Read Huli 1 Bi Te 12 Bible Online

1 Bi Te 12 - Huli bible

1 Bi Te 12

¹Kisi igini Solohanda Debidi bo wahole talima ibaga bialu heangi Debidi ibu ibida puwa Sigilaga tanoha ha do hene. Ani ha do hearia ami agali hongohe marume Debidinaga wai bia hole ibini.

²Tigua danda timume bolenebi ege to̱le̱ emene pume yuwa bolenebi gi tigame balu gi lemebi baga mugubeore heneya. Agali uruni ti Beniyamini hameigini Solo ibu aria dege heneya.

³Tinaga ami agali haru haga Ahiesebi ibu hamene Yoasabi libu kirabali Gibea tanoali Sema henego igini hene. Ami agali maru henedarunaga mini uru. Asamabede igini Yasiele Peledela libubi Anadodo tanoali Beraga Yahula libubi Gibeono tanoali Isimaiabi hene. Isimaia ibu Debidinaga ami agali hongoheore mini leneru pira tebira (30) hearunaga haru haga agali haguane hene. Beniyamini hameigini agali maru mini Yaremaia Yahasiele Yohanana Yosabada imaru uruni ti Gedera tanoali hene. Agali maru Elusai Yarimodo Bealaia Semaraia Sebadaia imaru ti Haribiali hene. Kora hameigini Elegana Isaia Asarele Yoese Yasobeama imaru hene. Yoelabi Sebadaiabi libu Gedo dindiali Yarohama igini hene.

⁸Debidi ibu dindi ko iba dalu naibaga wiagoha ha do hole pu hearia ami agali hongoheore Gada hameigini maru hearu Solo helalu ibini. Agali uruni ti ami agali hongohe gibiore howa ti humbi yandarebi yuwa wai biaga pari wayali hene. Tigua wai pora birangi tinaga dengui nogo gabua laiono ale hiriribi gibiore howa wai biaga. Ani buwa gerai ledaha agali gerai ndo aube toba pialu biango dudu hari bareha hagame dai laradagua biaga hene.

⁹Agali uruni ti mini uru. Agali haguane mini mbira Ese mende Obadaia tebone Eliaba mane Misimana dauni Yaremaia waragane Adai kane Eliele halini Yohanana dini Elesabada pini Yaremaia mende beane Magabanai layaru hene.

¹⁴Gada hameigini agali uruni ti ami agali bayale dege hene. Ani howa ti maru wai biaga mandabi hearume wai bialu agali mbira hangume ami agali daosini mbira (1,000) haru haga hene. Maru wai bulene bayuwa manda nabi hearume ti ami agali handari mbira (100) haru haga howa wayali habehe dege hene.

¹⁵Mali mbiranaga ege mbira layagola Iba Yodana li timbuni daligaore wiangi agali uruni tigua Iba Yodana domaede halu puwa wali agali iba doma edeyagi dindi ulini panda panda wiagoha abene ni tagira ibiragohayagibi ni paliragohayagibi hearu baba wai bialu bibahende bo taliatogo layagola ibida pugu pugu bini.

¹⁶Horo mbirungi Yuda hameigini marubi Beniyamini hameigini marubi ti Debidi ibu dindi ko dalu naibaga wiagoha ha do hearia ibini.

¹⁷Debidihanda ti lola ho puwa tihondo lalu, Tá nenegeme ibagadagua ibalu i̱ biamogo bule ibirimiyagua nde i̱ tánaga nenege holene turuho kogoni. Ani ndo tágua i̱ waitigi karuhondo mini mule ibirimiyagua nde bi ogo táhondo heneneore larogo hale halimu. I̱na tá mo ko holene mbira nabiore kogola i̱hondo ko ogoni bule ibirimiyagua ina mamalirunaga Ngode Datagaliwabe kago ibugua manda bu howa tá ko beremi lowa pani ngulebira, lene.

¹⁸Ani layagola agali mbira mini Amasai heagoha Ngode Datagaliwabenaga dinini karula hayagola Amasaihanda Debidihondo lamialu lalu, Yasi igini Debidi-o ina í̱ aria kamagoni. Í̱naga Ngode Datagaliwabehanda í̱ biamogo bialu handayaho kagome agali í̱ heba haga karu tágua wai bialu wayali haabo halimulo hameledo, lene. Ani layagola Debidihanda agali uruni ibunaga ami agali haguane helo helai hene. Mani howa Amasai ibu Debidinaga ami agali hongoheore pira tebira (30) hearunaga haguane helo dabo helene.

¹⁹Debidi ibu Pilidialiru heba Solo baba wai bule piyagola Solonaga ami agali Manase hameigini maru hearu Debidi baba hamaga halu pene. Anigo ai Pilidialinaga kini hearume Debidi ti heba napole layagola wahene. Anidagua layadago irane Debidi ibu abale Solonaga biabe biahaga hayago Pilidiali ti manda buwa Debidi ti heba Solo baba wai bule piyagua Debidihanda beregeda dai bialu Pilidiali ti baba wai bulubada lo manda bialu waha lene. Pilidiali kini hearu tigua bi dindiha ohowa lo mbira halu Debidi ibu Sigilaga dindini daibilene.

²⁰Debidi ibu Sigilaga dai bialu howa Manase hameigini ami agali biaru ti haru mandagi dai bini. Agali o piyadaruni mini Adana Yosabada Yadiele Maigele Yosabada mende Elihu Siledai imaru pene. Ami agali uruni Manase dindiha howa ti hangu hangume ami agali daosini mbira mbira (1,000) haru haga henego Debidi hearia ibugu bini.

²¹Agali uruni ti ami agali bayale hongohe heago hondowa Debidihanda ti ibunaga ami agali haru haga helo helaga bini. Debidihanda agali pagebibi wai biaga hearu baba wai bule piyangi ami agali uruni tigua Debidi biamogo bialu wai bule pene.

²²Horo bibahendengi agali mbira mbira ibugu bialu Debidinaga ami agali hole ibaabo hene. Ani biyagola Debidinaga ami agali dewaore hene.

²³Debidi ibu Heberono tanoha hearia ami agali dewaore ibalu Anduane Homogohanda layadagua tigua Debidi Solo henegoria kini ha aribia helo dabo helole ibini. Ti ibalu wai biagane ale bibahende mo yai halu ibini. Ti ibinidaruni daga ogodagua.

²⁴Yuda hameigini ami agali daosini dege waragariani handari halirame (6,800) wai humbi yandareru yalu ibini.

²⁵Ani bialu Simeono hameigini ami agali daosini kariani handari mbira (7,100) ibini. Agali uruni ti ami agali hongo howa wai biagane mana baya hangu manda biaihe ibini.

²⁶Libai hameigini daosini mariani handari waragaria (4,600) ami agali dege anda ibini. Ti heba Arono aria Yahoiada ibu agali haguane henego ibu aria ami agali daosini tebirani handari karia (3,700) ibini.

²⁷

²⁸Ani bialu igiri daliahe mbira mini Sadogo ibu Libai hameigini dege howa ami agali hongohe henego ibu heba ibu aria agali pira kirani kira (22) haru ibalu ti ami agali haru haga hongoheru dege ibini.

²⁹Solo ibuni aria Beniyamini hameigini hearubi ami agali dege daosini tebira (3,000) anda ibini. Abale howa agali uruni ti Solo baba haganego wahalu Debidi hearia ibini.

³⁰Eberaimi hameigini ami agali daosini dege pira kirani handari halira (20,800) anda ibini. Agali uruni tini dindiha howa ti dameneme ti agali hongoheore heago de hendene.

³¹Manase hameigini halu mende ni paliragohayagi hagaru ti daosini pira mbirani halira (18,000) ibini. Agali uruni ti dameneme dabalu Debidi kini helole Heberono pudaba laya handala ibini.

³²Isaga hameigini handari kira (200) ti ami agali haru haga dege howa tinaga ami agali tini andaneha haga hearu bibahende haru ibini. Ami agali haru haga uruni mini gigabiwi howa tigua Isaraelealime bilonaga hariga mo walia holene ti mandabi hene.

³³Sebulunu hameigini ami agali daosini pira duria (50,000) ti hongoheore hangu ibini. Tigua wai biagane aleru bibahende mo yai halu mini mbiraore halu Debidi pele muleore eberemagoni lalu ibini.

³⁴Nabadali hameigini ami agali haru haga haguane dege daosini mbira (1,000) ibalu tinaga ami agali daosini dege pira tebirani karia (37,000) haru ibini. Tigua wai humbi yandarerubi mo yai halu ibini.

³⁵Dana hameigini ami agali daosini dege pira kirani halira handari waragaria (28,600) ibini. Agali uruni ti wai bule manda mandabu haabo haga hene.

³⁶Ami agali Ase hameiginiru daosini pira maria (40,000) ibini. Agali uruni tibi nde wai bule manda manda bu hagago dege ibini.

³⁷Lubene hameiginibi Gada hameiginibi Manase hameigini halu mende biarubi ti Iba Yodana ni tagira ibiragohayagi haga hearu bibahende wai biagane danda timu yandareru mo yai halu ami agali daosini dege handari mbirani pira kira (120,000) ibini.

³⁸Ami agali uruni tigua wai biagaru ale mo yai halu Heberono tanoha ábu ngoai hene. Ti bibahendeme mini mbiraore howa Debidi ibu Isaraele wali agali bibahendenaga kini helolenego dege mandabu yalu ibini. Isaraele wali agali maru hearume nde ani dege manda biaiho hene.

³⁹Agali uruni ti Debidi heba horo tebiru Heberononi hene. Ani heagola tinaga wali agali bu hearume tomo dewa dawa manda manda biyagola tigua tomo uruni nalu hene.

⁴⁰Anidagua bialu heagola Isaraele wali agali bibahendeore hameigini uyura paliamaro bini Isaga dindiha hearubi Sebulunu dindiha hearubi amuraore Nabadali dindiha hearubi bibahendeoreme turu timbuni halu tigua tomo tara tara yalu Heberono tanoni ábu ngoai hene. Tigua balawa bayalerubi gerebi lini do gembe bu winirubi poge lini ale do gembe bu winirubi waini ibabi olibe lininaga welibi dewaore yalu ibugu bini. Tigua tomo uruni nogo dongi kamele bulumagarunaga erekunini mo pagaho ngelowa yalu ibugu bini. Ani bialu nogo sibi bulumagaru wali agali ti bo dawa nelo haru ábu dege bini.