Read Huli Esera 10 Bible Online

Esera 10 - Huli bible

Esera 10

¹Esera ibu Anduane Homogonaga anda lomabia hene heagoha harabani howa ibugua Ngode Datagaliwabehondo bi lalu dindini bulu paluwa dugu bialu mana ko bialu heneru bibahende latagi hai hene. Ani lalu hearia Isaraele wali agalibi waneiginirubi dewali íbu ngoai halu Esera ho mabu buwa tibi nde ko biyarunaga dara howa dugu bigibigi bialu hene.

²Ani bialu heagola Elama hameigini Yahiele mbira henego igini Segania ibugua Eserahondo lalu, Iname Ngode Datagaliwabenaga mana lo wiago pugualu hameigini tara tara Ngode Datagaliwabe mitangi nabiaga hearu aria wali berearu dabu birimagoni. Ani birimagoyu ina Isaraele wali agali kamarume mana ko ogoni domo wahelonaga bulene mbiraore hangu nga.

³Bulene mbiraore ogoni iname buleore lalu bi hongohe mbira Ngode Datagaliwabenaga deni howa lo wialu iname dindi tara tara wali dabu birimarubi waneigini hayadarubi bibahende haru halu tini aba ai̱ya andaga dai biai helami̱ya. Ai í̱nabi agali maru Ngode Datagaliwabenaga mana talima pialu haga kamirubi tígua ina kamaruhondo ogoale bidaba lalu langilimu. Ani langeremigola iname langeremidagua bialu Ngode Datagaliwabenaga bi mana lo ngago bialu holeberama.

⁴Genda áyu ogoni mo tiga bulene biabe ogoni í̱naga ngagoni. Ani ngago ai í̱na gi nahe abale heyalu mo tiga bia. Ani beregola ina í̱ heba kamarunime mini mo mbiraore halu í̱na inahondo bidaba lalu larego biai holeberema, lalu Esera lamini.

⁵Ani layagola Esera ibugua bi hongohe mbira loma binigo mo miaga agali haru haga hearuhondobi Libai hameigini haru haga hearuhondobi Isaraeleali haru haga hearuhondobi Segania ibugua layadaguaore bule lalu Ngode Datagaliwabehondo lo widaba layagola tigua anidagua buleore lai hene.

⁶Ani laya handala Esera ibu Anduane Homogonaga anda harabani birayago heyalu Eliasibi igini Yahohanananaga tamu hobane mbira heagoha anda pene. Ani pu howa Isaraele wali agali hearume mana ko timbuni biyagonaga daraore timbuni howa dugu bialu hene. Ani bialu howa ibugua horo ogoningi hobane ogoniha tomobi ibabi naneore biraabo hene.

⁷Ani heagola Yuda agali haguane bu hearume bi ogo yalu pudaba lene. Wali agali garabaya golalu dai bini Yarusalemehabi Yuda dindi bibahendehabi bu karu Yarusalemeni hangu íbu ngoai hadaba lole pudaba, lene. Tigua lalu, Horo tebiru bolangua nahelo abaleore Yarusalemeni íbu ngoai halimu. Mbirali ibu naibi dongeho hayagua ogoni ibunaga mbirale wu karu ina karulai halu ibuni ina Isaraele wali agali bu kamaru aria ndo lalu bo taliatagi hami̱ya, lene.

⁹Tigua bi uruni yalu peagola Yuda hameigini bu hearubi Beniyamini hameigini bu hearubi horo tebiru biago bolangua naheaore Yarusalemeni ibuwa ege dininaga horo pira mende (20) layagola ti bibahende Anduane Homogonaga anda haraba wali agali ngoai haga wiagoria íbu ngoai ho hene. Ani ngoai ho hearia iba dalu timbuniore ibiyagome agali íbu ngoai ho hearu bibahende damu wahayagola dagare howabi bi galoneore mbira lolebirayane mitangi howabi duru laga laga bialu bu hene.

¹⁰Ani ngoai ho heagola loma binigo mo miaga Esera ibugua heyu howa lalu, Tígua dindi tara tara wali agali Ngode Datagaliwabe mitangi nabiaga hearu dabu bigi birimidagome Ngode Datagaliwabenaga bi mana lowini wiaru puguai harimida. Ani birimidagome ina Isaraele wali agali bibahendenaga mana ko tígua mo timbuniore harimida.

¹¹Anidagua birimidago ai hale hadaba. Anduane Homogo tí mamalirunaga Ngode Datagaliwabe ibunihondo lapani halimu. Lapani halu mana bayale ibu hameledadagua taluwa bialu halimu. Anidagua bialu howa dindi tara wali agali tí daluni karu heba mandagi nahalimu. Ani bialu dindi tara tara wali tígua dabu bini bedaru wahalu tini dalu pudaba lalimu, lene.

¹²Ani layagola wali agali biaru tigua bi hongo howa ladaga halu lalu, Í̱na bi ogoni heneneore larigo iname ogonidagua buleberema, lai hene.

¹³Anidagua bia bimi̱yagoyu ai ina dewaliore kamago iba dalume damu wakago ina tagirani dalu damuyu howa mana ko dewaore birimadaru abale mo tiga bibe naheda.

¹⁴Anidago ai inanaga agali haguane bu karu tinime mbirale uruni mo tiga bule Yarusalemeni helo. Tigua agali maru dindi tara tara wali Ngode Datagaliwabe mitangi nabiaga berearu dabu bu hayadaruni tinime horo mbira mbirangi Yarusaleme ibalu mo tiga bilo. Ani mo tiga bule ibalu tininaga tanoha agali haguane karubi godi hale halu mo tale biaga karubi haru halu ibugu bilo. Iname ogonidagua birimayagua Ngode Datagaliwabehanda keba ho hayago naholebirago anidagua bimi̱ya, lene.

¹⁵Bi ogoni layagola hale howa agali bibahendeme anidagua bimi̱ya lalu e̱ lai heagola agali kiralime dege e̱ nale hene. Agali kira ogoni labo Asahele igini Yonadanala Tigiba igini Yahesiala libugua e̱ nalene. Ani nale heagola agali kira mende Mesulama Libai aria Sabedaila libuguabi agali kira Yonadana Yahesialame bi layago dege lo hongo halu hene.

¹⁶Tigua agali mariali bi mo wahaga uruni ti ani helowa agali maru tigua tinaga genda ogoni agali haguanerume mo tiga bilo lalu hene. Agali haguane uruni Esera halu tinaga mini mbuga mbiraha gilibu wini. Ani buwa ege pininaga horo pigane layagola agali mbira mbira dindi tara wali Ngode Datagaliwabe mitangi nabiaga berearu dabu bu hayadaruni tinaga mana uruni mo tiga bule ibidaba lalu olaga bini.

¹⁷Tigua biabe ogoni ege tebirani bu maro bini.

¹⁸Loma binigo mo miaga agaliru wali tara dabu bu henerunaga mini uru. Yosua ibu hamenerunaga hameigini aria Yahosadaga igini Masea Eliese Yaribi Gedalia imaru ti wali tara dabu bu hene.

¹⁹Agali uruni tigua ti one waholeore lalu bi lowini. Ani lowialu tinime ko bu harimada lo manda bialu tigua nogo sibi wangabe mbira dege dege tinaga ko bialu hayadarunaga Ngode Datagaliwabehanda domo wahelonaga loma bialu bo delole haru ibini.

²⁰Ani bialu Ime hameigini aria Hanani Sebadiala libubi ani bini.

²¹Harimi hameigini aria Masea Elaya Semaia Yahiele Usia imaru tibi nde ani dege bini.

²²Pasuru hameigini aria Elioenai Masea Isimaele Nedanele Yosabada Elasa imaru tibi ani bini.

²³Libaiali aria dindi tara wali Ngode Datagaliwabe mitangi nabiaga berearu dabu bu henedaru tinaga mini uru. Yosabadabi Simaibi Kelaia ibu mini mende Kelida ibubi Pedahia Yuda Eliesebi tigua nde ani dege bini.

²⁴Agali iba gana lalu ngida ba pilipe la bigi biaga howa dindi tara wali Ngode Datagaliwabe mitangi nabiaga bereago dabu bu henego ibu mini Eliasibi hene. Anduane Homogonaga anda mamage haga agali tebirali Salumu Teleme Uri imaru tibi nde anidagua dege dabu bu hene.

²⁵Isaraeleali maru wali tara dabu bu henerunaga mini uru. Paroso hameigini aria Lamia Isia Malagiya Miyamini Eleasa Malagiya mendebi Benaiabi uruni tibi dabu bu hene.

²⁶Ani heagola Elama hameigini aria nde waragariali Madania Segaraia Yahiele Abadi Yaremodo Elaya imaru tibi nde ani dabu bu hene.

²⁷Sadu hameigini aria nde waragariali dege Elioenai Eliasibi Madania Yaremodo Sabada Asisa imaru tibi ani dabu bu hene.

²⁸Bebai hameigini aria tibi nde mariali henego ti mini Yahohanana Hanania Sabai Adalai uruni ti dabu bu hene.

²⁹Bani hameigini aria waragariali Mesulama Malugu Adaia Yasubu Seala Yaremodo uruni hene.

³⁰Pahadamoaba hameigini aria halirali Adana Kelala Benaia Masea Madania Besalele Binui Manase uruni hene.

³¹Harimi hameigini aria nde Eliese Isiya Malagiyabi Semaia Simeono Beniyaminibi Malugu Semariabi uruni ti dabu bu hene.

³³Hasumu hameigini aria nde Madenai Madada Sabada Elibelede Yaremai Manase Simai imaru tibi dabu bu hene.

³⁴Bani hameigini aria Madai Amarama Uele Benaia Bedia Keluhi Bania Meremodo Eliasibi Madania Madenai Yosu imaru tibi dabu bu haga bini.

³⁸Binui hameigini aria nde Simai Selemia Nadana Adaia imaru hene. Ani bialu Maganadebai Sasai Sarai Asarele Selemia imaru hene. Ani bialu Semaria Salumu Amaria Yosebe imarubi uruni ti bibahende dabu bu hene.

⁴³Nebo hameigini aria nde Yaiele Madidia Sabada Sebina Yadai Yoele Benaia imaru uruni ti hene.

⁴⁴Agali mini o daga larimaruni bibahendeme dindi tara wali Ngode Datagaliwabe mitangi nabiaga berearu dabu bu henego wali waneiginirubi bibahende, Tíni dalu wahalu pudaba, lai hene.