Read Huli 2 Bi Te 6 Bible Online

2 Bi Te 6 - Huli bible

2 Bi Te 6

¹Ani biyagola Solomono ibugua Anduane Homogohondo bi ogodagua lene. Anduane Homogo-o í̱nime lalu, I̱ hari beraliba mindini ngaruha holebero, larigoni.

²Anigo ai áyu i̱na í̱naga anda baya taraore bia kogonigo í̱ni ogoniha haaboore habelo, lene.

³Kini Solomono ibugua Anduane Homogohondo bi lai howa wali agali bu hearuha handa amu howa Ngode Datagaliwabehanda tí mo bayale helo lowa bi la hene.

⁴Ibugua lalu, Anduane Homogo ina Isaraele wali agali kamarunaga Ngode Datagaliwabe kago ibunaga mini mo yaraga hama. Ibugua bamba i̱ aba Debidihondo mbira bulebero lo winigo áyu biyada.

⁵Anduane Homogohanda Debidihondo ogodagua layagoni. I̱na i̱naga wali agaliru Iyibi dindi howa haru tagira ibirungi hama ibinigo ibalu áyu ogoni howa tigua íbu ngoai halu i̱ni mitangi bialu lotu lalu holene anda mbira Isaraele dindiha tano wiyaru mbirani bilimu lalu nalami haru. I̱naga wali agaliru haru habelo agali mbirabi dabo nabi dege.

⁶Anigo mani howa i̱na wali agali i̱ni koria ibalu i̱ mitangi bialu lotu lolene dindi Yarusaleme dabalu Debidi ibubi Isaraele wali agali haru haga helo dabalu birugoni, lalu Anduane Homogo ibugua Debidihondo lamini lalu, Solomonohanda lene.

⁷Ibugua laho wialu lalu, Bamba i̱ aba Debidi ibugua wali agalime Anduane Homogo Isaraelealinaga Ngode Datagaliwabe mitangi bialu ibuhondo lotu lelo ibunaga anda mbira bule manda bialu hene.

⁸Ani bule biyagola Anduane Homogohanda ibuhondo lalu, Í̱na i̱naga anda mbira bia hole manda birigoni bayale degego

⁹anda ogoni í̱na nabulebere. Í̱ iginiore mbira kago ibugua i̱naga anda ogoni bia holebira, lene.

¹⁰Ani lamiyadagua Anduane Homogo ibugua bi lo winigo áyu heneneore lola hai helayada. Ai ina bibahende ibuni kagoria kaware pialu lotu lami̱yanaga i̱na Anduane Homogo Isaraelealinaga Ngode Datagaliwabe kagonaga anda mbira bidogoni.

¹¹Anda ogoniha Anduane Homogonaga Habo Nalolene Bi lo winigonaga Mbogoyi biago tamuha mo yu íbu ngeledogoni. Mbogoyi ogoniha bamba inanaga mamali Iyibi dindiha howa haru tagira ibiyangi ege to̱le̱ kirani ina baba Habo Nalolene Bi gilibu wini biagolabo ogoniha nga, lalu Solomonohanda lene.

¹²Ani lai howa Solomono ibu Isaraele wali agali bibahendenaga deni howa lomabu delaga dabu heagoria pu howa ibugua gi yaraga halu Ngode Datagaliwabehondo bi lalu hene.

¹³Solomono ibugua dagia mbira boronosime wabu helayago lunaga magi aranenaga magibi mbiraore mida kira bolangua halu dege daliga magi mida mbira bolanguahe ogoni iraga hene. Iraga howa wali agali bibahende ngoaiho hearume ibu handaiore helo ibugua ge duli hangaho biruwa gi kirabali yaraga halu lalu,

¹⁴Anduane Homogo ina Isaraele wali agali bibahendenaga Ngode Datagaliwabe-o dahuliya andagahabi dindihabi í̱ kegobi mende naheore. Ani kego howa iname mana beremaru í̱ninaga deni bayale hangu bialu howa mana ko ngaru mitangi nabi kamagola í̱na í̱ninaga Isaraele wali agali baba habo nalolene bi lo wirigo mitangi bialu ina gubalini haabo haga ke.

¹⁵Í̱na bamba í̱naga biabe biahaga i̱ aba Debidihondo bulebero lalu bi mbira lo wirigo mitangi bialu áyu bi ogoni heneneore lola helarida.

¹⁶Ai Anduane Homogo Isaraelealinaga Ngode Datagaliwabe-o áyu i̱na í̱hondo bi mbira hale harogo. Bamba i̱ aba Debidihondo mbira bulebero lalu bi mende lo wiriyagobi manda bibe. Í̱na ibuhondo lalu, Debidi-o í̱ igini aguaneru tigua i̱ni baya hangu talima ibaabo halubi i̱naga deni ti tigatiga ibagabu halubi í̱na bialu haga wiridagua biyagua nde í̱naga aguanene uruni aria hangume Isaraele wali agalinaga kini haabo holebira, lariyagoni.

¹⁷Ai ina Isaraele wali agalinaga Ngode Datagaliwabe-o i̱ aba Debidi í̱naga biabe biahaga biagohondo ani buleore lalu bi ogonidagua lo wiriyagobi heneneore lola helonaga ani bibe lalu langero.

¹⁸Anigo Anduane Homogo-o í̱ dindi ogoria ina wali agali kamaru heba mandagi habehe kebe. Dahuliya andaga timbuniore ngagoha í̱ holene nakarulape kegodago ai anda emeneore i̱na áyu o bu hela kogoha í̱ agua holebe.

¹⁹Ai Anduane Homogo i̱naga Ngode Datagaliwabe-o áyu i̱naga bi ogoale bibe lalu í̱hondo hale harogo í̱naga biabe biahaga i̱ kogonigo i̱na bibe lalu langerogo bibe.

²⁰I̱nime lalu í̱naga anda ogonigo wali agaliru ti anda ogoniha anda ibalu í̱ni kegoria kaware ibilo dabarigoni. Ani birigo horombe mbiragabi bibahendengi anda ogoha de handape haga bibe. Ani beregola i̱na horo bibahendengi anda ogoha handa amuho howa í̱hondo biamogo bibe larogola í̱na i̱naga bi hale halu bibe.

²¹Anduane Homogo-o í̱ni dahuliya andagaha kegonigo i̱nibi í̱naga Isaraele wali agali bu kamarubi iname í̱ anda ogoha handa amu howa í̱nihondo bi mbira laramagola inanaga bi laramago hale halu iname ko birimadaru domo wahaga bibe, lene.

²²Solomonohanda laabo halu lalu, Mbirali ibu damene mendeali kagome í̱ kagua mbira biri laragola ogoni ibugua anda ogoha anda ibuwa í̱naga lomabu delaga dabu kagoria kaware ibalu ogoni ibu bi heneneore laro lalu i̱ kagua nabi layagua

²³nde Anduane Homogo-o í̱ dahuliya andaga howa mbirali ibunaga bi ogoni larago hale halu í̱na mana tigabi ngadagua bialu mo tiga bibe. Mbirali mana ko birago ibuni biyadagobi pani mibe. Wali agali bu karunaga deni ko mbira para nahe kago ibu tigabi ka lalu pelabe.

²⁴Í̱naga Isaraele wali agali kamarume ina waitigi baba wai bialu kamaria iname í̱hondo mana ko birimagome waitigime ina balu ti wayali helaregola iname ko birimadarunaga mini beregedalu í̱ni keria anda ogoha ibuwa í̱hondo bi lalu, Inanaga ko birimaru domo wahabe larimayagua

²⁵í̱na dahuliya andaga howa í̱naga wali agali bu kamarunaga bi hale halu ko birimago domo wahabe. Ani bialu waitigi karume ina dindi tara mendeha haru piyagua í̱nime dindi bamba ina mamaliruhondo miriyago dindi ogoria ina lone haru dai bibe.

²⁶Ina wali agali í̱naga bu kamarume í̱hondo mana ko mbira bialu kamaria ina pani ngialu inanaga dindi ogoria iba dalu naibilo gaea hangu biaho ngelaregola mani ina mini beregedalu anda o kagoha í̱ni keria handa amu howa bi larimayagua

²⁷Anduane Homogo-o í̱ dahuliya andaga howa í̱naga Isaraele wali agali bu kamaru dara halu iname ko birimadaru domo wahabe. Ani bialu iname mana tigabi bayale ngaru hangu talialu bialu holoma̱ya lawai habe. Ani bialu ai Anduane Homogo-o dindi ogo inanaga dindi ogoniore ngelo í̱na bamba inanaga mamaliruhondo mini wirigoria iba dalu ibilabe.

²⁸Solomonohanda laabo halu lalu, Inanaga dindi ogoria hina gari timbuni piyaguabi warago hongohe tara tagira ibiyaguabi puyabu poboyogobi hongohe tara mbira ibalu inanaga mabuha tomo andaho karu mo ko hayaguabi pagaya ale dewaore ibalu mabuha tomo karu nai hayaguabi ina waitigirume ibalu inanaga tanoruha kamaria ina bole ho mabu bupe hayaguabi warago tara tara ngaru inaha anda ibalu ina mo ko hayaguabi

²⁹í̱hondo bi laramagola hale habe. Í̱naga Isaraele wali agali ina kamaru aria mbirame í̱hondo ko biyagonaga mitangi bialu bu miniha genda howa dara halu anda o kagoha í̱ keria handa amu howa gi dogolalu í̱hondo bi layagua

³⁰í̱na dahuliya andaga howa tinaga ko biyadago domo wahalu tigua bi larago hale habe. Í̱nime hangu wali agali bibahendenaga bu miniha mitangi bu kagobi manda biai ho kegoni. Ani bu kegome wali agali tigua mana koyaguabi bayaleyaguabi biyadadagua dabalu pani miadai bibe.

³¹Ai í̱naga wali agali kamaru í̱na dindi ogoni inanaga mamaliruhondo miriyago ogoriani howa ina bayale tigabi bialu í̱ni andaneha haabo holoma̱ya ogonidagua bibe.

³²Dindi tara tara ngaruha howa wali agali bu karume í̱naga mini timbuni daliga mini lene kego hale halubi biabe timbuni í̱naga wali agali bu kamaru biamogo biridago hale halubi mbiralime ibunaga dindi yu wahalu í̱ mitangi bialu lotu lole anda ogoha ibuwa í̱nihondo bi layagua

³³í̱na dahuliya andaga howa ibugua í̱hondo bia lalu hale harago ale bibe. Í̱naga Isaraele wali agalirume í̱ andaneha kamadagua wali agali dindi tara taraha karume í̱ manda biai halu í̱ andaneha ibalu hai helo ani bibe. Ani bialu howa i̱na anda o bidogo í̱ andaore kagonidalo manda bialu wali agali bibahendeme anda o kagoha ibalu í̱ni mitangi bialu lotu lolene ogoha ngalo manda biai holebira.

³⁴Í̱na inahondo, Dindi mendeha waitigi karu baba wai bule pudaba, laregola bialu howa ina dindi tara tanabi kamagoha howa anda ogo Anduane Homogo í̱naga helo binigobi tano ogoni í̱na dabo ngelarigobi ogoniha handa dai bu howa bi larimayagua nde

³⁵í̱na dahuliya andaga howa inanaga bi laramaru hale howa dara halu ina waitigiru balu wayali holoma̱ya pele ngibe.

³⁶Wali agali bibahendeme ko biai haga kamago ai í̱naga wali agalime í̱hondo ko bialu kamaria í̱na i̱nahondo keba howa ina waitigi karume ibuwa ina bo garabaya bu yalu dindi tara kaundia kawarehayaguabi minu yalu piyagua í̱naga wali agali bu kamarume í̱hondo bi laramago hale habe.

³⁷Mani ina waitigi dindi tara uruniha howa inanaga ko birimaruni mitangi bu dai bialu inane mini beregedarimayagua nde Anduane Homogo-o í̱na inanaga bi laramago hale habe.

³⁸Heneneore ina waitigi dindi ngaruha pu howa í̱nihondo mini mbiraore wuwa í̱ hangu mitangi biaabo halu inane mini beregedai howabi bamba í̱na dindi ina mamaliruhondo mini biagohabi í̱ninaga tano dabo wirigohabi i̱na í̱naga anda wali agaliru ti ogoniha ibalu í̱ni keria ibilo bia harugohabi handa daibu howa í̱hondo bi lalu, Iname mana ko dewaore bialu harimago, lapani halu langirimayagua

³⁹í̱na dahuliya andaga howa iname bi laramagola hale howa dara halu biamogo bialu ko birimarubi domo wahabe.

⁴⁰Ai i̱naga Ngode Datagaliwabe-o í̱na iname anda ogoriani kamaria de handalu í̱hondo bi laramago hale habe.

⁴¹Anduane Homogo Ngode Datagaliwabe-o í̱ni í̱naga Mbogoyi biago heba anda ogoriani haabo hole ibabe. Mbogoyi ogonime Anduane Homogo í̱ hongo gibihe kego walia ho ngagoni. Í̱naga loma binigo mo miaga karu tigua mana tigabi bilo biamogo bibe. Ani bialu í̱naga wali agali bu karume í̱na tihondo bayaleore birigonaga mitangi bialu turu timbuniore helo hamelo kogoni.

⁴²Anduane Homogo Ngode Datagaliwabe-o í̱naga biabe biahaga Debidi gubalini timbuniore ho harigoni mitangi bialu Kini í̱nime dabo helene kogoni handa tara halu erembira nguleni, lalu Solomonohanda Anduane Homogohondo bi ogoni lai hene.