Read Huli Yobo 26 Bible Online

Yobo 26 - Huli bible

Yobo 26

¹Yobohanda Bilidadahanda bi layago ladai bialu ogodagua lene.

²Í̱ore nde mbirali hongo nahe kago biamogo biaga agaliore mbirago í̱ henedabe.

³Ani bialu agali mini mandabi nawi i̱ kogo hondowa í̱na agali mini gigabiwibi manda timbunibibi kegome i̱ biamogo bialu harida. I̱na hale ho berewagola í̱na bi bayale dewaore latagi harigoni ndobe.

⁴Í̱na bi bayale uruni latagi habelonaga aiwa lamogo biyadabe. Í̱na i̱ biamogo birigo ainaga dininime mo walia hayabe.

⁵Agali homenerunaga dinini ti humbirini andaga dindi andane iba bedagoha ha do hayaguabi tigua Ngode Datagaliwabenaga deni ha do habe nahe. Ti Ngode Datagaliwabenaga deni dege howa ibugua ti de handaya haragola ti gi halu mogo lowa durulalu haga ka.

⁷Ngode Datagaliwabehanda hari li kago wabuwa mbirale mbira naheha helene ka. Ani bialu ibugua dindi ogonibi dege wabu ngeleda. Dindi ogo ibuni wulenedagoria ngelowa minu yaniaho haga mbira naheore ibuni winigoria wiaabo heleda.

⁸Ani bialu Ngode Datagaliwabehanda hari daliga beraliba kagoha iba payadaga ho berelaga ka. Iba ogoni gendabiore bedagoyu ibame hari beraliba kago budalu pugulope nahaga.

⁹Ainde ibugua ibunaga handame ho hagane dagia ngago hari beralibame mo ge haga nga.

¹⁰Ani bialu iba solowara bedago biruleneore ngagoria berelo tubari winigoria birimida dai bileda. Iba bira maro biledagoha mbiraga horombela ngola hagane tubari ogoni nga.

¹¹Ainde Ngode Datagaliwabe ibugua keba harangi hari daliga li kago mogo timbuni lowa duru lalu haga.

¹²Bamba puya timbuni dama mbira mini Lahaba wiago ibugua Ngode Datagaliwabehondo mine hene. Ani biyagola Ngode Datagaliwabe ibuninaga hongo timbuni heagomebi mini gigabi wiagomebi Lahabanaga hongo heago bope halu iba solowara timbuni bereagobi ema nabi hendore berelo berelene.

¹³Ngode Datagaliwabehanda ibunaga buhe̱ loleneme hari beraliba timbuni heago pulo wahai halu hariha lone wá helene. Ani bialu Ngode Datagaliwabe ibuninaga gime puya dama ogoni ibida pialu hearia balu homelene.[7]

¹⁴Mbirale emene uruni Ngode Datagaliwabe ibugua binidaru iname manda bialu miniha mo pehalu beremagome Ngode Datagaliwabe ibuninaga hongo timbuni ngago emene mbirahayagi manda bu kamagoni. Anigome inanaga manda ngamago bolangua ho nga. Ani ngago ainde ibugua ibunaga hongo ngago bibahende inahondo mo pani hai hayagua nde iname bi emeneorebi mbira labe nahe wulebira, lalu Yobohanda lene.