Read Huli 1 Bi Te 10 Bible Online

1 Bi Te 10 - Huli bible

1 Bi Te 10

¹Pilidiali amime Isaraeleali baba Hari Giliboa heagoria wai biyagola Isaraeleali dewa homene. Maru Solobi ibunaga igini biarubi heba ibida purogo lene.

²Ani purogo layagola Pilidiali ami abale talima ibalu Solo igini tebira biaru Yonadana Abinadaba Malagisua imaru minalu bai hene.

³Ani bialu Solo heagoria wai hongoheore minama minama anda ibalu waitigi hearunaga timume Solo bila hene.

⁴Ani biyagola ibugua igiri wai biaga humbi yandarerubi yu heagohondo lalu, Pilidiali Ngode Datagaliwabe mitangi nabiaga nai ibirarume i̱ boligo í̱naga ayu tibu yidegonime i̱ homoliya abale ba, lene. Ani layagola igiri biagome ani bolene gi timbuni howa nabe wahene. Ani biyagola Solo ibuninaga wai biaga ayu tibu biago yamuwa deneni ibunime pili paga halu homene.

⁵Ani biyagola igiri biago ibula ibaga bu haribigo ibu nde ibuninaga wai biaga ayu tibu yu hayago yamuwa deneni ibuni pili paga halu Solo homayadagua dege homa palu bini.

⁶Ani bialu Solo ibunibi ibunaga igini tebirarubi homai hayagola mani ibunaga aguanene heneru mbiralime kini nahene.

⁷Ani biyagola Isaraelealiru ti Yaserili dindi guagua wiagoria hearume Isaraeleali ami ibida purogo layagobi Solobi ibu iginirubi homaya layagobi hale halu tinaga dindi andabi wahalu ibida pene. Ani biyagola Pilidiali biaru ibalu dindi karulene.

⁸Mani wai ogoni biai howa horo mbira peagola Pilidiali biaru puwa Isaraeleali balu homene biarunaga mbirale dabudabu yu wahalu pene wiaru ti mo yalu pene. Ani bialu howa handalu hearia Solobi ibunaga igini tebira biarubi tinaga tingini uyu Hari Giliboa wiagoha bo paya bu wiaria handa walia hene.

⁹Ani bu wiaria hondowa tigua Solonaga haguane pugualu ibunaga wai bulenaga aeane karuleago ti golowa agali maru hearuhondo mialu bi baya mbira yidama lalu Pilidialinaga mbirale dama mitangi bialu bi pupu wule gime wabiniruhondobi wali agalihondobi lamule pudaba lene.

¹⁰Ani lowa tigua Solo ibuninaga wai biagane timu humbi yandare uruni mo yalu puwa tinaga dama mitangi bialu mbirale gime wabini anda heagoha mo wialu Solonaga haguane biago tinaga dama mini Dagononaga bi pupu wiaga anda heago tamuha gerela ho wini.

¹¹Yabese wali agalime Gileada dindini howa hale halu hearia Pilidiali biaru tigua Solo ogodagua biya lalu layago hale hene.

¹²Ogoni hale howa agali pari wayali elahe hearume abale gerai lalu puwa tigua Solobi ibu igini tebira biarunaga tinginiru mo yalu Yabese dindini dai buwa ira bai ale mbira heago teneha hora halu tini dara howa horo karu tomo mbira nane dugu bialu haabo hene.

¹³Solo ibu homayago irane ibu Anduane Homogo mo tene nahe wahalu homenenaga dinini mo bila hayagome ibuni homene.

¹⁴Ibugua Anduane Homogohondo i̱na agi buabe lalu hale naheyagola Anduane Homogo ibugua Solo bo wahalu Isaraele wali agalinaga kini helo Yasi igini Debidi dabo aribia ho helene.