Read Huli Yobo 14 Bible Online

Yobo 14 - Huli bible

Yobo 14

¹Yobo ibugua lalu, Ina wali agali ina ai̱yahanda taba hanayangi howa horo emene tubagi niruniha hangu dindini kamagola genda dewaore tagira ibaga.

²Ina balawaya baya egerebagi bayale dedane handarigo ai alendo handalu karia yogo bialu ko haraligobi kamagoni. Ani bialu ni dedagola inanaga munini kane handaramaligo ai ni beralibame ge haragola munini biago ereba haraligobi kamagoni.

³Ani bidamago í̱ iname ko biniru aginaga dabalu kebe. Ngode Datagaliwabe-o i̱ galone nahe mbirago kogodago í̱na i̱ aginaga dabalu kebe.

⁴Ina wali agali mana ko biaga dodohe kamago. Í̱naga deni bayale helo ko birimadaru domo wahabehe mbira ai kabe. Mbirali naheoreyago.

⁵Wali agali ina dindi ogoria holenenaga horo ege malibi ogodaguaore helo lalu pongo bo wirigo mbiralime ibuore bolangua howa lu hole lalu ibunaga holene horo ege malibi dewa lone mo tago habehe ai ibu kabe.

⁶Ai agali garabaya biabe ale bia hagame ibunaga biabe bulenego bu maro buwa alendo ibuni turuho hagadagua i̱bi nde bu miniha turu hagabu holiya yupe habelo hamelo kogoni.

⁷I̱na manda bialu koria ira dibinigonaga teneha karulapeyagua lone ogoriani dongoria biaga ndobe.

⁸Ira ibunaga pini bambaore heneyaguabi tene ibu gabu hayaguabi

⁹ira teneha dindi ibane bere wiagua nde ira dibayagonaga teneha howa lone dongoria biaga ndobe. Ani anda howa gini gene halu ira gahenge lone anda haga.

¹⁰Anigo wali agali ogonidagua biaga ndo. Ina homaramagola mani holebiraru tigua ina hendelo ndo homalu ereba haramagoniore.

¹¹Manane iba gorene timbuni bereneru hundialu iba ema bialu piagaru hundu tege laraligoni.

¹²Ogonidagua dege wali agali homeneru lone heya nabiaga. Dindi harila piyaguabi ti heyulene henge nawi howa paliaho wulebira.

¹³Wali agali homayaruni lone dére holene henge nawi bada. Anigo ai Ngode Datagaliwabe-o mani kebaho keruni embeda helonaga áyu í̱ wali agali abale homenerunaga dindiha mo do howa horo mbiru nde i̱ mitangi bulene horo mo ngelabe. I̱na dindi ogoni holiya henge ngiridago piai helo hondo holebero.

¹⁵Horo uruni piai haragola nde í̱nimeore wabini i̱ yu wanahe í̱ni kegoria kawareore haparaho holiya hamelo holebere. Ani buwa í̱nime i̱ olaregola homene dindi uruni wahalu í̱ni keria ibulebero.

¹⁶Ani buwa ogoningi i̱na ibaga bialu kogo baya hangu mamage halu ko biruruni mo embeda holebere.

¹⁷Wali agalime nuha mbirale mbira kabubu honowa embeda haralidagua ko i̱na biruruni manda biaho wia nabi í̱na domo wahai holebere.

¹⁸Hari timbuni wedaru podarangibi ege to̱le̱ timbuni bedaru pendege lalu porangibi ibame ege to̱le̱ ngaru gindulobaga bialu dindi bibahendeha hilo yai halu porangibi ani buwa iba dalu timbuni ibalu dindi bayale ngaru hilo yalu piai halu bulebira. Agali dege lone heyule lowa mini dunubia ho karia uruni mo waholebere bada.

²⁰Í̱ninaga hongo timbuni daligaore ngegome ti bope halu homelarili. Ti homalu tinaga denguiru mo tara halu aibe tobahe ngagola ai ti homenerunaga dindiha hama pudaba lariligoni.

²¹Ti ani pu kagola dindini ti igini helalu homayaru nde agali mini lene homogo hayaguabi yagibano kagola wali agalirume mo taga howa mo ko halu hayaguabi homene tigua handa dai bialu manda bibe nahe holebira.

²²Tigua tininaga tinginiha tandaga timbuni nalu karunagabi tiniha genda ibiyarunagabi dugu bialu biraabo holebira, lalu Yobohanda lene.