Read Huli Yobo 11 Bible Online

Yobo 11 - Huli bible

Yobo 11

¹Nama dindiha howa ibini Soba ibugua Yobohanda bi layago hale howa Yobohondo lamialu lalu,

²Yobo-o í̱na bi dewa laabo halu bedegoni iname í̱naga bi dewa laabo haregome í̱ ko nabiaga agali bayaleore mbira heneda loloma̱yanaga lalu bedebe.

³Í̱na manda bu handalu keria í̱naga bi urunime inanaga ne hariga ndibulo birulubabe toba kebe. Mini bayale wuleneru í̱na mo ko halu bi lai harigo ainde í̱ni manda bu handalu keria urunidagua larigonaga í̱ mo taga holene mbirali nahedalo manda bidebe. I̱naga ne hariga ndibulo bira nabi howa í̱na bi larigoni damene ladai bulebero.

⁴Í̱nime bi lariruni bibahende bayale hangu laru lari. Ani lalu í̱na ko mbira nabi kogome Ngode Datagaliwabenaga deni í̱ha ko mbira nawi ko larigoni.

⁵Ainde galonedago i̱na bi ogoni Ngode Datagaliwabe ibunime í̱hondo ladai bilo karulapeda lo manda bido.

⁶Ibugua í̱hondo ladai bidale nde ibunimeore mini gigabi wulenebi manda bulene bayale ngarubi irane ogo lalu wia do hene ina agalime manda bibe nahe ngaru ibunime í̱hondo langiai kale. Yobo-o Ngode Datagaliwabehanda í̱na ko biridagonaga pani timbuniore mo ngia nabi emene mo ngiyadalo manda bibe.

⁷Í̱na manda bu handalu keria Ngode Datagaliwabe Hongo Haiheore kagonaga mini gigabi ngagobi manda timbuni bidagobi í̱na manda biai halu emene timbunibi ogobi nga lalu magi ogodagua lalu manda biai habehebe.

⁸Ngode Datagaliwabe ibunaga manda hari daligaore damindini ale wialu dindihaore daliape halu homeneru haga humbirini andaga bolanguahe ngagoni. Í̱na ibunaga mini manda ngaru handa walia holenaga agi buleberebe.

⁹Ibunaga mini luniore dindi ngago bibahende bolanguahe nga. Iba solowara timbuni bedago bolangua haihe nga.

¹⁰Ngode Datagaliwabe ibunime í̱la godi laba lole minu yalu piyagua í̱ mini yalu napelo hapai holene karulape ai kabe.

¹¹Ngode Datagaliwabe ibugua agali abogo ibu habane nabulene ka lo manda biaiho ka. Tigua mo hondo halu mana ko bialu kago manda buwa ibugua tinime ko biyagonaga mo tale biaga ka.

¹²Nogo dongi gabua angibuni mbirame igini dambole nawiagadagua agali mbirame mini nawiore howa mini gigabi wibe nahe ka.

¹³Yobo-o í̱na mini beregedalu Ngode Datagaliwabehondo bi lalu í̱nime i̱ dara halu biamogo bia lolene nga.

¹⁴Í̱na mana ko birigo erembira mialu waholene nga. Mana ko ngago í̱la hole lone naibilo wahai holene nga.

¹⁵Í̱na mana ogonidagua biriyagua nde í̱ha ko mbira nawi howa í̱ dengui handadaga halu taga nahe holebere. Í̱ hongohe howa mbirale mbira hondowa gi nahe holebere.

¹⁶Í̱ha genda tandaga ngaruni embeda hai holebere. Ibalime ira yuni dataniru yu poragola embeda hagadagua mbirale uruni embeda hai holebere.

¹⁷Í̱naga holene bibahende beregedalu bayale holebere. Í̱naga holene bayaleore horombe hanuni ni dedaligobi holebere. Í̱ha genda bibahende ibai halu timbuniore aruma ale wiyago ai bodopaya bialu egerebagi ale holebira.

¹⁸Ani beregola Ngode Datagaliwabe ibugua í̱ baya hangu handayaho holebirago hondolebere. Ibuhondobi í̱ mini dunubiaho holebere. Í̱na gi holene mbira nawiore howa í̱ u paliahondo holebere. Ani bialu kegola dewalime í̱na ti biamogo bibelo hondo ibugu bulebira.

²⁰Wali agali mana ko tara tara ngaru bialu haga karu ti dege Ngode Datagaliwabenaga lembo holene ngagoria yo pialu pole hariga tara tara taya bialu ha holebirago handa walia naholebira. Ani bialu howa ti homa hangu maliaho holebira, lalu Soba ibugua lene.