mo bayale helonaga bi lahalu pene. Ti andaga pugu pugu bialu howa Anduane Homogohanda ibunaga biabe biahaga Debidi lamialu buleore lalu lo winiyago ibunaga Isaraele wali agali biamogo bialu biaore biyadagonaga turu haga bima tini dalu dai bigi bini.