Read Huli Yobo 22 Bible Online

Yobo 22 - Huli bible

Yobo 22

¹Yobohanda bi lai heagola Temana tanoali Elibasahanda Yobohondo lalu,

²Ina agali damene kamarume Ngode Datagaliwabe kago mbirale mbira biamogo bibehe kamabe. Ani nabibehe kama. Agali mini gigabiwi karumebi nabibehe dege ka. Agali tini hangunaga biamogo bigi bibehe kagoni.

³Í̱na mandabu handalu keria í̱naga mana tigabiore bialu kegome ainde Ngode Datagaliwabe ibunaga biabe bilo biamogo bia holebirabe. Ani bialu í̱na mana bayale beregomebi Ngode Datagaliwabe ibu bayale helonaga biamogo biagabe. Ani ndoyago.

⁴Í̱na Ngode Datagaliwabe Hongo Haiheore kagonaga andaneha howa ibu mitangi bialu lotu lalu haga keyagua í̱na mandabu handalu keria ani bialu kegonaga ibugua í̱ manani helowa mo tiga bulebirabe. Anidagua nabulebira.

⁵Yobo-o í̱na ko dewaore bialu haridagome í̱ha ko ngelo bedegoni ndobe. Anidagua biridagome Ngode Datagaliwabehanda í̱ manani heledagoni.

⁶Í̱na mana ogodagua birida. Í̱naga nenege hearume mbirale wiaru dano hole ngi layagola dano helo muwa mani dano hanga lalu tinaga mbirale mbira yu howa tinihondo miadai nabi yu haabo harida. Marume tinaga aga golo ngiyagola í̱na tinaga aga dano haridago yadai nabi yu haabo harigome tinaga tingini dagare ho helarigoni.[4]

⁷Mbirali iba noa howa kembobe lebolaho heago hondowa iba nelo hambu mia nabirida. Mendeali garibilo heago hondowa tomo nelo namirida.

⁸Í̱ agali timbuni mini lene howa mbirale bibahende í̱ni hameledego ale bulene karulape manda birilida. Agali mendenaga dindi wiaru í̱na bame karulo harida.

⁹Agali homeneru one dalo berearume ti biamogo bia lama ibiyagola í̱na ti biamogo nabi howa bo pelarida. Waneigini ai̱ya abala homene karubi nde ani dege bialu ti biamogo bulene nahe howa bayale helonaga í̱na biamogo nabi bame helo waharida.

¹⁰Í̱na mana urunidagua bialu harigome ai áyu í̱ minu yania halu mo ko holene abale íbu ho mabu biai halu í̱ mo gi haragoni ndobe.

¹¹Aruma ale timbunime í̱ bu dambi heagola í̱na mbirale mbira handa amunana bialu handabe nahe bedegoni. Ani bialu iba li timbuni aleme í̱ bu dambi henego bede.

¹²Yobo-o í̱na yakundi bu karuni de handadaga halu hari daligaha kago hendedegoni. Ngode Datagaliwabe kago ibu daligaore howa yakundi biaruni handadali howa de handaga ka.

¹³Urunime í̱naga mini mo heya haragola í̱na ogodagua laga ke. Ngode Datagaliwabehanda agile dege manda bidabe. Ibu hari daligaoreni ibagabu kagola hari beraliba mindibigome ibu ho ge halu aruma holene ngagomebi dambi halu bidagola ibugua inanaga dengui nahondolebira. Ibugua mana iname beremago de hondowa ko birimago agua hondolebirabe.[5]

¹⁵Anigo Yobo í̱ agua manda bide. Í̱ hariga ko ala tawe agali mana ko biaga hearu ti pene ngagoria lone pole hongo ho kebe.

¹⁶Agali uruni ti dindini lu haludagua nahe heaore dege abale Ngode Datagaliwabehanda tinaga dindi ogoria holene biba helaga biya. Anda mbira iba angeni haparaho kago iba li timbuni hongoheore ibalu anda gialabaga bialu ibame yu piai hagadagua agali uruni mo ko halu bo wahai haya.

¹⁷Agali uruni tigua Ngode Datagaliwabe erembira mialu lalu, Ngode Datagaliwabe Hongo Haiheore kago ibugua inahondo agi bulubadabe, lene.

¹⁸Anigo tigua Ngode Datagaliwabe ibunime mbirale bayale wiaru yu helaga biyago manda nabiya. Anidagua biyagonaga i̱na agali ko uruninaga bi larago hale nahe wahalu tinaga mini ngago i̱ talia nabulebero.

¹⁹Agali ko nabiaga tigabi karu tigua Ngode Datagaliwabehanda agali ko biaga uruni pani mirago hondowa ti turuho haga. Mbirali ibuha ko bini mbira nawi kagome ko biaga karu hondo oba halu mege biagaya.

²⁰Tigua mege bialu lalu, Waitigi uruni mo ko hai haya. Ani bialu tinaga mbirale bayale wiaru damene bibahende iraha dai hayagoni ndobe, laga ka.

²¹Anigo Yobo-o hale habe. Ai áyu Ngode Datagaliwabela bi mo tiga bialu lone mini mo mbiraore habe. Anidagua biriyagua nde ibugua í̱ lone biamogo biragola bayale holebere.

²²Ibugua í̱hondo lawai holebirago bayuwa mo yalu ibunaga bi langirago í̱naga miniha yu tiga bibe.

²³Anigo í̱na genda yu keruni wahalu mini mo dindi halu Ngode Datagaliwabe Hongo Haiheore kagoha dai biriyagua nde ibugua í̱naga holene lone mo bayale helolebira. Ani bialu mana ko í̱ni andaga bialu haridaru wahai halu ko ngagoria nahe wandialu habe.

²⁴Í̱naga ngolo bayale mo ngeru dindi ko ngagoha mo waholene nga.

²⁵Ani bialu Ngode Datagaliwabe ibuni ngolo siliba bayale uruni wiyagoria ho aribia helo helabe.

²⁶Í̱na ogonidagua bialu Ngode Datagaliwabe Hongo Haiheore kagohondo mini mbiraore wia daibu hariyagua nde ibugua í̱hondo bayale biragola í̱ha mo palia holene karulo holebere.

²⁷Í̱na Ngode Datagaliwabehondo bi laregola ibugua í̱naga bi larego hale halu mbirale ngi larego ngulebira. Ani biragola í̱na mbirale buleore lalu Ngode Datagaliwabehondo bi lo wirigo turu howa biai holebere.

²⁸Ani bialu í̱na mbirale mbira bule lalu miniha magoyu harengi Ngode Datagaliwabe ibugua bule manda bu keru mo bayale holebira. Ani biragola í̱ hariga poregoha wá kagoria pialu puabo holebere.

²⁹Ngode Datagaliwabehanda mbirali ibuni mo yaraga halu kago bope halu mendeali ibuni mo dindiha haga kago pele mialu haru dai bulebira.

³⁰Ibunaga deni í̱ha ko mbira para nahe mana tigabi bialu kego hondowa ibugua wali agali ko biaga karu dara howa pele mialu haru dai biagadagua í̱bi ko mbira nabi keyagua í̱ mo wialu haru dai bulebira, lalu, Elibasahanda lene.