Read Huli Haru Penego 33 Bible Online

Haru Penego 33 - Huli bible

Haru Penego 33

¹Anduane Homogohanda Mosesehondo lalu, Wali agali Iyibi dindi hearia haru tagira ibirigoni o bu kagonigo uruni haru halu dindi o kamigoni wahalu pudaba. Pialu dindi mbira i̱na Abarahama Aisaga Yagaba imaruhondobi tinaga waneigini aguanene maha hama poraruhondobi karulelo mulebero lo wirugo dindi ogoriani haru pole pobe.

²Dahuliyali mbira tí hariga walia hama mandagi pilimulonaga pu lagua. Ani bialu Kenanaliru Amoroaliru Hidialiru Peresealiru Hibialiru Yabusualiru uruni bibahende i̱na bo batagi hai holeberogo dindi landaneha ngaria tí karuloleberami.

³Ani buleberogo tí dindi ibane bere tomo anda holene bayaoreha hole poramigoni. Ai i̱na dege tí heba naibulebero irane tí i̱naga bi laga berogoni ogoale laralo manda bule ndo ora luluanda hope howa tí miniha ibira alego bia dege dindi halu hagayago. Ani bialu kamiria i̱na ti hariga obeneni howa bo wahai hoa biaganego i̱ naibulebero laya lalu wali agali lamibe, lene. Mosesehanda puwa wali agali lamibe layadagua lamini.

⁴Aniore layago hale howa wali agali biarume mini burugu lalu gendaore ho hene. Genda ho howa ti tinginini yári biagane damene dongone ganuni wule bu heagoni bibahende golo ngelai howa tini dara howa mini hulula bu hene.

⁵Mosesehanda Anduane Homogonaga bi agua laya lalu, Wali agali tí luluanda i̱na bi larogo ogoale lara lole ndo tini bua bira ale bupe haga bialu kamigoni. I̱ni tí heba ibiruyagua hariga lu pu lu nabi howa nai hariga obeneni dege howa tígua tínaga mana biagane egene wini biago bialu kamiria tí bibahendeore bo hilu wahai harogonidago i̱ naibagua. Ani biaguago tínaga tinginini yári tara tara karu ledamigoni damenego bibahende golo ngelai halimu. Ani bidamigola i̱na tíhondo agi bibehedabe hondoliya, Anduane Homogo ani lalu lamibe laya, lene.

⁶Ani layagola nde Isaraele wali agalime Hari Sainai yu wahalu tagira pialu peadangi howa tinaga tinginini yári biagane damene bibahende nabi wahai hene.

⁷Isaraele wali agalime dindi mbirani puwa palue anda bigi bialu howa Mosese ibugua nde Balai Anda mbira wali agali ta nabime anda napiaga mbira haluni amura bu helaga biaga wini. Dindi mbiragoha pole howa gialo yalu pialu anda pu paligi beramigoria anda ogoni ibu hangu haluni bu helaga biaga wini. Anda ogoni mini Anduane Homogo Ina Heba Ka manda bulenenaga anda laga wini. Ani biaga winigo wali agali ti mbiraligo ibu Anduane Homogonaga hame hale holebi mbirale ogo buabe nabuabe lalu Anduane Homogo hale hole manda biyagua Anda ogoniha howa haleho piaga hene.

⁸Mosese ibu Balai Anda odagoniha pugu biragola wali agalime tinaga anda harabani howa Mosese porago baya hangu deme handayaho wialu anda odagoni tamuha anda pora handala wahaga biaga hene.

⁹Ani bialu Mosese ibu Anda biago tamuha anda pu kagola hari beraliba timbuni mberane biago dalipe haga wini. Dalipe howa Balai Anda biago harabani gerelapeho ngagola Anduane Homogohanda hari beraliba timbuni mberane biagoniha howa Mosesehondo bi lamigi biaga wini.

¹⁰Wali agalime handalu karia beraliba mberane ogoni Balai Andadago panga harabani wiape kago hondowa ti bulu paliaga wini.

¹¹Anda odagoniha howa Anduane Homogohanda Mosesela bi la de̱le̱ bialu agali yangonela mini hana hagabu howa bi lo haralidagua lo haga biaga wini. Anduane Homogola bi ani lo halu Mosese ibu wali agali bu karia dai bigi biaga wini. Mosese ibugua bi lo pialu dai bigi bilo lowa igiri daliahe mbira Nunu igini Yosua hayago ibugua Mosese biamogo bule Mosese geha ibagabu howa Balai Anda biago tamuha haga hene.

¹²Mosesehanda Anduane Homogohondo lalu, Í̱na i̱hondo wali agali o bu karuni haru halu dindi o biagoria haru anda pobe larigonigo i̱la polobayago mbirali ogola polebere nalarigoni. Í̱na i̱ ogobiore ka lo manda bialu i̱hondo turuho ko larigoni.

¹³Ani larigo ai í̱na henene halu i̱hondo turuho keyagua o Anduane Homogo í̱na bule manda bu wiaruago ogo ale bule manda bu ngo lalu i̱ langi. Langerego hale howa i̱na í̱ ani bule manda bu wiridago hangu bialu í̱ mo turu haabo holiya langi, lene. Ani bialu hameigini áyu karu í̱ninaga wali agaliore helo dabarigoni í̱ni manda bibe, lene.

¹⁴Ani layagola Anduane Homogohanda ladai bialu lalu, I̱ni í̱ heba ibalu í̱na waitigi karu baba wai bigi beregola wayali habelo biamogo bigi bulebero, lene.

¹⁵Ani layagola Mosesehanda ladai bialu lalu, Í̱ ina heba namali̱yayagua o ina dindi o kamago wahalu nape ogoria holeberamago ina pudaba nalabe, lene.

¹⁶Í̱ni ina heba naibiriyagua wali agali bu karume manda bialu karia Anduane Homogo í̱ wali agali ti bababi Moseselabi turuho ndo harua manda bulebira. Ani bialu í̱ni ina heba ibagabu mandagi harimayagua ogonime ina wali agali maru karubi ndo ina mo tara holebira, lene.

¹⁷Ani layagola Anduane Homogohanda Mosesehondo lalu, I̱na í̱ ogobiore ke lo manda bialu í̱hondo turuho kogodago í̱na o larigonidaguaore bulebero, lene.

¹⁸Ani layagola Mosesehanda Anduane Homogohondo hale halu lalu, Í̱ni íbu ko lalu wá holene de mborerebiore handaya habe nahe walia hagayago wá holene de mborerebi o biagoni dege halu mbira hondoliya waliaha, lene.

¹⁹Ani layagola Anduane Homogohanda ladai bialu lalu, I̱naga wá holene í̱ handabelo í̱ deni pu bolangua helalu i̱naga mini wali agalime nalaga tua mbaria wia do hene ngogo áyu mini tua ogoni hale habelo í̱ deni howa loliya, lene. I̱ Anduane Homogo kogo darabi gubalinibi hoa birago haga kogoni.

²⁰Ani buleberogo áyu í̱na i̱naga dengui handabelo walia naholebero. Irane mbirali i̱naga dengui handaya harago homaganego í̱ walia haruyagua í̱ homoleberegodago walia naholebero, lene.

²¹I̱naga dengui walia naholeberogo í̱ heyu holene karulape mbira o i̱ kogohayagi to̱le̱ni heyu holene ngago ogoriani hole ibabe.

²²Í̱ ani heyu kegola i̱naga wá holene de mborerebi biago bolangua haragola i̱na í̱ minu muwa ege ogoniha kaba mbira ngagoha í̱ minu berelowa i̱naga gime í̱ yi holebero. I̱ bolangua halu poleberogo i̱ porogo í̱ nahandabelonaga ani bulebero.

²³Ani buwa i̱ bolangua halu puwa i̱naga gi yamerogola í̱na i̱naga dengui nahende erembira dege de hondolebere, lene.