Read Huli Yobo 10 Bible Online

Yobo 10 - Huli bible

Yobo 10

¹Yobohanda laabo halu lalu, I̱ dindini holeneore mangaba. Homaruyagua nde karulapeore ogoni. I̱naga genda timbuni yu kogonaga bi latagi halu holene nga lo manda bido.

²I̱na Ngode Datagaliwabehondo ogodagua lolebero. Í̱na i̱ bame manani íbu nahelabe. Í̱na i̱hondo keba ho keyagua nde i̱na ko birudago tigatiga langibe.

³Ainde í̱na mandabu handalu keria agali í̱nime wabinigo mo ngubia halu mo ko holenego mana ogoni bayaleda lo manda bidebe. Ani bialu howa agali ko biaga karume mana ko bialu karu hondowa í̱naga miniha dungulo haga kebe.

⁴Ina wali agali kamarume mbira mitangi bialu manda beramalidagua í̱na manda birilibe.

⁵Ina wali agali kamarunaga holene emene tigi mbira hangu halu homaramalidagua í̱ ogonibi dege kebe.

⁶Ani ndoyagua irane aginaga í̱na i̱ha ko mbira ngabe hondole taya bialu haabo kebe.

⁷I̱ha ko bini mbira nawiore kogo í̱ manda bedegoni. Ani manda buwa mbiralime i̱ í̱naga giha howa mo wialu pele mulene naheorego í̱ni manda bu kegoni.

⁸I̱naga tingini bibahende í̱naga gimeore wabiai hariyago ai í̱ni gi degeme i̱ mo ko halu kegonida.

⁹Í̱na i̱naga tingini agalime dindi duguwa todobene be wabiagadagua wabirigoni. Ainde áyu i̱ mo dodobaga bialu lone dindi abalu ale holiya hameledebe.

¹⁰Í̱nime i̱ ai̱yanaga tombeha wia halu wabirigoni.

¹¹I̱naga kunibi gungubunibi i̱ tinginiha helai harigola i̱naga tingini gimbu bialu hongohe haya. Ani bialu kuni gungubunila dambi helonaga mbirini dongoneru wabu heladambi hariya.

¹²Í̱na i̱ha holene mo karula howa i̱hondo gubalini timbuniore ho harigoni. Í̱na i̱ baya hanguore handayaho hegola i̱ homa nabi haabo kogoni.

¹³Í̱na i̱ bayuwa handaya ho keore nde i̱ áyu mo ko haregoni hole manda bu dege henedalo manda bido.

¹⁴Í̱na i̱ handayaho kegola i̱na ko mbira bidole nde í̱na ko ogoni birugo domo wanahole ledeleda.

¹⁵I̱na mana ko ngago biruyagua nde í̱na i̱ pani ngialu minu bole kegoni. Anigo i̱na mana bayale bialu haga howa ko mbira i̱ha nawi hewayagua nde í̱na i̱ bayale harudago hondowa turu halu bayale birida nalaga kegoni. I̱ha genda dewa anda ibalu i̱ mo ko haragome i̱ taga timbuni ho kogoni.

¹⁶Anigo ainde i̱ni bayale kogoni mitangi bialu turu halu ibaga bu haruyagua nde laiono gabuame nogo mbira abaleore talialu bagadagua í̱na i̱ talima ibaga bialu bope hole kegoni. Ani bialu i̱ bope holenaga agalime nabiagane aleru dewa biaga kegoni.

¹⁷Í̱na i̱la keba ho kego mo walia halu i̱ha genda dewa ibilarili. Ani bialu í̱naga miniha keba holene ogoni timbuniore halu i̱ha tandaga dewaore ami agali dewaore tidiyu ibalu i̱la wai bule ibiradagua ibilalu kegoni.

¹⁸Ngode Datagaliwabe-o irane aginaga í̱na i̱ ai̱yahanda taba henelo wahenebe. Wali agali mbirame i̱ hondo manda nabilo ai̱ya tombeha biru homedole nde karulapeda lo manda bu kole.

¹⁹I̱ ai̱ya tombeha berewangi homalu i̱naga tingini ohowa mo yu pialu homaliha hora henedale nde karulapedale. I̱ dindini naibu haradagua ogoni.

²⁰Ngode Datagaliwabe-o i̱naga holene tubagiore ngago í̱ manda bide. Ani manda bialu i̱hondo genda dewa nangibe. I̱naga bu miniha mo palia holene emene karulo howa nde homoliya helabe.

²¹Mani howa nde i̱ homalu dindi ko arumahe ngagoha pu howa dindi ogoria hole lone dai nabuluboda.

²²Dindi i̱ poleberogoha ngaruni mbirago tigabi nawi bibahende mo libilabale hangu mini burugu lolenebi wiai ka. Wá holene naheore aruma holene degeme dindi ogoni haru hai kagoni ndobe, lalu Yobohanda lene.