Read Huli Yobo 33 Bible Online

Yobo 33 - Huli bible

Yobo 33

¹Elihuhanda laabo halu lalu, Yobo-o hale harene. Áyu i̱naga bi í̱hondo larogo bibahende baya hangu hale hai habelo hameledo.

²I̱na bi yidogo áyu ogoni dege latagi haro.

³I̱na bi latagi harogome í̱ mo walia holebirago ogo. I̱ Ngode Datagaliwabenaga deni agali tigabi howa i̱na mini tigabi bu habaneha wu kogo latagi haruli.

⁴Ngode Datagaliwabe Hongo Haiheore kago ibunaga Dinini kagome i̱ wabialu ibunaga buhe̱ lolene i̱ha pulaanda hayagome i̱ holene karulo howa ema bialu ibaga bu ko.

⁵Yobo-o í̱na abale heyalu i̱la lai la nabere. Í̱na ladai bulene karulapeyagua bi i̱na larogo ladai bibe.

⁶Ngode Datagaliwabenaga deni iya ogobi labolabo kabagoni ndobe. Ibugua i̱ dindime wabialu í̱bi dindime dege wabini kegoni.

⁷Anidagua binigo manda bialu í̱na i̱ hondowa gi nahabe. I̱na í̱ha genda timbuni mo ya halu mo gi naholebero.

⁸Í̱na bi larigo damene i̱ hale hai harugoni. Í̱na bi hongo howa ogodagua lari.

⁹I̱na mana ko mbira nabiore howa i̱ Ngode Datagaliwabenaga deni ko mbira nawiore kogoni lari.

¹⁰Ani kogola Ngode Datagaliwabe ibugua i̱ waitigi mbira haradagua bialu ko biaga kagohondo genda mo miagadagua i̱ mo ngialu ka lari.

¹¹Ibugua i̱naga ge seni pume minu kabu biya. Ani bialu i̱ ibagabu kogoha i̱naga ge ibugua guariama ibaga bialu mayu ka, lalu larigoni.

¹²Ani larigo ai Yobo-o hale harene. Í̱na bi uruni larigo tigabi ndo lari. Ani larigo ai i̱na í̱naga bi lariruni ladai bulebero. Ngode Datagaliwabe ibu duniniore kago ibunaga mandabi hongobi timbuniore wali agalinaga ale ndo bolanguahe ka.

¹³Í̱na lalu, Iname Ngode Datagaliwabehondo bi laramago ibu hale nahagaya, lariligo irane aginagabe.

¹⁴Ngode Datagaliwabe ibugua inahondo bi hariga tara tarani langigi biaga ka. Anigo ibugua bi larago iname yu tiga nabi haramali.

¹⁵Wali agali mbiraga padaria Ngode Datagaliwabehanda emagaha howabi de gandebaha howabi bi lamiaga.

¹⁶Uruniha howa ibugua iname ko birimago mo walia halu ina lawai halubi mini bayale wulene mo walia haga. Ibunaga bi ogoni inanaga bu miniha hongohe haabo helo ani helaga.

¹⁷Anidagua biragome mana ko lone nabuluma̱yanaga mo gi haga ka. Ani bialu ina mine naholoma̱yanagabi ani biaga ka.

¹⁸Ani bidadago irane iname mine halu kamaria inanaga waitigi bu karume ibalu ina bo waharagola ina homalu humbirini andagaha napoloma̱yanaga anidagua biaga ka.

¹⁹Marungi nde Ngode Datagaliwabehanda ina wali agali mo tiga bulenaga mana ogobi nga. Mbirali ibuha warago timbuni ibilaragola ibu dagiani paliaho wiaabo halu ibuha palibe nahe halu tingini tandaga timbuni biaabo haga nga.

²⁰Ani wuwa tomo nolene magu timbuni haga ka. Maru bu karume tomo bayaleru dawa yalu ibiragola warago bo wiyago ibu magu halu uruni tomo ndo tara ale handaradagua biragola nanaga.

²¹Tingini obialu kuni bibahende pani haihe wiaga.

²²Agali uruni homolene kaware ngagola ti abale homalu humbirini andagaha hole piaga.

²³Anigo Ngode Datagaliwabenaga dahuliyali daosini dewaore bu karu aria mbirago ibugua ibalu agali biagome mana bayalego bialu helo bi lamulebira.

²⁴Ani lamuwa ibugua dahuliyali biagome Ngode Datagaliwabehondo agali biago dara halu biamogo bia lowa bi lamialu, Í̱na agali ogoni ibu dai bulene hariga mbira wiaria handa walia harugo ainde agali ogoni humbirini andaga hole napelo dara habe, lolebira.

²⁵Ani laragola agali biago bayale halu abale igiri daliahe haraligobi holebira.

²⁶Agali ogonime Ngode Datagaliwabehondo bi laragola ibunaga bi larago hale halu howa ibu turu howa Ngode Datagaliwabe kagoha kaware holebira. Ani kagola Ngode Datagaliwabehanda ibuha mo ko hene ngago damene bibahende mo tiga biai holebira.

²⁷Anidagua biragola agali ogoni ibugua wali agali maru karuhondo lamialu lalu, I̱na mana ko dewa wiaru bialu haru. Ani bialu hewaria Ngode Datagaliwabehanda i̱ minu bolene winigo ai ibugua i̱ dara halu bo wanahaya.

²⁸Ibugua i̱ haru dai biyagome i̱ humbirini andaga nape homa nabi kogoni ndobe lolebira.

²⁹Ngode Datagaliwabehanda wali agalihondo dewa halu ogonidagua bia dai dai bialu ka.

³⁰Ibugua ti biamogo bialu mo wiragola ti homa nabiaga. Homa nabi howa Ngode Datagaliwabehanda wali agalinaga holene miadai biragola ti turuho haga.

³¹Yobo-o ai i̱na í̱hondo bi maru larogo hale hole ema nabi hale ho birabe.

³²Ainde í̱na bi lolene maru yu bereyagua i̱ hale holiya latagi habe. Irane wali agali bu karume í̱ha ko mbira nawi bayale ko lalu mo walia habelo hameledo.

³³Bi lolene nayi bereyagua nde i̱na bi larogo dege hale hole ema nabi birabe. I̱na mini gigabi howa holene mana langiai holeberogo bayuwa hale habe, lene.