Read Huli 1 Bi Te 17 Bible Online

1 Bi Te 17 - Huli bible

1 Bi Te 17

¹Debidi ibu ibuni andagaha howa mani ibugua Anduane Homogonaga bi mana latagi haga Nadanahondo lalu, I̱ni anda ira tamia bayalegome binigoha bedogodago Anduane Homogonaga Habo Nalolene Bi lo winigonaga Mbogoyi biago dege balai anda biagoha wiaruago tiga nabida, lene.

²Ani layagola Nadanahanda ladai bialu lalu, Anduane Homogo ibu í̱la mandagi haabo kagoni. Í̱na mbirale mbira bule manda bidedagua nde bibe laro, lene.

³Anigo horo ogoningi mbiraga Anduane Homogohanda Nadanahondo lalu,

⁴Í̱na i̱naga biabe biahaga Debidi karia puwa i̱na bi o larogo ibuhondo lamibe. Debidi-o í̱ agali anda i̱ holiyanaga bia helo dabo heledogo ndo ke.

⁵I̱ anda timbuniha nahaga kogoni. Bamba Isaraele wali agali Iyibi dindiha howa haru tagira pirugongi howabi maruha pu ábu bialubi i̱ balai andaha dege haga harugoni ko.

⁶I̱ni Isaraele wali agali ti haru mandagi dindi dewani ibagabu haabo harimago howa tinaga agali haguane i̱na dabalu helarurunihondo lalu, Ira tamia bayale karume i̱naga anda mbira bia nahe kamigo agibe, lalu hale naharuligoni, lene.

⁷Anduane Homogohanda Nadanahondo laabo halu lalu, I̱naga biabe biahaga Debidihondo au labe, Anduane Homogo Hongo Haiheore kago ibugua í̱hondo bi ogodagua layago hale habe. Í̱ bamba nogo sibi haru haga heria i̱nime í̱ dabalu í̱na Isaraele wali agali haru habelo agali haguane dabo helarugoni ke.

⁸Dindi bibahende í̱ ibaga bialu piriruniha i̱ni iya haru mandagi ibagabu haabo haribagoni. Ani howa i̱nime dege waitigi ibiyaru wai bialu bo podahana haga birugola í̱ wayali harigoni. Ai i̱nime í̱ agali mini lene timbuni dindi maruha karubi dege habelo i̱na í̱ mo yaraga holebero, laya.

⁹I̱naga Isaraele wali agali tá bayaleore halimulonaga dindi hobane bayale mbira tánaga mo wia ko. Bambaore agali ko bu hearume tá mo ko haabo hayadagua mani tá mo ko naholebira. Tánaga mamalirume dindi ogo pigane karulayangi howa bialu henego bima ibalu i̱na tánaga agali haguaneru dabo helaga birugolabi tinaga waitigime ti mo ko haabo haya, laya. Ani biyago áyu i̱na uruni ti mo batara harogola urunidagua nabi tánaga dindi ogobi lone mo ko naholebira. Ani kamigola i̱na í̱ dameneru baya hanguore hai helarogola tigua í̱naga aguaneru dewaore helo hono wigi bulebira, laya.

¹¹Í̱ homaregola í̱naga mamaliru hora henegoha dege hora kangi í̱ igini mbira kini ha aribia helo dabo helolebero. Ani berogola ibu kini hongoheore mbiralime ibu bope habe nahe holebira.

¹²Kini ogoni ibugua wali agali i̱ni koria kaware ibilonaga i̱naga anda bulebira. Ani biragola i̱na maninaga ibu igini aguanerume dege kini haabo helolebero.

¹³Ani helowa ibu aba i̱ni kogola ibu i̱ igini holebira. I̱na ala Solonaga henge wiago í̱hondo ngule ibu erembira mirugodagua í̱ iginihondo ani nabi gubalini haho wiaabo helolebero.

¹⁴Ani helowa ibunaga waneigini aguaneru halu ereba nahe kini ha aribia haga bima puabo helolebero, laya lalu Debidi lamibe, lalu Anduane Homogohanda Nadanahondo lene.

¹⁵Anduane Homogohanda bi ogonidagua lamiyaruni Nadana ibugua hale howa Debidi lamiai hene.

¹⁶Nadana ibugua Anduane Homogohanda bi anidagua laya lalu lamiyagola Debidi ibugua hale halu Balai Anda Anduane Homogo ibuni heagoha pu biruwa lalu, Anduane Homogo Bibahende Haru Haame Haga-o í̱na i̱hondo bayale dewaore birida. Ani bialu i̱nibi i̱naga waneigini damene bu karubi ina bayale ndo hemaria anidagua biridagoni.

¹⁷Anduane Homogo Bibahende Haru Haame Ho Haga-o í̱na i̱hondo bialu hariruni bibahende bayale dege biaabo harigo ai uruni emene degeyane mbirale bayale áyu uruni lone biatago harida. Anduane Homogo-o í̱na i̱ damene mani holebirarubi mo bayale holebero larigo ai i̱ agali nagaloneore kogoni ndobe. Ani ha holiya dege í̱na i̱hondo mbirale bayale timbuni i̱hondo bule ngeru walia harida.

¹⁸Í̱na urunidagua biridagonaga i̱na í̱hondo bi agua loabe. Í̱naga biabe biahaga agali i̱ kogoni í̱ni manda bide.

¹⁹Ani manda buwa í̱na bi lo wirigonagabi í̱nime bule hame ledegonagabi áyu i̱hondo í̱naga mana bayale biaga ngego i̱ mo walia kegoni.

²⁰Anduane Homogo-o í̱ duniniore kegonigo í̱ ale mende naheore. Ngode Datagaliwabe í̱ hangu kegoni lalu ina mamalirume langigi biyane hale harima.

²¹Ina Iyibi dindiha garabaya hemaria í̱na Isaraele wali agali bibahende garabaya golalu haru tagira ibuwa í̱ninaga wali agali holoma̱ya helarigoni. Ani helowa wali agali maru ina kamarubi naheore. Ina dindi áyu kamagoria ibuluma̱ya í̱na mbirale bayale tara tara nahendene ale wiarubi biai harigola inanaga dindi ogoria ibinigo kamagoni. Wali agali dindi ogoriani ala hene hearu í̱na bo batagi hai halu tinaga dama mitangi bialu gime wabini wiaruni bo gialo wahai harigola dindi dabulu wiaru mo ngirigola karulo kamagoni. Anidagua birigola wali agali dindi bibahendeha karume í̱ mini lene taraore ke lowa í̱naga mini yaraga halu ka.

²²Anduane Homogo-o ina Isaraele wali agali kamaru í̱ninagaore holoma̱ya dabo helowa ina ani haabo holoma̱ya helarigoni. Í̱nibi nde inanaga Ngode Datagaliwabe haabo ho kegoni.

²³Anduane Homogo-o áyu í̱na i̱naga dameneruhondobi í̱naga biabe biahaga i̱nihondobi buleore lalu bi lo wiriruni biaaboore habelo hameledo. Í̱na bulebero lo wiridagua bibe laro.

²⁴Wali agali bu karume í̱na inahondo anidagua berego hondowa tigua í̱naga mini yaraga helo ani bibe laro. Ani beregola tigua lalu, Anduane Homogo Hongo Haiheore Kago ibu Isaraele wali agalinaga Ngode Datagaliwabe kagoni, lalu í̱naga mini yaraga holebira. Ani lalu kagola í̱na i̱naga aguane holebiraruha howa dege kini helo dabaga bialu haabo holebira.

²⁵I̱naga Ngode Datagaliwabe-o í̱naga biabe biahaga i̱hondo lalu, Í̱naga aguaneneru bayale helonaga mo hongo holebero, lalu langirigonaga í̱naga biabe biahaga i̱ni kogome í̱hondo gi nahe howa bi ogoni langerogoni.

²⁶Anduane Homogo í̱ni hanguore Ngode Datagaliwabe kegoni. Í̱na mbirale mbira bule lalu lo werego biaore biaga kegoni. Ani biagaore kegome áyu howa i̱hondo heneneore mbirale mbira bule lalu bi lo wirigoni.

²⁷Ani bule lalu lo wiridagua bialu i̱naga damene mani holebirarubi í̱ni andaneha howa bayale haabo helo helabe laro. Anduane Homogo-o í̱na bi ogoni heneneore lo wirigome turu howa biamogo buleneru i̱naga aguaneneruha wiaabo holebira manda bido, lalu Debidihanda Anduane Homogohondo bi anidagua lene.