Read Huli Esera 6 Bible Online

Esera 6 - Huli bible

Esera 6

¹Ogoni layagola Kini Dariusihanda lalu, Babilononaga kinirume biniru mbugani gilibu wiagaha Anduane Homogonaga anda bilimu lene lo ngabe hondole hai bidaba, lene.

²Hai bialu hearia Babilononi handa walia nahe howa dindi timbuni Egebadana ogoni Mediahayagi beba mbira gilibu wiagoha bi ogobi lo wiaria handa walia hene.

³Sairusi ibugua mali pigane handame haga heneyangi Yarusalemeni Anduane Homogonaga anda bilonaga bi ogo leneyane hendene. Anduane Homogonaga anda ogoni nogo tara tara bo loma bia ho mulenebi irani bo delolenebi anda ogoni helo gumuni mo tiga bialu biadai bilimu. Anduane Homogonaga anda ogoni daliganaga magi mida pira kirani karia (27) holebira. Aranenaga magi mida pira kirani karia (27) dege holebira.

⁴Anda hái bulenenaga to̱le̱ tongo tebira para howa ira tongo mbira para holebira. Uruni bibahendenaga yolo kininaga muni anda howa yolo mo mulebira.

⁵Ndisi be tara tara ngolomebi silibamebi wabini Yarusalemeni Anduane Homogonaga andaha wiaria Kini Nebugadanesa ibu mo yalu Babilono dindini winiyarubi mo yalu dai buwa Yarusaleme Anduane Homogonaga andaha wiagadagoria ngelo yu dai bilo, lalu lo wiane hendene.

⁶Bi ogoni lo wiago hondowa Dariusi ibugua ogodagua ladai bini. Iba Yuberedisi ange ni paliragohayagi gabumane agali haru haga Tadenaibi Seda Bosenaibi libu heba biabe mandagi biaga kamiru tihondo larogo, Anduane Homogonaga anda biragoha hapai nahe henge milimu.

⁷Yuda dindinaga gabumane agali haru hagabi agali tininaga haguanerubi heba tini Anduane Homogonaga anda abale henedagoria bia dai bilo.

⁸Áyu i̱na tigua anda ogoni bilo biamogo bilimu lalu bi hongohe langero. Biabe biaga uruni tinaga hame lararu ale mulene wali agali Iba Yuberedisi ange ni paliragohayagi karu tigua muni dagisi kinihondo miragome yolo bulebira. Ani biragome biabe bialu kago pugu holo nabulebira.

⁹Horo bibahendengiore loma binigo mo miaga agali Yarusalemeni karume Ngode Datagaliwabe dahuliya andaga kagohondo bo lomabu delole hame ledama lara ale miai halimu. Nogo bulumaga iginibi sibibi sibi iginibi ladi ale mini widibi ibibi waini ibabi olibe lininaga welibi milimu.

¹⁰Tígua ogonibi beramigola uruni tigua Ngode Datagaliwabe dahuliya andaga kagohondo nogo tara tara bayale ibu turu haga aleru milobi ibuhondo i̱nagabi i̱ iginidarunagabi bi la haragola ina mo gumbila helo.

¹¹I̱na bi hongohe mende larogome mbiralime bi larogo aribia haga biyagua ibuninaga anda ira mbira gialo muwa ngunihayagi de howa ibuni ogonime nogoba helo. Ani buwa ogoni ibunaga andabi ko ngubi wahagane ale helo.

¹²Ngode Datagaliwabe ibunaga mini Yarusalemeni yaraga helo lenedagome kinibi hameigini dindi tara tararubi mbiralime bi o larogo mo aribia haragobi Anduane Homogonaga anda gialo wahole manda birago ibubi bope helo lalu bi ogoni Dariusi i̱na laro. I̱naga bi ogoni bibahende hale halu biloore laro, lene.

¹³Ogonibi layagola gabumane agali haru haga Tadenaibi Seda Bosenaibi haru haga marubi ti bibahendeme handame haga Kini biagome layadagua bini.

¹⁴Yu wali agalinaga haguane biarume anda biagoni ala bigi bialu bayuwa bini. Anduane Homogonaga bi mana latagi haga agali kira Hagai Segaraialame mo hongo hayagola tigua ani bini. Isaraelenaga Ngode Datagaliwabehanda layadagua ani buwa Pesianaga handame haga Kini Sairusi Adasegesila ala henerumebi Dariusi heagomebi tigua bi hongoheme bilimu layadagua bialu biai hene.

¹⁵Handame haga Kini Dariusi ibugua handame ho hearia mali waragane layangi tininaga ege daga mini Ada layagola horo tebonengi Anduane Homogonaga anda ogoni bu maro bini.

¹⁶Ani biai howa Isaraele wali agalibi loma binigo mo miaga biarubi Libaiali biarubi wali agali maru maru garabaya ale howa dai bini hearubi heba ti bibahendeme turu timbuni halu Anduane Homogonaga anda biagoni Ngode Datagaliwabehondo loma bia hene.

¹⁷Loma biyadagoni nogo bulumaga wangabe handari mbirabi (100) nogo sibi handari kirabi (200) sibi igini dalua handari mariabi (400) bo mini. Ani buwa wali agali tini ko biyaru domo wahelo lowa nogo meme wangabe pira mbirani kira (12) bo mini. Pira mbirani kira (12) bo minidagoni irane Isaraele hameigini pira mbirani kira hayagonaga manda buwa bo mini.

¹⁸Mosese heneyangi agua bilimu lalu Mana lowinigo gilibu ngadagua tigua loma binigo mo miaga hearubi Libaiali biarubi Yarusaleme Anduane Homogonaga anda biagoria howa bulene winigo bilo mo manda manda bini.

¹⁹Mali mbira howa ege mbirangi horo pira mbirani maria (14) hayagola wali agali garabaya biabe ale bialu hene dai biyaru tigua Bolangua Halu Penegonaga Horo mitangi bialu tomo nene.

²⁰Loma binigo mo miaga hearubi Libaiali hearubi tigua ilili bulene wiadagua ilili bialu Ngode Datagaliwabenaga deni ko domo wahowa gagahe hene. Ani buwa Libaiali biaru tigua nogo sibi igini dalua damene biaru Bolangua Halu Penegonaga Horo mitangi bialu wali agali bibahende garabaya biabe ale bialu howa daibiyarunagabi loma binigo mo miaga biarunagabi Libaiali tininagabi bo lomabia hene.

²¹Nogo tara tara dalua bo loma biyaruni Isaraele wali agali garabaya biabe ale bialu howa daibu henerumebi wali agali dindi ogoriani hene tininaga mana ko wiaru wahai halu Anduane Homogo Isaraelenaga Ngode Datagaliwabe mini yaraga halu ibunaga lotu lole ibiyaru baba ti mandagi nalu hene.

²²Horo karuni Mberedi Yidi Nahe Nolenenaga Horo hayagola tigua ogoningi turu howa tomo nalu hene. Tigua turu henedagoni Anduane Homogohanda Asirialinaga kini biago mini mo beregedayagola ibugua Isaraele wali agali Anduane Homogonaga anda biyago bilo biamogo biyagonagabi ti turu hene.