Read Huli Yobo 15 Bible Online

Yobo 15 - Huli bible

Yobo 15

¹Yobo ibugua bi lai heagola Temana tanoali Elibasa ibugua ladai bialu lalu,

²Yobo-o i̱na í̱ agali mini gigabiwi kebe toba harugo. Ai áyu í̱naga bi bame puyabu ale halu nagalone dege lopaya berego agibe.

³Í̱na lai hangu laabo harilidagua agali mini gigabiwi kagome ani lalubi nagalone ladai biaga kabe.

⁴Bi ogoni ale lariligome wali agali mo luluya haragola tigua Ngode Datagaliwabehondo gi howa ibu andaneha halu bi nalolebira.

⁵Í̱na bi dewa lalu kegome í̱ni ko biridaruni mo walia harili. Í̱naga biore baya wále marume ko bu howa uruni dambi holenaga bi lalu hagagobiore lariligo manda bido.

⁶I̱na í̱ manani howa lo dabalu ko biri lolenego i̱naga biabe ndo. Í̱ninaga bime mo dabaki halu í̱ni bope harigoni. Ani bialu í̱na ko biri lalu mo walia ho nge.

⁷Agali mende naheha í̱ ai̱yahanda í̱ ala taba henene kebe. Í̱na manda bu handalu keria Ngode Datagaliwabehanda dindi hari nawabiha í̱ni dindi ogoriani ala hene haribe.

⁸Ngode Datagaliwabehanda mbirale bu ngaruni wabule manda manda bialu bi lalu heangi í̱ hale ho henebe. Agali mini gigabiwi í̱ hangu kebe.

⁹Í̱naga manda ngegome inanaga manda ngamago bolangua naheore. Mbirale í̱na manda bidego damene bibahende iname manda biai kama.

¹⁰Agali waheore dagua peleoreru ina baba mandagi kama ndobe. Tinaga mali luore í̱ aba ibunaga mali henedago bolangua hene kama.

¹¹Yobo-o Ngode Datagaliwabe ibugua í̱naga genda yu kegoni mo dabiabia halu í̱ miniha mo palia ho habelo hamelo ka. Ngode Datagaliwabehanda í̱hondo bi lolebiradagua iname bi hendore langialu galone laga birima. Ani larimago ai mbirale Ngode Datagaliwabehanda í̱hondo bule ngago nagalonedane í̱na turu nahe kebe.

¹²Í̱na mogolo hondowa Ngode Datagaliwabehondo keba timbuni halu de darama bialu ibuhondo bi ko tara tara ngaru lalu kego irane aginaga bialu kebe.

¹⁴Wali agali mbiraliha ko nawi mbira kabe. Ngode Datagaliwabenaga deni wali agali bayale tigabi lenego mbirali habehe kabe.

¹⁵Dahuliyali bu karu ti dege bayale kagoyu ainde Ngode Datagaliwabe ibugua dahuliyali marume mana tigabi ndo bialu hearia handa walia hene. Ani bialu mbirale hari daligaha ngaru maru bayale ndo nga.

¹⁶Wali agalime kembobe lebola haragola iba noa hagadagua ina mana ko ngago bua timbuni haga kama. Anigo ina dindi wali agali lene kamago bayale tigabiore ndo ko ngubiore howa habane nabulene kamagoni.

¹⁷Yobo-o i̱na bi o larogo í̱ baya hangu hale harene. I̱na deme mbirale handarugobi bi hale howa lo manda birugobi garea lowa languliya í̱ hale habe.

¹⁸Agali mini gigabiwi karume ti abahanda manda bulenebi mini wulenebi ti lawai heneyaru i̱hondo lawai haya. Tigua i̱ lawai halu howa bi mbirago mo do naheore bibahende i̱ langiai haya.

¹⁹Agali uruni ti tininaga dindiore winidagoria haabo haga heneya. Ti heagoha agali dindi taraha howa bame íbu pehene mbira tinaga mini mo luluya halu mo batara holene mbira ti baba mandagi nahaga hene.

²⁰I̱na bi ogodagua laro. Mana ko biaga karu tigua wali agali maru karu madane bialu bo hengedope halu mo ko haga biragonaga pani nalu kane dege tini homolebira.

²¹Tigua bi gibi mbira mogole hale howa nde ti mo ko holene ko tara tara ibarua lalu minime mogo lowa giho birulebira. Ani biruwa tiha gi holene embeda howa bame hadapaya bu karia pagealime nendebu howa ti minu balu tinaga mbirale maru ngaru mo pagebu yalu polebira.

²²Anidagua biragola aruma holeneme dindi aruma hai hagadagua ko tara tara ngarume mo ko holene anda ibiyada lo manda biaga. Waitigi ti ayu tibu ne gadele yu kagome ti dibulebadalo minime dege manda bialu ti yo pialu polene henge nawidane handaga.

²³Mana ko biaga uruni ti bame ibaga biaabo halu karia ega bodo hariawe ale timbunime ne nolene taya bialu homene tingini nole yagalo yu ibaga. Ani biyago hondowa tigua aruma holeneme dindi bibahende dambi hai hagadagua mo ko holeneme ti abaleore minulene kaware ibirago lo manda biaga.

²⁴Ti miniha tandaga holenemebi mini burugu timbuni lolenemebi mo gi ho haga. Anidagua biragome tinaga miniha bope halu kini hongohe kagome waitigi mo ko howa baradagua bini haga.

²⁵Mo ko holene uruni wali agali ko biaga bu karuha anda ibagago irane tinime mitangi bialu ti Ngode Datagaliwabe Hongo Haiheore kago bolangua halu ti daligaore kamabe tobaho howa ibu ba handalu karia genda uruni tiniha anda ibugu biaga.

²⁶Tigua mine howa doga halu wai biaga ale karulalu wai humbiru yalu Ngode Datagaliwabela wai bule gerai poradagua biaga ka.

²⁷Ai ti bayale howa dabudabu tara tara ale dewaore mo tago halu wua kagoni.

²⁸Ani kago mani mo ko halu tinaga anda karu gialapaya bini wialu tano ogoniha wali agali mbira naholebira.

²⁹Tinaga muni mbirale ngarubi wiaabo nahe bibahende ereba hai holebira.

³⁰Aruma holeneme dindi bibahende dambi hai haralidagua mo ko holene íbu ngagola ti yo pialu napolebira. Bo daragola ira yuni abalu puyabume yu purogo laralidagua Ngode Datagaliwabenaga keba holene ngagome ti bo ereba helolebira.

³¹Tigua mana ko ngago yu kagome mbirale bayale ngaru mo yu anda ibulebirabe toba haga. Ani ndoyago. Ko bulene ogoni ale ngagome mbirale bayale mo yu anda naibaga tigua ko biyagonaga lini ogonibi dolebira.

³²Ani biragome tini mali dewa nahe wene dege kaore agalime ira hongone anda halu kago dibu wahagadagua abale homolebira.

³³Wali agali uruni ti pu mbira mini gerebi lini daga bayale do girigerelo ngagoyu ainde boga nabi wene dedaore ko halu tagalopebe biagagobi ka. Ti ira olibe lini dole pabua balu kagoyu lini bayale nade ko halu tagalo wahai hagagobi dege ka.

³⁴Wali agali Ngode Datagaliwabehondo mini mbiraore nawiaga bu karu tinaga waneigini aguaneru naholebira. Ani bialu wali agali maru mana tigabi nabiaga hearume ti muni mbiraleru ohowa mo yu hayaru tinaga anda irame dai holebira.

³⁵Waneigini ai̱ya tombeha biru anda hagadagua mo hondo holenebi ke̱ holenebi ko bulene mana tara tara bu miniha howa anda halu biatagi haga. Tinaga miniha mana ko bulene wu to̱lotagi kagome mana ko tara tara ngaru bialu haga ka, lalu Elibasa ibugua bi ogoni Yobohondo lamini.