Read Huli Esera 5 Bible Online

Esera 5 - Huli bible

Esera 5

¹Mali ogoningi dege bi mana latagi haga Hagai Ido igini Segaraiala libugua Yuda dindihabi Yarusaleme tanohabi Anduane Homogonaga bi mana latagi halu hene.

²Seadeli igini Serubabelebi Yahosadaga igini Yosuabi libugua bi mana latagi haga agali kirali biago labonaga bi layago hale halu libugua agali maru hearu haru howa Yarusalemeni Anduane Homogonaga anda biago lone bialu hene. Ani bialu hebigola bi mana latagi haga agali biagolabo libugua biabe biamogo bialu hene.

³Ani bialu hemigola Iba Yuberedisi abene orayagi dindi mbira mbira wiarunaga haru haga gabumane haguane mbira mini Tadenai heagobi Seda Bosenai ibu ami agaliru haru haga agali haguane heagobi libu heba biabe mandagi biaga agali maru hearubi tigua hale halu hearia Isaraeleali biarume biabe bialu ka layane hale hene. Ani hale halu tigua abale Yarusaleme pene. Puwa tigua agali Anduane Homogonaga anda bulenaga biabe bialu hearuhondo hale halu lalu, Tígua anda ogoni bialu harimidaruni tí aiwa bilimu layabe.

⁴Agali biabe ogoni handayaho haga ai ima dege kamibe mini langidaba, lene.

⁵Tigua ani layagola Ngode Datagaliwabe ibunime Yudanaga agali haguane biaru baya hangu handayaho heagola Pesianaga agali haguane biarume tinaga biabe bialu hearu nabidababe labe nahe hene. Ani labe nahe howa tigua nabidababe lalu agi buabe tobaho howa tigua Kini Dariusi hearia beba mbira gili bialu Yudali biarume bialu hayadaruninaga ogodagua bira lalu gilibu pelene.

⁶Ani gilibu pelowa kini ibunaga bi ladai bilo hondo hene. Tigua kinihondo bi gilibu pelenedagoni ogoale bira lalu beba gilibu pelene. Kini Dariusi-o í̱ bayaleore haabo habelo.

⁸Kini-o ina Yuda dindiha puwa handalu hemaria tigua tininaga Ngode Datagaliwabe hongohe kagonaga anda biago lone bialu hearia handarima. Tigua ege to̱le̱ timbuniru podo yu ibalu urunime anda bialu irarume baya hangu ala dunga haga bialu anda ndo baya taraore mbira bialu ka.

⁹Anidagua bialu heagola iname tinaga agali haguane hearuhondo hale halu lalu, Tígua Ngode Datagaliwabenaga anda bialu kamirubi biabe maru bialu kamirubi aiwa bilimu layabe, lalu hale harima.

¹⁰Ani lalu, Agali biabe ogoni bilo handayaho haga uruni tinaga mini í̱ langulenaga ai ima dege kabe, lalu hale harima.

¹¹Ani hale harimagola Yudali biaru tigua ladai bialu lalu, Ina Ngode Datagaliwabe dindi hari bibahende ngaruni handayaho haga kagonaga biabe biahaga kama. Bambaore inanaga kini hongoheore mbira henegome anda ogoni bini. Ani binigo inanaga waitigi bu hearume bo gialabaga bialu mo ko hai henego ainde lone biadai bialu kamagoni.

¹²Anidagua bialu kamagoni irane ogodagua. Inanaga mamali hearume Ngode Datagaliwabe dahuliya andaga kago mo keba halu hene. Ani mo keba halu heagola ibugua Kaladeali Nebugadanesa Babilononaga kini heagome ina baba wai bilo ibilaya. Ani ibilayagola ibugua ibalu ina mo ko howa bai halu bo podahana haya. Ani buwa Anduane Homogonaga anda heago bo gialo wahai halu wali agali bibahende Babilono dindiha helo garabaya buwa haru piaiore haya.

¹³Ani bialu Kini Nebugadanesa ibugua Ngode Datagaliwabenaga biabe bulenaga mbirale ngolomebi silibamebi wabini Anduane Homogonaga loma bia howa ibunaga andaha wiaga wiaru bibahende Babilonoha mo yu piai howa ibunaga mbirale dama mitangi bialu gime wabini Babilono dindiha wiaru bi pupu wiaga andaha ngelole mo yu piai haya. Ani biagola mani Sairusi ibu Babilononaga kini ha aribia haya. Ibu mali mbirani kini pigane howa Anduane Homogonaga anda ogoni bule pudaba laya. Ani lowa Kini Sairusi ibugua inanaga mbirale bibahende bi pupu wiaga andaha wiago mo yalu penedaruni inanaga agali haguane mbira mini Sesebasa heagohondo miadai biai haya. Ani buwa Kini Sairusi ibugua Sesebasa dabalu ibilenedagoni ibugua Yuda dindinaga gabumane haru haga howa handayaho habe laya.

¹⁵Ani lowa kini ibugua Sesebasahondo lamialu lalu, Mbirale uruni Yarusaleme mo yalu dai bialu Anduane Homogonaga anda abale henedagoriaore helo bia aribia halimu, laya.

¹⁶Ani laya handala yalu ibinigo ai Sesebasa ibugua mbirale uruni anda gahenge ogoniha ngelolenaga ibuni nde Yarusaleme íbu howa ibunime biabe ogoni handayaho halu Anduane Homogonaga anda ogoni bialu kamagoni. Abale biai nahe wene bulene ngelowa dege bialu kamagoni, lalu ladai biya.

¹⁷Yudali biaru tigua bi ogonidagua layago ai Kini-o karulapeyagua nde í̱naga beba gili bia dagala biaga karuhondo Kini Sairusinaga bi ogoni henenedabe hondole gabumanenaga mbugaha dabalu handadaba labe. Ani handaragola Yudali uruni tinaga bi henene layada hawa layada lalu tigatiga handa walia holebere. Ani hondowa anda ogoni bilo lalubi ndo nabilo lalubi bi ladai bibe, lene.