Read Huli Yobo 36 Bible Online

Yobo 36 - Huli bible

Yobo 36

¹Elihuhanda laabo halu lalu,

²Yobo-o i̱na baya hangu lawai holiya í̱ ema nabi hale ho birabe. I̱na bi maru Ngode Datagaliwabehanda laradagua lalu í̱hondo lolebero.

³Ngode Datagaliwabe i̱ wabini kago ibugua mana tigabi hangu biaabo hagago i̱naga miniha manda tara tara to̱ledogo í̱ mo walia halu latagi holebero.

⁴I̱ ke̱ nahaga kogo i̱na heneneore laro. I̱ agali manda timbuniorebi mbira í̱la mandagi bedabagoni.

⁵Ngode Datagaliwabe ibu hongo timbunihe howa ibugua wali agali mitangi bialu handape nahaga ka. Ibu mini timbuni gibiorewi kagome harihabi dindihabi bibahende ibugua manda biai ho ka.

⁶Wali agalime mana ko biraru hondowa ibugua ko biaga uruni dindini lu ibagabu haabo nahelaga. Ani bialu yagibano karu biamogo bialu ti mo tigabu helaga ka.

⁷Ibugua wali agali tigabi karu handayaho kagola kininaga mini yaraga hagadagua wali agali uruninaga mini mo yaraga holebira.

⁸Anigo wali agali pume gi ge minu kabubu ngelagadagua mo ko holene mbira tagira ibiragome ti daribaho ngelayagua nde Ngode Datagaliwabehanda tihondo lamialu ogodagua laga. Mo ko holene tíha íbu ngaruni irane tígua tíninaga mini mo yaraga halu mana ko tara tara dewa bialu haabo harimigonaga ani anda ibilaga biaga, laga.

¹⁰Ani bialu ibugua ti mana bayale bialu helogo lawai halu mana ko tara tara ngaru erembira mialu pilimu laga ka.

¹¹Ainde tigua ibunaga bi mana lamirago baya hangu hale howa bialu ibu andaneha heagua nde ti holene bayale taraore haabo helaga ka.

¹²Anigo tigua bi hale nahayagua nde waitigi bu karu ibalu ti bo wahai haragola tigua mbirale bule wiyaru manda nabiaga ka.

¹³Wali agali Ngode Datagaliwabe erembira mu haga karume ibugua tiha genda timbuni ngago anda ibilo hondo kagola tigua tandaga ho howa Ngode Datagaliwabehondo biamogo bia lalu bi nalaga ka.

¹⁴Anidagua biaga howa tigua wali agalinaga deni mana koorene ko ngaru bialu hayagua tini wene waneigini daliahe dege kaore abale homaga.

¹⁵Anigo Ngode Datagaliwabehanda tihondo mana bayale tigabi ngaru taluwa bialu helonaga biawai hole ibugua wali agaliha genda tandaga ibiraru ibilo wahaga ka. Ibugua anidagua bialu haru dai buwa bayale helo helaga biaga.

¹⁶Yobo-o í̱ genda timbuniore yu howa áyu dege ereba hole bedegoni. Anigo ainde Ngode Datagaliwabe ibugua í̱ haru dai bialu bayale berelalu í̱hondo tomo mbirale bayale ngaru ngialu biragola mbirale ngarume í̱ hapai helo hame naleore kagoni ndobe.

¹⁷Anigo áyu Ngode Datagaliwabehanda í̱ ko biaga mbira keria hendeda. Ani hondowa ibugua í̱ ko birida lalu í̱ tandaga handabelo minu baragoni ndobe.

¹⁸Anidagua bidago í̱naga miniha tandaga holene ngelo kegome í̱na Ngode Datagaliwabe mege bulene bi mbira loligo de hondowa bi labe. Í̱ni mo homogo holenego duniniorebe toba howa í̱naga Ngode Datagaliwabe kago yu waholeni de hondo habe.

¹⁹Í̱na Ngode Datagaliwabehondo i̱ biamogo bia lalu ibu olariyaguabi í̱ninaga hongome mo bayale hole hariga taya biriyaguabi urunime áyu í̱ mo ko hene kegoni ereba naholebira.

²⁰Ani bialu í̱na aruma holene abale ibilo hame lolene nawigo irane aruma holene ogoni ale ngagoha ko tara tara wali agali kagoha abaleore anda ibaga nga.

²¹Í̱ha genda áyu dege anda íbu ngaruni hondowa turu nahe bedegonigo ainde í̱na mana ko bule ngaru turuore howa bialu hariya. Ani biriyago manda bialu í̱ ko ngagoha haabo holigonaga de handalu mamage ho holene nga.

²²Ai hale ha. Ngode Datagaliwabe ibu daliga hongo timbuniorehe ka. Ibugua ina biawai hagadagua aiwa biawai holebirabe.

²³Ngode Datagaliwabehondo í̱na ogoale bia lalu bi lamibehe mbirali ai kabe. Ngode Datagaliwabe í̱na mana tigabi ndo birida lalu labehe mbirali ai kabe. Urunidagua lolenego mbirali naheore ndobe.

²⁴Wali agalime mbirale Ngode Datagaliwabehanda wabini ngaru de hondowa ti turu halu ibunaga mini yaraga halu iba gana laga ka. Anidagua biagago manda bialu í̱nabi nde anidagua dege bulene nga.

²⁵Wali agali bibahendeme Ngode Datagaliwabehanda bini ngaru handa hondowa biabe binidago irane baya hangu manda nabiore ka, lene.

²⁶Elihuhanda laabo halu lalu, Ngode Datagaliwabe ibu dunini daligaore ka. Iname ibu baya hangu manda biai habe naheore ibunaga malibi agirabe iname manda nabiore kama.

²⁷Ibugua iba dindini bedaru hariha haru irigi howa mo iba dalu bu hinilaga ka.

²⁸Ani bialu iba hari beralibaha howa dindini ibira haragola wali agali dindini bu kamarume iba bayale dewaore berelo haramali.

²⁹Hari beraliba timbuni ngagome hari bibahende bu dambi hai halu Ngode Datagaliwabenaga balai anda haradagua biaga ngago agua bialu biagabe ina manda nabiore kama. Ani bialu hari beraliba andaneha howa hari daba bialu kilikulu lagago agua bialu lagabe ina manda nabiore kamagoni ndobe.

³⁰Ibugua dege hari dabanaga wá timbuni datagi helaragome hariha wá haame halu iba solowara bedago andaneha aruma ho wiaga. Ani bialu wá haragome mbirale bibahende ngaru panigi ona wiai haga.

³¹Ngode Datagaliwabehanda hari beraliba iba dalubi handayaho howa haru haga ka. Anidagua dege dindini wali agali hameigini tara tara bi tara tara laga bu karu handameho howa haru hai haga ka. Ani bialu mabuha tomo damene bayale mo anda hai helaragola wali agali tomo nalu holene karulape helaga.

³²Ibugua wá holene hari daba giha yu howa ibu de hendedagoha bilina howa timu baradagua bope haga ka.

³³Hari daba birangi iba dalu puyabula hongoheore ibulebirago mo walia haga nga. Ani biragola nogo bulumaga bu karu tibi nde dalu timbuni ibarua manda bu haga ka.