Read Huli Haru Penego 15 Bible Online

Haru Penego 15 - Huli bible

Haru Penego 15

¹Ani biyago hondowa Mosese Isaraele wali agali hearumebi turu howa wai bi lalu iba gana ogo Anduane Homogohondo lo mini. Áyu Anduane Homogohanda wai bialu wayali taraore hayagonaga i̱na Anduane Homogohondo iba gana lo mulebero. Anduane Homogohanda Iyibinaga nogo hosibi nogo hosini agali berearubi ibaha minu bope hayagoni.

²Anduane Homogo ibugua i̱ mo hongo haga kago i̱na ibunaga mini yaraga halu iba gana lolebero. Ibugua i̱ pele ngiaga kago i̱na ibunaga mini mo yaraga halu iba gana lolebero. Ibu i̱naga Ngode Datagaliwabe kago i̱na ibunaga mini mo yaraga holebero. Ibu bamba i̱ abanaga Ngode Datagaliwabe hene kago i̱na ibunaga mini lene daligaore wini ngago mo yaraga halu iba gana lolebero.

³Anduane Homogo ibu wai biaga kago ibunaga mini Anduane Homogo ka.

⁴Ibugua Iyibi amirubi nogo hosirubi nogo hosirume gili laga karisirubi karisi yaga agali hearubi bibahende iba solowaraha bopebe biai haya. Iba solowara mini Iba Daramabiha bopebe biyagola Iyibi ami haru haga haguane hearu ibame nai haya.

⁵Bopebe biyagola bibahende ibaha ege to̱le̱ ibira haradagua bialu unura yupebe bialu ibame nai hayagoni.

⁶Anduane Homogo-o í̱naga gi tigagoore hongo gibioreya. Í̱naga waitigi hearu bame gi mbiraoreme bo gingirulo paya bialu barigoni handarima.

⁷Hongo gibihegonime í̱naga waitigi bibahende bope harigoni. Í̱naga keba holenego ira hungu kiaulo tagi haradagua bialu gambe aea daradagua í̱naga waitigi karu bo ereba hareya.

⁸Í̱na puyabu hongohe pu lelarigoni. Puyabu hongohe puloyu ibiyagome iba biago daliga biruyu iraga helaya. Iba biago halu ki bira migimigi buwa gana wa mini hagahaga biradagua biya. Iba kuyamaore unu dindiha bereago giambe hodaga hayagola ege mbaulene.

⁹Inanaga waitigirume lalu, Ina talima ibalu tigua ina minu yani howa inanaga mbirale bayale yidamaru gingilamu yuwa mo tale bimi̱ya. Ina hame lara alego mo ya dege bimi̱ya. Iname ayu tibu yidamarume balu inanenaga hongome Isaraele wali agaliore mo ko howa bami̱yago ma, lalu hongoho yalu ibirimi.

¹⁰Ani bu yalu ibiyago ndo Anduane Homogo í̱na í̱naga buhe̱ halu mbira hangu latagi harigome Iyibiali biaru bibahende iba nai hayagoni. Ibaha to̱le̱ ibira haradagua unuraore ti kuni duguale ndoni yupe hayagoni.

¹¹Anduane Homogo-o dama tara tarahondo bi pupu wiaga bu karuni aria mbirago hongohe í̱ aleore ai kabe. Daligaorebi duninibi baya buruguleorebi í̱ni dege kegoni. Í̱na hongo gibi howa agalime nabiagane ale tara tara bigi berego wali agalime í̱ hondowa gi timbuniho bu kagoni.

¹²Í̱na í̱naga gi tiga biago dogola amu harigola dindi wiagome ne ha̱lowa inanaga waitigi hearu minu mbedogo biya.

¹³Í̱nime haru holebero lalu lo wiridagua heneneore wali agali í̱ni pele miriru baya hangu haru halu í̱ninaga hongome ina haru halu dindi mbira wali agali nahaga í̱ni dege haga wiagoha haru ibirigo kamagoni.

¹⁴Wali agali dindi tara tarani hearume í̱na bigi biriru hale howa ti gi dege dindi howa duru ala lalu kagoni. Pilidiali karubi gi timbuniore halu kagoni.

¹⁵Idomo dindinaga agali haguanerubi gi timbuniore ho ka. Moaba dindinaga agali hongohe karubi gi howa duru ala lalu kagoni. Kenana wali agalinagabi hongo bibahendeore pirilipe hai henego ka.

¹⁶Gi holenebi mogo lolenebi ti kagoha ibiraho nga. Anduane Homogo-o tigua í̱naga hongo timbuni kegoni hondowa ti gi dege dindi howa mbirale mbira bibe nahe ka. Ti bame de pigi piagolo ira tili haradagua bu ka handala helalu í̱naga wali agali Iyibi dindi garabaya hemaria golope hene kamaru iname ti bolangua halu pole kamagoni.

¹⁷Garabaya hemaria golope halu haru halu ibuwa í̱ninaga hari mbira í̱ni ogoriani hole lowa dabo wini biagoria haru puwa berelo harili. Anduane Homogo-o hari ogoriani í̱nime í̱ninaga anda bulebere.

¹⁸Ai Anduane Homogo-o í̱ handame haga kini haluhe haabobo haga kegoni, lalu iba gana lene.

¹⁹Iba solowara mini Iba Daramabi biago dombeneha hariga yobi wiyagoria Isaraele wali agali ti dindi ange mendeha howa ange mendeha uba ede hene. Ani uba edede biyaru hondowa Iyibinaga ami biarubi nogo hosini berearubi nogo hosirume gili laga karisini agali heyu hearubi bibahende Isaraele wali agali talima ibaha hariga wiadagua yupebe bialu hearia Anduane Homogohanda iba biago lone biragimbu bilayagola Iyibiali biaru bibahende ibame nai hene.

²⁰Ani biyago hondowa Anduane Homogonaga mana latagi haga wali Arono mbalini Miriamuhanda ibunaga ngilinge̱le̱ laga irabitele ale mbira wiago mo yayagola Isaraele wali maru berearume nde tininaga ngilinge̱le̱ laga wiaru mo yagayaga bialu Miriamu piyadagua haruru pialu irabitele ale balu turu howa ae̱a kae̱a bialu mali lima pialu hene.

²¹Ani pialu howa Miriamuhanda tihondo iba gana mbira ogo lo mini. Anduane Homogohanda wai bialu wayali taraore hayagonaga ibuhondo iba gana lo midaba. Ibugua nogo hosibi nogo hosini agali berearubi bibahende mo paraho bagabu ibame bo nai helayagonaga Anduane Homogohondo iba gana lo midaba, lalu lama pene.

²²Uruni bialu Mosese ibugua Isaraele wali agali Iba Daramabi bere biagoria howa haru halu pialu dindi ko wali agali nahaga mini Sua wiagoria haru anda pene. Puwa horo tebiru dindi ko wali agali nahaga ogoriani pu dege bialu iba nolene mbira nabereoreyane hendene.

²³Ani bialu dindi mbira mini Mara wiagoria anda pialu hemiria iba mbira bereago hondowa iba biago nole birimiria nabenahe kau gibiore bini. Dindi ogoriani iba kaubi ogoni bereago hondowa dindi ogoni mini Mara inanaga bi lalu Kaubi wininagaya.

²⁴Wali agalime iba biago nalu hemiria kaubiyago hondowa tigua keba howa Mosesehondo gimigomo lalu lalu, Ina iba agi noledabe, lene.

²⁵Ani layagola Mosese ibu mini burugu lowa ibugua Anduane Homogohondo hongo howa bi lene. Bi layagola Anduane Homogo ibugua Mosesehondo ira gabini mbira wiago mo walia hayagola Mosesehanda ira gabini biagoni muwa ibaha mo bape hayagola iba biago kau biyago ereba halu dendebi hene. Ani bialu dindi ogoriani Anduane Homogohanda Isaraele wali agalihondo ibunaga bi mana lamialu lalu, Langerodagua bilimu, lene. Ani bialu dindi ogoriani dege hearia ibugua ti ba handalu hene.

²⁶Ani bialu ibugua tihondo lalu, Tígua i̱na bi larogo damene bibahende hale halu biaiore halu i̱na mana bayale manda bidogo bilimu larodagua bialu mana maru ko manda bidogo nabilimu laruyagua nabilimu. Aniore birimiyagua i̱na Iyibi wali agalihondo warago tara tara mirugodagua tíhondo nangulebero. I̱ Anduane Homogo i̱na tí mo dabi haga biago kogoni, lene.

²⁷Ani bialu Isaraele wali agali ti dindi ogoni yu wahalu dindi mende mini Elimi iba nairia duguaga duguaga bialu homberia (12) dugualuhe bibi ayage ale mini dedi dege panda pira karia (70) buhe wiagoria anda puwa ogoriani handa palene.