Read Huli 1 Bi Te 16 Bible Online

1 Bi Te 16 - Huli bible

1 Bi Te 16

¹Tigua Mbogoyi biago yalu puwa Debidihanda balai anda mbira ala bu manda mandabu helenegoha mo ngelene. Ani ngelowa tigua loma biniru irame dai helo bo delalu Anduane Homogola ho gimbu bulenaga loma binirubi bo mialu bini.

²Loma uruni delai howa Debidihanda wali agali bu hearuhondo lalu, Anduane Homogo kago ibugua tá mo bayale helo, lene.

³Ani lowa Debidihanda wali agali uruni tomo nelo mini. Debidi ibugua tihondo mberedi mbira mbira ta halu nogo bo hiririmigonaga mbirinibi gerebi lini maru do gembe bu wiarubi wali agali hearu mbira mbira ta halu nai helo miyagola nalu tini andaga pugu pugu bini.

⁴Debidi ibu Libaiali maru ti Habo Nalolene Bi lo winigonaga Mbogoyi wiagohayagi puwa Anduane Homogo Isaraele wali agalinaga Ngode Datagaliwabe mini mo yaraga halu iba gana lelo dabo helene.

⁵Asaba ibu haguane howa haru helobi Segaraia ibu biamogo bilobi dabo helalu agali maru Yaiele Semiramodo Yahiele Madidaia imaru Eliaba Benaia Obededomo Yaiele imaru ti nde ngida ale baga helobi Asaba ibu ngi̱li̱nge̱le̱ lagane beledi boronosime wabini balu helobi dabo helaga bini.

⁶Ani buwa Habo Nalolene Bi lo winigonaga Mbogoyi wiagohayagi puwa loma binigo mo miaga Benaia Yahasielela libu biguli pulalu helo Debidihanda dabo helene.

⁷Debidi ibugua biabe uruni pigane Asababi Libaiali marubi ti Anduane Homogonaga mini yaraga haga bilo dabo helene.

⁸Iname Anduane Homogohondo turu howa ka̱i̱ lalu ibu daliga gibiore ka lalu lamiai hami̱ya. Wali agali hameigini dindi tara tarani paluyu pedaru ti bibahendehondo ibugua gibiore uruale biya laga bialu hale hai helo loyogo laga bimi̱ya.

⁹Iname ibunaga mini mo yaraga halu iba gana lalu hami̱ya. Ibugua mbirale bayale bigi biyarunaga bibahende hale hai helo laraga halu lamiai hami̱ya.

¹⁰Anduane Homogo ibu mini tigabiore kago ina ibunaga kamago iname ibuhondo turu hami̱ya. Wali agali Anduane Homogohanda hame ledadagua biaga kamaru ina turuho holene nga.

¹¹Anduane Homogohanda ina biamogo bilonaga ibu karia puabo hami̱ya. Iname Anduane Homogo ibu kagoha kaware haparaho haabo hami̱ya.

¹²Anduane Homogonaga biabe bia hagane Abarahama aguanene kamirubi Anduane Homogo ibunime dabene Yagabanaga aguanene kamirubi tágua Anduane Homogohanda manane tara tara agalime nabiagane ale bigi biyarubi wali agali ko biaga hearuhondo pani migi biyarubi mitangiore biaabo halimu.

¹³

¹⁴Anduane Homogo ibu inanaga Ngode Datagaliwabe kagoni. Ibunaga mana lo ngaruni wali agali dindi bibahendeha bu karume bilonaga lo nga.

¹⁵Ibugua habo nalolene bi lowinigo ngaruni wia ai̱ ai̱ore bulebira. Ibugua bi lo wialu ogoale bulebero laga bialu lo ngaruni mani hama porarume handaga bialu karia wia ai̱ ai̱ore bulebira.

¹⁶Ibugua Abarahamala habo nalolene bi lo wialu Aisagahondo ogoale bulebero lenegobi heneneore bulebira.

¹⁷Anduane Homogo ibugua Isaraelehondo habo nalolene bi lowinigo ogoni wali agalirume bialu haabo helonaga lowini.

¹⁸Anduane Homogo ibugua Isaraelehondo lalu, I̱na táhondo Kenana dindi karulalimulo ngulebero. Dindi ogoni tábi tánaga waneigini mani holebirarubi táninaga dindi ogoniore halimulo ngulebero, lene.

¹⁹Ala Ngode Datagaliwabenaga wali agali ti dewa ndo henedaruni ti emene mbira hangu Kenana dindini hene. Ti dindi tene ndo mendeali dindini bame igiri yango pu haradagua bini.

²⁰Ti dindi mbirani baya hangu ho dambolo hene ndo. Ti togolo yalu pialu dindi wiaruni bibahendeha ge hai haga hene. Kini mbiragonaga dindiha puwa emene tigimandi dege halu lone hili yalu pialu kini mende heagonaga dindiha pu halu ani bigi bialu hene.

²¹Ti ani bu ha heagolabi hameigini maru hongohe hearume ibunaga wali agali uruni hengedope holilono Ngode Datagaliwabe ibugua ti mamage hene. Mamage howa ibugua kini hearu talialu ibunaga wali agali urunihondo kagua mbira bulumini lalu lamini.

²²Ibugua lalu, I̱naga biabe biahaga i̱nime dabene karu mo ko holemini. I̱naga mana latagi haga karuore mbira ela nahalimu, lene.

²³Anduane Homogohondo iba gana gahenge lolene nga. Ibugua ina haru dai bialu pele ngiyagoni lalu horo bibahendengi wali agali bibahendeme hale hai helo lamiaaboore halimu.

²⁴Ibu daliga gibiore ka lalu hameigini bibahende paluyu pedaru hale hai helo lamilimu. Ibugua biabe timbuni bayale bima piyarunaga wali agali lamiai halimu.

²⁵Anduane Homogo ibu daliga gibiore kagoni. Iname ibunaga mini uyura mo yaraga haabo halu hami̱ya. Mbirale wali agalime dama mitangi bialu gime wabini ngaru hondowa ina gi holene nawi. Anduane Homogo ibu dege daliga gibi kago iname ibu hondowa dege giho holene nga.

²⁶Wali agali hameigini tara tarame mbirale dama mitangi bialu tini gime wabiniruhondo bi pupu wiagaru uruni bibahende ke̱ howa hangu bialu kagoni. Inanaga Anduane Homogo ibugua hari daligabi mbirale bibahende hariha karubi ngarubi wabinigo ibuni hangu daliga gibiore kagoni.

²⁷Anduane Homogo ibu kini howa wá holenebi mini mo yaraga holenebi ibunaga hangu ngagoni. Ibunaga anda lomabu heleneni mbirale bu ngarume Anduane Homogo ibuni hongohe howa ibuni baya buruguleore agi loabe tobahe kagobi walia ho nga.

²⁸Wali agali dindini bu kamiru bibahendeme Anduane Homogonaga mini mo yaraga halimu. Ibunaga wá holenebi hongo holenebi daliga gibiore nga lalu ibunaga miniore yaraga halimu.

²⁹Anduane Homogo ibunaga mini timbuni daligaore ngago mo yaraga halimu. Anduane Homogohondo mbirale mbira lomabu migi bule yalu ibunaga andaha anda ibugu bilimu. Wali agali bibahende kamiru Anduane Homogo ibu baya buruguleore kagoria ibalu bulu palialu ibunaga lotu lalu halimu.

³⁰Ibu gibiore kago hondowa tá duru ala lalu halimu. Dindi timbuni o ngagoni ibunime wabu winidagua ema bialu girigurabi mbira nabuleore ngagoni.

³¹Dindi timbuni ogo í̱bi hari li kego í̱bi libu nde turu halibu. Wali agali tara tara bibahende bu hama pedaru lamialu, Anduane Homogo ibu kini ka, lalimu.

³²Iba solowara í̱ nde tigitugu lalu í̱ninaga bi dalimu labe. Mbirale iba solowaraha biru ngamiru tá nde bi ladagadaga bialu táninaga bi ladaba. Mabu wima pedamirubi mbirale mabuni andaho hama pedamirubi tá bibahende turu timbuniore ho halimu.

³³Anduane Homogo ibuni dindi ogo bibahende handagimbu buwa haru hole ibulene tu harangi ira teha ira bu karume turu gibiore howa tininaga bi lalu bi dalimu lagalaga bulebira.

³⁴Anduane Homogohanda mana bayale biaabo haga kagonagabi ibunaga gubalini holene ha ho wiaabo haga kagonagabi iname ibuhondo ka̱i̱ lalu hami̱ya.

³⁵Iname Ngode Datagaliwabe inanaga Pele Ngiaga kagohondo bi ogodagua lami̱ya. Í̱na ina bibahende mo mogo bialu waitigi karunaga giha howa yamialu inanaga dindini lone holoma̱ya haru dai bu helabe. Iname í̱hondo turu halu ka̱i̱ lalu í̱naga mini baya buruguleore yaraga halu holoma̱ya í̱na ani bibe larama.

³⁶Anduane Homogo Isaraele wali agalinaga Ngode Datagaliwabe kago ibu mini yaraga hami̱ya. áyubi maniore howabi ibunaga mini yaraga haaboore hami̱ya. Wali agali bibahendeme ani lowa tigua, Henene aniore bilo. Anduane Homogonaga mini yaragaore hama, lalu hene.

³⁷Kini Debidi ibugua Anduane Homogonaga Habo Nalolene Bi lo winigonaga Mbogoyi wiaria agali mini Asababi Libaiali marubi ti lotu lolene haru haabo helo dabo helene. Horo bibahendengi ti biabe ogoni bulene ngadagua biaabo helo helene.

³⁸Yadudunu igini Obededomobi ibu hameigini pira waragariani halirabi (68) tigua Asaba biamogo bilo Debidihanda ti dabo helene. Hosa Obededomola libugua panga haraba mamage haga hene.

³⁹Debidihanda loma binigo mo miaga Sadogobi ibu ariabi tigua Gibeono tanoha Anduane Homogo mitangi bialu lotu lolenaga haru helo dabo helene.

⁴⁰Anduane Homogohanda mana lo wialu Isaraele wali agalihondo minigodagua tigua horo bibahendengi egerebagi alendobi nogo bulumaga sibiru lomabu delaga dabu heagoriani nogo bo delai haga wini.

⁴¹Agali uruni heba Hemana Yadudunula agali maru hearubi ti nde ala Debidihanda Anduane Homogo gubalini haabo hagagonaga mitangi bialu ibu mini yaraga halu iba gana lalu helo dabeneru ti hene.

⁴²Hemana Yadudunula libugua biguli alebi ngi̱li̱nge̱le̱ lagane belede boronosime wabu wiarubi bi lagane marubi iba gana lalu Anduane Homogo mini yaraga halu howa baga heneru bibahende haru haga hene. Yadudunu hameigini hearume Anduane Homogonaga anda panga haraba wiagoriani mamage haga hene.

⁴³Ani biaiore halu wali agali bibahende andaga pugupugu bini. Debidi ibubi nde ibu one waneiginiru Anduane Homogohanda ti mo bayale helo lowa ibuni andaga hama pene.